ونەر دوداسىندا قازىلار القاسىنا قازاقستان رەسپۋبليكاسىنىڭ ەڭبەك سىڭىرگەن قايراتكەرى, ءانشى, تەرمەشى قاتيموللا بەردىعاليەۆ توراعالىق ەتتى. سايىسقا قاتىسۋشىلار «قوبىلاندى باتىر» جىرىن ورىنداپ, ەركىن تاقىرىپتا دا ونەر كورسەتتى.
قۇرامىندا قازاقستان رەسپۋبليكاسىنىڭ ەڭبەك سىڭىرگەن ءارتيسى, ع.قۇرمانعاليەۆ اتىنداعى وبلىستىق فيلارمونياسىنىڭ ءانشىسى ساۋلە تاۋداەۆا, قازاقستان رەسپۋبليكاسىنىڭ مادەنيەت قايراتكەرى, جىرشى-تەرمەشى اماندىق كومەكوۆ, قازاقستان-ورال تەلەارناسىنىڭ ءجۋرناليسى, اقىن مۇنايدار بالمولدا, رەسپۋبليكالىق بايقاۋلاردىڭ لاۋرەاتى, حالىقارالىق « ۇلى دالا داۋىسى» راديوفەستيۆالىنىڭ جەڭىمپازى, ءانشى-تەرمەشى, قۇرمانعازى اتىنداعى ساز كوللەدجىنىڭ وقىتۋشىسى ارمات يسليامعاليەۆتار كىرگەن قازىلار القاسى جىرشىلاردىڭ ورىنداۋشىلىق شەبەرلىگىنە, ساحنا مادەنيەتى مەن جىردىڭ سىرىن كورەرمەنگە جەتكىزە ءبىلۋ, كاسىبي دەڭگەيلەرىنە قاراپ باعا بەردى.
ۇلت ونەرىن ۇلىقتاۋ جولىنداعى ەكى كۇنگە سوزىلعان بايقاۋدا جۇيرىكتەر انىقتالىپ, ۇمىتكەرلەر جۇلدەلى ورىندار مەن ديپلوم, العىس حاتتارعا يە بولدى. باس جۇلدە ماڭعىستاۋلىق بەردىباي تويعۇليەۆكە بۇيىرسا, ءى ورىن قىزىلوردا قالاسىنان كەلگەن ءادىلحان قۋاڭباەۆتىڭ ەنشىسىنە ءتيدى. ءىى ورىندى اقتوبەدەن كەلگەن ءومىرحان جەتەسوۆ پەن ورالدىق ساكەن جانعازيەۆ ءبولىستى. ءىىى ورىن ماڭعىستاۋ وبلىسىنان كەلگەن جىرشى امانبەك ساۋىرباەۆقا, ورالدىق اقمارال كەمەلحانوۆا مەن گاۋحار ۇزاقبايعا بۇيىردى. قامبار جىلقىباەۆ (بقو, ءبورلى اۋدانى), ارداق ومار (بقو, اقجايىق اۋدانى), بولاتبەك قۇباشەۆ (اتىراۋ قالاسى) ديپلومانت اتاندى.
سايىس كەزىندە حالىقارالىق, رەسپۋبليكالىق بايقاۋلاردىڭ لاۋرەاتى جىرشى-تەرمەشى فارحاد ورازوۆ «ارناۋ» ايتسا, بەلگىلى ماڭعىستاۋلىق جىرشى اماندىق كومەكوۆ «سۇگىردىڭ دومبىرامەن ايتىسىن», بەردىباي تويعۇليەۆ «قاراساي قازي داستانىن», ءادىلحان قۋانباەۆ ء«جۇز ساۋال» جىرىن جىرلاپ, كورەرمەن قوشەمەتىنە بولەندى.
قازبەك قۇتتىمۇرات ۇلى,
«ەگەمەن قازاقستان»
