بىرقاتار بۇقارالىق اقپارات قۇرالدارىنىڭ باسشىلارى مەن وكىلدەرىن باس قوسقان جيىندا وڭىرلىك ءباسپاسوزدى دامىتۋ, سالادا تۋىنداپ وتىرعان ماسەلەلەر جانە جۋرناليستيكانىڭ زاماناۋي تالاپتارى سىندى ماسەلەلەر نەگىزگى اڭگىمە وزەگىنە اينالدى.
شارادا العاشقى بولىپ ءسوز العان «قازاقستان تاراز» تەلەارناسىنىڭ ديرەكتورى, بەلگىلى جۋرناليست مەيرامبەك تولەپبەرگەن ايماق جۋرناليستيكاسىنىڭ وتكەنى مەن بۇگىنىنە كەڭىنەن توقتالىپ, قازىرگى زامان تالابى – اقپاراتتى جەدەل ءارى ساپالى تاراتۋ عانا ەمەس, سونداي-اق كوپشىلىكتىڭ قىزىعۋشىلىعىن ءدال تاۋىپ, وقىرمانمەن بايلانىس ورناتا ءبىلۋ ەكەنىن ايتتى. سونىمەن قاتار, ول اقپاراتتىق سالاعا ايرىقشا ماڭىز بەرۋ كەز كەلگەن زاماناۋي مەملەكەتتىڭ كوكەيتەستى ماسەلەسى ەكەندىگىن اڭگىمەلەپ, بۇقارالىق اقپارات قۇرالدارىن دامىتۋعا قاتىستى بىرقاتار وزەكتى ماسەلەلەردى العا تارتتى.
جامبىل وبلىستىق «زناميا ترۋدا» گازەتىنىڭ باس رەداكتورىنىڭ ورىنباسارى كوكەن ورشابەكوۆ سوڭعى ۋاقىتتا باسىلىمدار تاپتاۋرىن ۇردىستەن الشاقتاپ, جاڭاشىلدىققا ۇمتىلىپ, شىعارماشىلىق ىزدەنىس ۇستىندە ەكەندىگىن تيەك ەتىپ, وڭىردە ءورىستىلدى ماماندارعا دەگەن تاپشىلىق سەزىلىپ وتىرعاندىعىن ايتتى. جاس جۋرناليستەردىڭ كاسىبي ءبىلىمىن شىڭداپ, تانىمدىق كوكجيەگىن ارتتىرۋ جايىن «جامبىل – تاراز» گازەتىنىڭ ديرەكتور-باس رەداكتورىنىڭ مىندەتىن اتقارۋشى ەرمان ابديەۆ قاۋزادى.
– جاستاردى جۋرناليستيكاعا تارتۋ, ولاردى ىنتالاندىرىپ, اقپاراتتىق قولداۋ كورسەتۋ ءبىزدىڭ ۇجىمنىڭ باستى نازارىندا. اۋليەاتا ءوڭىرى جۋرناليستيكاسىندا ءبىز اعا بۋىن مەن جاس تولقىننىڭ اراسىنداعى بايلانىستىڭ ارتا تۇسۋىنە ءاردايىم نيەتتىمىز. وسى تاقىلەتتەس جيىندار داستۇرگە اينالىپ, وعان تەك اعا بۋىن جۋرناليستەر عانا ەمەس, الداعى ۋاقىتتا جاس تىلشىلەر دە تارتىلسا دەگەن تىلەگىمىز بار, – دەپ اتاپ ءوتتى ە. ابديەۆ.
سونداي-اق, باسقوسۋ بارىسىندا رەسپۋبليكالىق «حابار» تەلەارناسىنىڭ جامبىل وبلىسىنداعى مەنشىكتى ءتىلشىسى نۇرجان مەرگەنباي, رەسپۋبليكالىق «كازاحستانسكايا پراۆدا» گازەتىنىڭ ايماقتاعى مەنشىكتى ءتىلشىسى ميحايل تە, «اراي» جاستار گازەتىنىڭ باس رەداكتورىنىڭ ورىنباسارى تۇرسىنبەك سۇلتانبەك جانە وزگە دە جيىنعا قاتىسۋشىلار تاقىرىپ توڭىرەگىندە پايىمدى پىكىرلەرىن ءبىلدىرىپ, كەلەلى ويلارىمەن ءبولىستى.
دوڭگەلەك ۇستەل سوڭىندا ينستيتۋت رەكتورى داريا قوجامجاروۆا قۇرىلعانىنا بيىل ەلۋ جىل تولىپ وتىرعان وقۋ ورنىنىڭ باعىندىرعان بەلەستەرى مەن كەلەشەك جوسپارلارى جايىندا اڭگىمەلەپ, بۇگىندە ماسس-مەديا زاماناۋي مەملەكەت دامۋىنىڭ نەگىزگى كورسەتكىشىنە اينالىپ وتىرعاندىعىن ايتتى.
– جۋرناليستەر ەڭبەگىنىڭ ماڭىزدىلىعىنىڭ قانداي ەكەندىگى كوزىقاراقتى ازاماتتاردىڭ بارشاسىنا بەلگىلى. ويتكەنى, گازەت ماتەريالدارى, تەلە جانە راديو باعدارلامالارى قوعامدىق پىكىر مەن قۇندىلىقتاردى قالىپتاستىرادى. ءبىزدىڭ جەمىستى ىنتىماقتاستىعىمىز الداعى ۋاقىتتا دا ادەتتەگىدەي ساليقالى ءوزارا ءتيىمدى قارىم-قاتىناستا بولاتىنىنا سەنىمىم كامىل. تاراز مەملەكەتتىك پەداگوگيكالىق ينستيتۋتىنىڭ قىزمەتىن جان-جاقتى كورسەتۋدەگى قولداۋلارىڭىز بەن كاسىبي شەبەرلىكتەرىڭىز ءۇشىن العىسىمدى بىلدىرەمىن, – دەدى د. قوجامجاروۆا.
سونىمەن قاتار, ينستيتۋت باسشىسى ءبىر توپ جۋرناليستەردى «تاراز مەملەكەتتىك پەداگوگيكالىق ينستيتۋتىنىڭ 50 جىلدىعى» مەرەكەلىك مەدالىمەن ماراپاتتاپ, سىي-سياپات كورسەتتى.
– قازىرگى كۇندە بايلانىس پەن اقپارات كۇندەلىكتى ءومىرىمىزدىڭ بارلىق سالاسىنا دەندەپ ەنىپ, اينىماس بولشەگىنە اينالدى. البەتتە, «ايشىلىق الىس جەرلەردەن جىلدام حابار العىزعان» ولاردىڭ ءرولى قاي كەزەڭدە دە, قاي ۋاقىتتا دا ەرەكشە ءرول اتقارعانى ءمالىم, دەسە دە 21 عاسىردا ماڭىزدىلىعى ايرىقشا ارتا ءتۇستى. وسى ورايدا جالپى جۋرناليستيكانىڭ ماسەلەسى ءبىر توبە دە, ايماقتىق جۋرناليستيكانىكى ءبىر توبە ەكەندىگىن ايتقان ءلازىم. پەداگوگيكالىق وقۋ ورنى جامبىلدىق جۇرتشىلىقتىڭ «كوزى, قۇلاعى ءھام ءتىلى» بولىپ جۇرگەن وڭىرلىك ءباسپاسوزدى ودان ارمەن دامىتۋ جايىن قاۋزايتىن جيىنداردى ءتۇرلى تاقىرىپ اياسىندا ۇيىمداستىرىپ, جۋرناليست قاۋىمىنىڭ باسىن قوسىپ وتىرۋدى داستۇرگە اينالدىرۋدى كوزدەپ وتىر, – دەيدى تارمپي-دىڭ اقپاراتتىق-يميدجدىك قىزمەتىنىڭ جەتەكشىسى جاندار اسان.
