دۋالدى وقۋ جۇيەسىن جەتىلدىرۋ ارقىلى ءبىلىم ورىندارى اراسىندا تاجىريبە الماسۋدى ماقسات ەتكەن سەمينارعا «كاسىپقور» حولدينگى مۇرىندىق بولعان. «تەحنيكالىق جانە كاسىپتىك ءبىلىم بەرۋ جۇيەسىنىڭ مازمۇنىن جاڭعىرتۋ ارقىلى قازاقستاننىڭ اگروونەركاسىپ كەشەنىنە ارنالعان كادرلاردى دايارلاۋدىڭ يننوۆاتسيالىق جولدارى» تاقىرىبىندا وتكەن سەمينار-پراكتيكۋمدا ەلىمىزدەگى كوللەدجدەردە يننوۆاتسيالىق ءبىلىم بەرۋ تەحنولوگيالارىن, ونىڭ ىشىندە, وقىتۋ مازمۇنىنا مودۋلدىك-قۇزىرەتتىلىك ءتاسىلدى قولدانۋ, كرەديتتىك-مودۋلدىك تەحنولوگيانى, ارنايى پاندەردى اعىلشىن تىلىندە وقىتۋ, بەيىندى ماماندىعى بويىنشا كادرلار دايارلاۋداعى زاماناۋي تاسىلدەمەلەر, قولدانبالى باكالاۆرياتتى ەنگىزۋ مەن ىسكە اسىرۋ ماسەلەلەرى تالقىلاندى. سونداي-اق, قاتىسۋشىلار كاسىپتىك كوللەدجدەردە يننوۆاتسيالىق ءبىلىم بەرۋ تەحنولوگيالارىن كىرىكتىرۋ بويىنشا پىكىر الماستى. كوللەدجدىڭ وقۋ-وندىرىستىك بازاسىندا بولىپ, شاكىرتتەرگە جاسالعان مۇمكىندىكتەردەن, وي ءتۇيىپ قايتتى. وقۋ-وندىرىستىك بازاسىنىڭ وي سالاتىنىنداي-اق بار. ەلىمىزدىڭ باسقا وڭىرلەرىندەگى اگروتەحنيكالىق باعىتتاعى وقۋ ورىندارىنىڭ ديرەكتورلارى وڭتۇستىكتەگى ارىپتەستەرىنىڭ ءىسىن ۇلگى الارلىق رەتىندە باعالادى.
مىسالى, «كاسىپقور» حولدينگ» كەاق باسقارما توراعاسىنىڭ ورىنباسارى ءا.بيمەندينا اۋىل شارۋاشىلىعى سالاسىنا ماماندار دايارلاۋدا تەحنيكالىق جانە كاسىپتىك ءبىلىم بەرۋدىڭ ماڭىزدىلىعىنا توقتالىپ, وعان وبلىس اكىمدىگى جان-جاقتى قولداۋ كورسەتىپ كەلە جاتقانىن اتاپ ءوتتى. وسى ارادا ايتا كەتەلىك, كوللەدجدەگى ءبىلىم ساپاسىنىڭ جاقسارۋىنا, زاماناۋي جابدىقتالۋىنا سىڭىرگەن ەڭبەگى جوعارى باعالانعان وقۋ ورنىنىڭ ديرەكتورى ك.تولەباەۆ ۇلتتىق بيزنەس رەيتينگتەر وداعى اتىنان بەرىلەتىن «سالا كوشباسشىسى» التىن قىران بەلگىسىمەن جانە ءبىلىم سالاسىنىڭ بەدەلىن ارتتىرۋداعى جەكە ۇلەسى ءۇشىن «ۇزدىك باسشى» سەرتيفيكاتىمەن ماراپاتتالعان بولاتىن. ال وتكەن جىلى كوكتەمدە شىمكەنت اگرارلىق كوللەدجى ەلىمىزدە ۇزدىك ون كوللەدجدىڭ قاتارىنا ەندى.
راسىندا, كوللەدج ديرەكتورى, اۋىل شارۋاشىلىعى عىلىمدارىنىڭ كانديداتى كەنجەحان تولەباەۆتىڭ ۇيىمداستىرۋىمەن بەس جارىم گەكتارعا سالىنعان وقۋ بازاسىندا تاجىريبە جۇمىستارىن جۇرگىزۋگە تولىق جاعداي جاسالعان. ەڭ سوڭعى تەحنولوگيالاردى قولدانىپ سالىنعان جىلىجاي, ءجۇزىم, الما پلانتاتسيالارى بار. قىزاناق, بولگار بۇرىشى, بيداي, ارپا, جۇگەرى تاناپشالارىندا ستۋدەنتتەر ەڭبەك ەتىپ, مول تاجىريبە الۋدا. «ولاردى تامشىلاتىپ سۋارۋ ادىسىمەن كۇتىپ-باپتاۋدى اگرونوميا جانە ورمان شارۋاشىلىعى ءبولىمىنىڭ ستۋدەنتتەرى مەن وقىتۋشىلارى جۇرگىزىپ, تەوريالىق بىلىمدەرىن تاجىريبەمەن ۇشتاستىرادى. بۇل دا ءوز كەزەگىندە شاكىرتتەردىڭ ماماندىعىن تولىق مەڭگەرىپ, باسەكەگە قابىلەتتى جاقسى مامان بولىپ شىعۋىنا كومەكتەسەدى. ەڭبەكسۇيگىشتىككە, ادامگەرشىلىككە, ءوز ءىسىن جوسپارلاپ ءتيىستى ناتيجە الۋعا ۇمتىلىسىن ارتتىرىپ, ونى ءىس جۇزىندە قولدانۋعا نەگىز بولادى دەيدى كوللەدج ديرەكتورى ك.تولەباەۆ. وقۋ بازاسىنداعى زووتەحنيكا جانە مال دارىگەرى ماماندىعىنا وقىپ جاتقان ستۋدەنتتەرگە ارنالىپ سالىنعان سىنىپ بولمەلەرى ماتەريالدىق-تەحنيكالىق جابدىقتالۋى بويىنشا يننوۆاتسيالىق ءبىلىم تەحنولوگياسىنا تولىق جاۋاپ بەرەدى. جوعارى ءونىمدى جۇمىس جاساۋ ءۇشىن سوڭعى ۇلگىدەگى زاماناۋي ەلەكتروندى قۇرال-سايماندار الىنعان. اۋرۋ مالدارعا ناقتى دياگنوز قويۋعا مۇمكىندىك بەرەتىن ۋلترادىبىستى تولقىندارمەن زەرتتەيتىن قۇرال-جابدىقتار, جاڭا سىيىمدىلىعىمەن مۇزداتقىشى جەتىلدىرىلگەن توڭازىتقىشتار, ءينۆازيۆتى اۋرۋلارعا قارسى اعزاداعى جۇمىر قۇرتتاردى دۇرىس اجىراتۋعا مۇمكىندىك بەرەتىن ۇلكەندى-كىشىلى زەرتحانالاردىڭ بارلىعىندا دەرلىك قولدانىلاتىن تريحينەلوسكوپ اپپاراتى, ءسۇتتىڭ مايلىلىعىن جانە قىشقىلدىعىن تەكسەرەتىن «لاكتان» اتتى قۇرىلعى, تاعى دا باسقا وقۋ-تاجىريبە ساباعىنا قولداناتىن زەرتحانالىق جابدىقتارمەن تولىق قامتاماسىز ەتىلگەن.
ارنايى مال تۇراقتارى سالىنىپ, وندا ءتورت ت ۇلىك مال مەن قوياندار جانە زەرتحانالىق جانۋارلار ورنالاسقان. كوللەدجدە 15 ماماندىق بويىنشا دايىندالاتىن ستۋدەنتتەردىڭ تۇگەلگە جۋىعى «40 پايىز تەوريا, 60 پايىز تاجىريبە» ءادىسى ارقىلى ءبىلىم مەن ەڭبەكتى ۇشتاستىرۋدا. اتالعان وقۋ بازاسىندا اۋىلشارۋاشىلىق مەحانيكتەرىن دايارلايتىن ءبولىم ءۇشىن ارنايى جاساقتالعان اۆتوتۇراق جانە تسەح تا بار. تەحنيكانىڭ سوڭعى تۇرلەرىمەن قالاي جۇمىس جۇرگىزۋدى ۇيرەنۋگە تولىق جاعداي جاسالعان. سونداي-اق, سالىنعانىنا قىرىق جىلدان استام ۋاقىت ءوتىپ توزۋعا اينالعان بەس قاباتتى ستۋدەنتتەر جاتاقحاناسى كۇردەلى جوندەۋدەن وتكىزىلىپ, بولمەلەرى جاڭا جيھازدارمەن جابدىقتالىپتى. بۇرىنعى ۇلكەن اسحانا دا كەشەندى كۇردەلى جوندەۋدەن ءوتىپ, كونسەرۆىلەۋ جانە تاماق ونەركاسىبى ماماندارىن دايىنداپ جاتقان بولىمگە وقۋ-تاجىريبە جۇمىستارىن, زەرتحانالىق ساباق وتكىزەتىن وقۋ كەشەنى رەتىندە پايدالانۋعا بەرىلگەن. وقۋ عيماراتىنىڭ الدىندا ەگىلگەن داقىلداردى ستۋدەنتتەردىڭ وزدەرى باقىلايدى, وڭدەيدى. سىنىپ بولمەلەرىنىڭ بارلىعى باعدارلاماعا ساي جاڭا ينتەربەلسەندى تاقتالارمەن جابدىقتالىپ, عالامتور جۇيەسى ەنگىزىلگەن. ول ءوز كەزەگىندە جاڭا يننوۆاتسيالىق ءبىلىم تەحنولوگيالارىن تولىعىمەن ەنگىزۋگە مۇمكىندىك بەرەدى. مىنە, وسىنداي جانە باسقا دا جوعارى دەڭگەيدەگى قامقورلىق ساپالى مامان دايارلاۋعا مول مۇمكىندىك بەرۋدە.
ايتپاقشى, سەمينار-پراكتيكۋم بارىسىندا «امانگەلدى» جشس توراعاسى ن.قۇرالوۆ شارۋاشىلىق جىلىجايلارىندا تامشىلاتىپ سۋارۋ ادىسىمەن جۇمىس ىستەيتىن مامان جوقتىعىن ايتتى. بۇل ورايدا, كوللەدجدىڭ «وسىمدىك شارۋاشىلىعى» بولىمىندە جىلىجايدا جاڭا تەحنولوگيامەن جۇمىس ىستەيتىن ماماندار دايارلانۋدا ەكەن. ياعني, كوللەدج تۇلەكتەرى سۇرانىسقا يە.
عالىمجان ەلشىباي,
«ەگەمەن قازاقستان»
