باسقوسۋدىڭ رەسمي بولىمىندە ەلىمىزدىڭ ينۆەستيتسيالار جانە دامۋ ءمينيسترى جەڭىس قاسىمبەك گەرمانيا وكىلدەرىن ۇلتتىق كۇنىمەن قۇتتىقتاپ, جىلى لەبىزىن جەتكىزدى. سودان كەيىن ەكسپو كورمەسىنىڭ وسى كۇنىنىڭ باستى قوناعى گەرمانيا پرەزيدەنتى فرانك-ۆالتەر شتاينمايەر ءسوز سويلەدى. ول حالىقارالىق شارا عيماراتتارىنىڭ فۋتۋريستىك باعىتتا سالىنعانىن ايتىپ, بۇل قازاقستاننىڭ بولاشاققا دەگەن جوعارى ۇمتىلىسىن بىلدىرەتىنىن اڭگىمەلەدى. سونداي-اق, گەرمانيا كورمە بارىسىندا «جاسىل» تەحنولوگيالار سالاسىنداعى تاجىريبەسىمەن بولىسەتىنىن اتاپ ءوتتى. «ەلىمىزدە بۇكىل ەلەكتر ەنەرگيا كولەمىنىڭ ۇشتەن ءبىرى جاڭعىرتىلاتىن قۋات كوزدەرىنەن وندىرىلەدى. ءبىزدىڭ تەحنولوگيالىق تاجىريبەمىز مول. بۇل ءبىزدىڭ جەتىستىگىمىز جانە ونى ەكسپو كورمەسىندە بارشاعا كورسەتكىمىز كەلەدى», دەدى فرانك-ۆالتەر شتاينمايەر.
مارتەبەلى مەيمان قازاقستانداعى ماڭىزى جوعارى كورمەنىڭ قوناقتارى سانى كوپ بولۋىن جانە ولاردىڭ شاراعا كوڭىلى تولۋىن تىلەپ, ىستىق ىقىلاسىن ءبىلدىردى. «ەكسپو پىكىرتالاس پەن يدەيالار ورتاسىنا, ۇزدىك شەشىمدەردىڭ باسەكە الاڭىنا, كەلىسىمدەر جاسالاتىن قالاشىققا اينالاتىنىنا سەنەمىن. ءبىز قازاقستانمەن ورتاق ماقساتتاردى ءبولىسىپ وتىرمىز, ەندى سىزدەردىڭ جەتىستىكتەرىڭىزبەن دە بولىسكىمىز كەلەدى. ەلدەرىمىزدىڭ بولاشاعى زور بولىپ, تۇراقتى ەنەرگەتيكاعا جەتەيىك», دەدى گەرمانيا پرەزيدەنتى.
جيىن گەرمانيا پاۆيلونىندا نەمىس بەينە ءارى مەديا سۋرەتشىسى ماكس حاتتلەردىڭ تۋىندىلارى قويىلعان كورمەمەن جالعاستى. ولار ءتول مەرەكەلەرىن 16 شىلدەگە دەيىن اتاپ وتپەك.
نەمىس حالقى كورمەدە ەكى جانە ءتورت دوڭگەلەكتى ەلەكتر كولىكتەرى مەن قۋات وندىرە الاتىن «اقىلدى ۇيلەر» سەكىلدى بىرنەشە جوبا ۇسىنعان.
