قاراعاندى وبلىسىنىڭ اكىمى ەرلان قوشانوۆتىڭ قاتىسۋىمەن وتكەن جيىندا ماڭىزدى ماسەلەلەر تالقىلاندى. قالا بالقاش كولىنىڭ جاعاسىندا ورنالاسقاندىقتان, ونداعى شاعىن جانە ورتا كاسىپورىندار تۋريزم سالاسىندا جۇمىس ىستەيدى. بىراق سوڭعى كەزدەرى بالقاشقا قاتىناۋ قيىنداپ كەتكەن.
- 2016 جىلى قاراعاندى-بالقاش-قاراعاندى باعىتىنداعى تەمىرجول قۇرامى الىنىپ تاستالدى,- دەدى قالا اكىمى الەكساندر اگليۋلين. - بالقاش قالاسىنا تۋريستەر كوپتەپ كەلەتىنىن ەسكەرە, جانە قالا تۇرعىندارىنىڭ ءوتىنىشى بويىنشا وسى باعىتتاعى قۇرامدى قايتا قالپىنا كەلتىرۋ قاجەت. جانە دە بالقاش-ماسكەۋ باعىتى بويىنشا تىركەلمەلى ۆاگوندى قوسۋ قاجەت. قىسقى ۋاقىتتا اۆتوجول جابىق بولاتىندىقتان, قاراعاندى-بالقاش-قاراعاندى پويىزىنا قوسىمشا ۆاگوندار قوسۋ كەرەك.
سونىمەن قاتار قالا اكىمى بالقاش اۋەجايىنىڭ («جەزقازعان ەير» اق بولىمشەسى) ۇشۋ-قونۋ جولاعىن قالپىنا كەلتۋرى كەرەكتىگىن ايتتى. بۇل ۇشۋ-قونۋ جولاعى قر قورعانىس مينيسترلىگىنىڭ بالانسىندا. 2007 جىلى جارتىلاي جوندەۋ جۇمىستارى جاسالعان.
- بالقاش قالاسىنا, ونىڭ ىشىندە ەحرو مەن قالانىڭ 80-جىلدىق مەرەيتويىن وتكىزۋ كەزىندە تۋريستەردىڭ كوپتەپ كەلۋىنە بايلانىستى جانە جاعاجاي ءتۋريزمىن دامىتۋ ماقساتىندا اۋەجايدىڭ ۇشۋ-قونۋ جولاعىنا تولىق جوندەۋ جۇمىستارىن جۇرگىزۋ قاجەت,- دەپ قوستى الەكساندر اگليۋلين.- جانە دە انتيتەررورلىق قاۋىپسىزدىكتى كۇشەيتۋ ماقساتىندا تەكسەرىس قۇرىلعىلارىن ورناتقان ءجون. بۇل جونىندە ءبىز ازاماتتىق اۆياتسيا كوميتەتىنە بىرنەشە مارتە وتىنىشتەر جولداعانبىز, الايدا ازىرگە ەش ناتيجە بولماي تۇر.
سونىمەن قوسا جيىن بارىسىندا شاعىن جانە ورتا بيزنەس ماسەلەلەرى دە تالقىلاندى. كوبىنە كاسىپكەرلەر بانكتەر كەپىلدىك م ۇلىك باعاسىنىڭ تومەن بولۋىنا وراي جوبالار قارجىلاندىرىلمايتىندىعانا شاعىمداندى. وسى بالقاش قالاسى كاسىپكەرلەرىنىڭ باستى ماسەلەسى.
- اۋىل شارۋاشىلىعى باسقارماسىنا بالقاش قالاسىن جانىنداعى اۋىلدارمەن قوسا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى بويىنشا «قاراعاندى وبلىسىنىڭ قارجىلاي كومەك قورى» اق ارقىلى نەسيەلەندىرىلەتىندەر تىزىمىنە ەنگىزۋگە قاتىستى حات جولداندى. بۇل اۋىلدا وتباسىلىق جانە جەكە بيزنەستى دامىتۋعا جول اشادى,- دەدى قالا اكىمى.
وسى ورايدا ايتا كەتەيىك, «بالقاش ءسۇت» كومپانياسىنىڭ وكىلدەرى اۋىل شارۋاشىلىعى ءوندىرىسى سالاسىندا شيكىزاتتىڭ جەتىسپەۋشىلىگىنە شاعىمداندى. كاسىپورىننىڭ جوبالىق قۋاتتىلىعى 300 توننا ءسۇتتى قايتا وڭدەۋگە ەسەپتەلگەن, الايدا بۇگىنگى كۇنى كاسىپورىن تەك 30 توننا شيكىزاتتى قايتا وڭدەۋدە.
- اۋىل كووپەراتيۆتەرى قايدا؟ مەن ۇنەمى وندىرۋشىلەردەن شيكىزاتىمىزدى وتكىزەتىن جەرلەر جوق دەگەندى ەستيمىن. ال مىندا كاسىپورىن قۋاتتىلىعىنىڭ تەك 10 پايىزىن عانا پايدالانۋدا,-دەدى ايماق باسشىسى.-مەن اۋىل شارۋاشىلىعى باسقارماسىنا شەت جانە اقتوعاي اۋداندارى مەن بالقاش قالاسىنىڭ اكىمدەرىمەن, جانە دە اۋىل شارۋاشىلىعى ونىدەرىن وندىرۋشىلەر جانە قايتا وڭدەۋشىلەرمەن بىرلەسە جيىن وتكىزۋدى تاپسىرامىن. مۇنداي ماسەلەلەردى تالقىلاپ, ولاردى شەشۋ جولدارىن قاراستىرۋ كەرەك.
ايماق باسشىسى بۇل ماسەلەلەردىڭ بارلىعىن جەتە قاراۋعا ۋادە بەردى. اۋەجايدىڭ ۇشۋ-قونۋ جولاعىن قالپىنا كەلتىرۋ بويىنشا قورعانىس مينيسترلىگىمەن كەلىسسوزدەر جۇرگىزىلەتىن بولادى.
