بۇل جاعداي مارقۇمنىڭ تۋما-تۋىسقاندارى تاراپىنان تۇسىنبەستىك تۋعىزدى. ولار بۇل ماسەلەگە بايلانىستى تۋىسقانىنىڭ اعزا مۇشەلەرى بىرەۋلەرگە ساتىلىپ كەتكەن جوق پا ەكەن دەگەن كۇدىك كەلدىردى. ترانسپلانتاتسياعا قاتىستى ەل-جۇرت اراسىندا الىپقاشپا اڭگىمەنىڭ تارالۋىنا سەبەپكەر بولعان جايتكە بايلانىستى ترانسپلانتاتسيا بويىنشا ەلىمىزدەگى ۇيلەستىرۋ ورتالىعىنىڭ ديرەكتورى جاقسىلىق دوسقاليەۆ پەن اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ egemen.kz ءتيىستى تۇسىنىكتەر بەردى. ولاردىڭ مالىمدەۋىنشە ادامنىڭ ميى جۇمىس ىستەۋىن توقتاتقاننان كەيىن قر-نىڭ «حالىق دەنساۋلى جانە دەنساۋلىق ساقتاۋ جۇيەسى تۋرالى» كودەكسىنىڭ ءتيىستى باپتارى مەن تارماقتارى زاڭ جۇزىندە رۇقسات بەرەدى. تەك بۇل ءۇشىن ومىردەن ءوتىپ كەتكەن ادام: بۇعان قارسىمىن دەپ الدىن الا ارىز جازىپ كەتپەسە بولعانى. بۇلاي بولماعان جاعدايدا حيرۋرگ-دارىگەرلەر باقيلىق بولعان كىسىنىڭ تۋما-تۋىسقاندارىنان رۇقسات سۇراماي-اق دەنە مۇشەلەرىن الا بەرەدى, - دەدى بريفينگتە تۇسىنىك بەرۋشىلەر.
اتاپ ايتقاندا جاقسىلىق دوسقاليەۆ, بۇل بۇرىننان بار تاجىريبە ەكەنىن العا تارتىپ, الىپقاشپا اڭگىمە ءتۇسىندىرۋ جۇمىستارىنىڭ كەمشىلىگىنەن بولعانىن ايتىپ بەردى. مۇنىڭ ءبارى تيىستى زاڭ اياسىندا جۇزەگە استى دەپ ءتۇيىن جاسادى ول. سولاي بولا تۇرسا دا ومىردەن وتكەن اعايىنىن دونور ەتۋ ارقىلى ءتىرى جاندارعا وتا جاساعان دارىگەرلەر بۇل جاعداي تۋرالى بىزگە حابارلاپ ەسكەرتپەگەنى قالاي دەگەن مارقۇمنىڭ تۋما-تۋىسقاندارىنىڭ ءۋاجى دە ورىندى دەپ بىلەمىز.
تەمىر قۇسايىن
