«كىتاپحانا» ارت-گالەرەياسى مەن اۋەزحان قودار اتىنداعى زياتكەرلىك كلۋبى قازاقستاندىق ارت-قاۋىمداستىقتىڭ تۋىندىلارىن كوپشىلىككە كەڭىنەن تانىستىرۋ ماقساتىندا وتكەن كورمەدە تاقىرىبى, جانرى جانە ءستيلى سان الۋان سۋرەتشىلەردىڭ ايرىقشا تۋىندىلارى كوپشىلىك نازارىنا ۇسىنىلدى. وتاندىق التى بىردەي اۆتوردىڭ كەسكىندەمە, گرافيكا, كەستەلەنگەن كارتينا, ساندىك-قولدانبالى ونەر سياقتى ءداستۇرلى بەينەلەۋ ونەر تۇرلەرىمەن قاتار, ينستاللياتسيا, سومداۋ سياقتى جاڭا تۇرلەرى دە ونەرسۇيەر قاۋىمعا تانىستىرىلدى.
قازاقستاندىق بەينەلەۋ ونەرىنىڭ تالانتتى وكىلدەرىن تەك ەلىمىزگە عانا ەمەس, الەمگە دە تانىتۋ ماقساتىندا كوپتەگەن ءىس-شارالار اتقارىلا باستاعانىن ايتقان «كىتاپحانا» ارت-گالەرەياسىنىڭ جەتەكشىسى دينا دوسپولوۆا: «قازىرگى ۋاقىتتا تەك بەينەلەۋ عانا ەمەس, باسقا دا ونەر تۇرلەرىنە, سول ونەر يەلەرىنىڭ ۇلتتىق سيپاتتاعى ايرىقشا تۋىندىلارىنا دەگەن كوپشىلىك نازارىن حالىقارالىق دەڭگەيگە كوتەرۋ ارقىلى مادەنيەتىمىزبەن قاتار, ەكونوميكامىزدى دا كوتەرە تۇسۋگە مۇمكىندىك بار», دەدى.
كورمەگە جينالعان قاۋىم تۋىندىلارى پاريجدەگى ايگىلى لۋۆر مۇراجايىنىڭ كورمە زالدارىنا قويىلعان جاس سۋرەتشى-پەيزاجيست, الەمنىڭ ايتۋلى بايقاۋلارىنىڭ جەڭىمپازى انار ءابجانوۆانىڭ ەڭبەكتەرىمەن قاتار, ەجەلگى قازاق كەستەسىنىڭ نەگىزىندە جاڭا ونەر ءتۇرى سانالاتىن ء«بىز كەستەنى» ويلاپ تابۋشى زەينەلحان مۇحامەدجاننىڭ دا جۇمىستارىن تاماشالادى. سونداي-اق, سۋرەتشى-زەرگەر ءارى ءمۇسىنشى سەرجان ءباشيروۆتىڭ سۇيىكتى كومپوزيتسيالىق ءتاسىلى – اعاشتاردى ءتۇرلى تاسىلمەن ءارى قاراما-قارسى فاكتۋراداعى كۇمىس, تاس, سۇيەكتەرمەن ۇيلەستىرە قولدانعان ەڭبەكتەرى دە كەلۋشىلەردىڭ ىستىق ىقىلاسىنا بولەندى.
اۆتورلىق تەحنيكاسىنىڭ ارقاسىندا تانىمال بولعان كەسكىندەمەشى ورازبەك ەسەنباەۆتىڭ دا قورشاعان ورتانىڭ دالمە-ءدال كوشىرمەسىن بەرە ءبىلۋ قابىلەتى, پوەتيكالىق شىعارماشىلىعى ەجەلگى ۇيعىر حالقىنىڭ ساندىك اسقاباقتاردان قۋىرشاق جاساۋ ونەرىنەن باستاۋ الاتىن ۇيعىر سۋرەتشىسى حاشيم قۇربانوۆ كەسكىندەمەلەرى, ءمۇسىنشى, ديزاينەر ارمان بايمۇراتوۆتىڭ شىعارماشىلىق ناقىشى, رەاليزم مەن ابستراكتسيانىڭ توعىسۋىنان تۋىنداعان جۇمىستارى دا كوپشىلىكتى ءتانتى ەتتى.
ميرا بايبەك,
«ەگەمەن قازاقستان»
الماتى
