ەسەپ بەرۋدىڭ بىرنەشە رەجيمدە وتكەنىن ايتا كەتۋ ءلازىم. زالعا جينالعان حالىقتان تىس ينتەرنەت ارقىلى جانە ءار وبلىس ورتالىقتارىمەن تىكەلەي ونلاين بايلانىس ورناعان جيىندا حالىققا ەسەپ بەرگەن مينيستر بايانداماسىندا سالاعا قاتىستى كوپتەگەن ماسەلەلەر تياناقتى قامتىلىپ, بارلىق قويىلعان ساۋالدارعا ناقتى جاۋاپتار قايتارىلدى.
ماسەلەن, مينيستر جىل سايىنعى ۆاكتسيناتسيادان باس تارتاتىن ازاماتتار قاتارى از ەمەستىگىن العا تارتتى. حالىقتىڭ باسىم بولىگى ۆاكتسيناتسيانى قولداعانىمەن, ءدىني كوزقاراستارىنا بايلانىستى بالالارىنا ەكپە سالۋدان باس تارتاتىنداردىڭ كوبەيۋ ءۇردىسىنىڭ قاۋىپتىلىگىنە توقتالدى. اتاپ ايتقاندا, سوڭعى بەس جىلدىڭ ىشىندە ونداي ازاماتتاردىڭ سانى 3 مىڭنان 9,7 مىڭعا وسكەن كورىنەدى. بۇدان تىس ۆاكتسينادان باس تارتۋدىڭ ەندىگى ءبىر سەبەبى رەتىندە, باق ارقىلى تاراعان ۆاكتسينانىڭ ساپاسىنا كۇدىكتەندىرەتىن جاعىمسىز اقپاراتتىڭ اسەرى بولۋدا, دەگەن ول شاراعا قاتىسۋشىلارمەن قاتار ونى ونلاين رەجيمدە تىڭداپ وتىرعان بارلىق ادامداردى ۆاكتسيناتسيا ماسەلەسىنە سالعىرت قاراماۋعا شاقىردى, «ۆاكتسيناتسيادان باس تارتۋدىڭ بالا بولاشاعىنا زياندى اسەرىن ەستەن شىعارماڭىزدار. مينيسترلىك ۆاكتسيناتسيا ماسەلەسىن جان-جاقتى ءتۇسىندىرىپ كەلەدى. سوعان قاراماستان, ەكپەدەن باس تارتىپ جاتقاندار از ەمەس. بۇل رەتتە قوعامدىق دەنساۋلىقتى ساقتاۋ قىزمەتتەرى وسى جۇمىسپەن الدە دە تىعىز اينالىسۋى قاجەت», دەپ اتاپ كورسەتتى مينيستر.
ءومىر ءسۇرۋ جاسىنىڭ ۇزارۋىنا, انا مەن بالا ءولىمىنىڭ ازايۋىنا قاتىستى وڭ دەرەكتەردى سويلەتكەن مينيستر سوزىلمالى ناۋقاستارمەن اۋىراتىن پاتسيەنتتەرگە قاتىستى وتە ءبىر ۇلكەن ماسەلەنى باسا ايتقان. جەدەل جاردەم قىزمەتىنە جۇگىنگەندەردىڭ دەرەگىن جەتكىزگەن مينيستر كوپ جاعدايدا شاقىرعانداردىڭ باسىم بولىگىندە اۋرۋدىڭ اسقىنىپ كەتۋى تىركەلگەنىن, تۇرعىنداردىڭ ءوز دەنساۋلىقتارىنا جوندەپ قاراماي, ساۋىقتىرۋ شارالارىن جيىپ قويىپ, اۋىرىپ جۇرسە دە, ەمxاناعا بارمايتىنىن, سونىڭ سالدارىنان جەدەل جاردەم قىزمەتىنە كوپ سالماق تۇسەتىنىن تىلگە تيەك ەتتى. قوڭىراۋلار كوبەيگەن سايىن جەدەل جاردەمنىڭ جۇمىسى دا قاۋىرت بولادى. سودان بارىپ, جەدەل قىزمەتتىڭ كەلىپ جەتۋ ۋاقىتى دا ۇزارادى دەگەن ە.ءبىرتانوۆ دامىعان مەملەكەتتەردە جەدەل كومەك 15 مينۋتتا جەتسە, بىزدە ول ءالى 31 مينۋتتى قۇراپ وتىرعانىن جەتكىزدى. «ورىن العان بىزدەگى ولقىلىقتىڭ باستى سەبەپتەرىن ايتتىم. ال ونى اۋىزدىقتاۋ ءۇشىن ءبىز جاڭا بۇيرىقتىڭ جوباسىن دايىنداپ قويدىق. وندا جەدەل جاردەمنىڭ ناقتى قىزمەتتەرى كورسەتىلەدى. جەدەل جاردەم جەدەل قىزمەتپەن اينالىسۋى شارت. ءبىز سوعان كەلۋىمىز كەرەك», دەدى ول.
ادامدار دەنساۋلىعىنىڭ كۇزەتىندەگى تاعى ءبىر قۇلاق تۇرەردەي جاڭالىق – ايەلدەرگە قاتىستى. اياعى اۋىر كەلىنشەكتەردىڭ تىركەۋگە ۋاقىتىندا تۇرماۋىنا بايلانىستى ارنايى ءموبيلدى قوسىمشا ازىرلەنىپ جاتقانىنان حاباردار ەتكەن مينيستر ءموبيلدى قوسىمشانىڭ قاراعاندى وبلىسىندا پيلوتتىق رەجىمدە ىسكە قوسىلعانىن, ال ونى ۇيالى تەلەفونعا تەگىن جۇكتەپ الۋعا بولاتىنىن جانە جىلدىڭ اياعىنا دەيىن تاعى بىرنەشە ايماقتا ىسكە قوسۋ كوزدەلىپ وتىرعانىن جەتكىزدى.
زالدان قويىلعان ساۋالداردىڭ بىرىندە دارىگەرلەردىڭ دياگنوز قويۋداعى شالالىعى ءسوز بولدى. وعان جاۋاپ بەرگەن مينيستر دارىگەر ماماندىعىن تاڭداعان تۇلەكتەردىڭ ءبىلىمىن جوعارى وقۋ ورنىن بىتىرگەن كەزدە عانا ەمەس, وقۋ ۋاقىتىندا دا قاتاڭ باقىلاۋدى كوزدەيتىن ماسەلەنى قاراستىرىپ جاتقانىن ايتىپ ءوتتى. بۇل ءۇشىن ستۋدەنتتى ءبىرىنشى-ەكىنشى كۋرستى بىتىرگەن سوڭ جاقسىلاپ تۇرىپ ىرىكتەۋ قاجەت. بۇل – xالىقارالىق تاجىريبەدە بار دۇنيە. سوندىقتان, ستۋدەنتتەردىڭ ءبىلىمىن دەر كەزىندە انىقتاۋدىڭ ناتيجەسىندە جوو قابىرعاسىنان ساۋاتتى دا ساپالى دارىگەر شىعادى. سونىمەن قاتار, دارىگەرلەردىڭ بىلىكتىلىگىن تەكسەرۋ جۇمىسى دا كۇشەيتىلەدى دەگەن مينيستر گازەتىمىزدە كوتەرىلگەن ماسەلە, ديسپانسەرلىك ەسەپتەگى پاتسيەنتتەرگە جىلدىڭ باسىندا تەگىن دارىلەر بوساتىلۋىنىڭ تەندەردىڭ كەشىگۋىنە بايلانىستى قولدارىنا تيمەيتىندىگى جايىندا «دارىگە بايلانعان عۇمىر» اتتى ماقالاعا قاتىستى ناقتى جاۋاپ بەردى. «كوتەرىلگەن ماسەلە دۇرىس, بۇل جايىندا ارنايى زاڭ قابىلدانىپ, كەلەسى جىلدىڭ دارىلەرىن ساتىپ الۋ جۇمىستارى كۇز ايلارىنان باستالا بەرمەك. سوندا جىلدىڭ اياعىندا قۇجاتتار تەگىس ازىرلەنىپ بولىپ, دارىلەر بوساتىلۋىندا كەشىكتىرۋ ورىن المايدى دەپ ويلايمىز», دەگەن جاۋابىن بەردى.
انار تولەۋحانقىزى,
«ەگەمەن قازاقستان»
