جيىن بارىسىندا مينيستر ۆەدومستۆونىڭ وتكەن جىلعى قىزمەتى جانە بولاشاق جوسپارلارى تۋرالى بايانداپ, سان ءتۇرلى ساۋالدارعا جاۋاپ بەردى.
م.بەكەتاەۆ بايانداما بارىسىندا سوڭعى جىلدارى سالاعا قاتىستى بىرقاتار شارا قابىلدانعانىن تىلگە تيەك ەتتى. ولاردىڭ ىشىندە ۇلتتىق زاڭنامانى قالىپتاستىرۋ, قۇقىقتىق قىزمەت كورسەتۋدى ۇيىمداستىرۋ, زيياتكەرلىك مەنشىك قۇقىعىن قورعاۋ سالاسىندا مەملەكەتتىك ساياساتتى جۇزەگە اسىرۋ, اتقارۋشىلىق ءوندىرىستى قامتاماسىز ەتۋ, سوت-ساراپتاما قىزمەتىن ۇيىمداستىرۋ سياقتى ماڭىزدى ماسەلەلەر بار.
مينيستر ەسەپتىك كەزدەسۋلەردىڭ ءداستۇرلى ءپىشىمىن وزگەرتىپ, ءوز بايانداماسىن 3 توپقا ءبولىپ, ءتۇرلى ماسەلەلەردى قاراستىرۋ بويىنشا حالىق تاراپىنان ساۋال تىڭداۋدى ۇسىندى. ال ءوز بايانداماسىنىڭ ءبىرىنشى توپتاماسىن نورما شىعارۋشىلىق جانە مينيسترلىكتىڭ مەملەكەت مۇددەلەرىن شەتەلدە قورعاۋ قىزمەتىنە ارنادى. ول 2016 جىلعى زاڭ شىعارۋشىلىق جۇمىس جوسپارى تولىعىمەن ورىندالعانىن اتاپ ءوتتى.
پارلامەنتكە 18 زاڭ جوباسى ەنگىزىلدى. پرەزيدەنتتىڭ جانە ۇكىمەتتىڭ تاپسىرماسى بويىنشا بىلتىرعى جىلى جوسپاردان تىس 13 زاڭ جوباسى ازىرلەنىپ, پارلامەنتكە ەنگىزىلدى. دەپۋتاتتاردىڭ باستاماسىمەن 7 زاڭ جوباسى ازىرلەندى. ونى ازىرلەۋدەن باسقا ادىلەت مينيسترلىگى بارلىق نورماتيۆتىك- قۇقىقتىق اكتىلەرگە زاڭ ساراپتاماسىن جۇرگىزدى. بەلگىلى ءبىر نقا مازمۇنىمەن ازاماتتار «اشىق نقا» پورتالىندا تانىسۋعا جانە ۇسىنىستار بەرۋگە مۇمكىندىك العانىن ايتا كەتكەن ءجون. ادىلەت مينيسترلىگى زاڭ جوباسى قىزمەتىنىڭ ايقىندىعىنا جانە قوعامنىڭ الدىندا بارىنشا اشىق بولۋعا تىرىسادى», دەدى مينيستر.
سونداي-اق, ول بىلتىرعى جىلدىڭ قازان ايىنان باستاپ زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسياسىنىڭ وتىرىستارى باق قاتىسۋىمەن, ال بيىلعى جىلدىڭ ءساۋىر ايىنان باستاپ وتىرىستار ۆەدومستۆونىڭ سايتىندا تىكەلەي ەفيردە ءوتىپ جۇرگەنىن مالىمدەدى. «ۆاك مۇشەلەرىنىڭ الدىندا ەسەپ بەرگەن سوڭ بايانداماشىلار جۋرناليستەردىڭ سۇراقتارىنا جاۋاپ بەرەدى. بۇدان باسقا, ادىلەت مينيسترلىگى حالىققا زاڭ جانە باسقا دا قۇجاتتاردىڭ ماتىندەرىنە «نقا ەتالوندىق بانكى» جانە «ادىلەت» اقج ارقىلى ۇزدىكسىز تەگىن قول جەتكىزۋدى قامتاماسىز ەتەدى», دەدى ول.
ۆەدومستۆو باسشىسى بايانداماسىنىڭ ەكىنشى توپتاماسى كونستيتۋتسيالىق رەفورمانىڭ ىسكە اسىرىلۋى جونىندە, سونداي-اق ادىلەت مينيسترلىگىنىڭ جۇرگىزىپ جاتقان رەفورمالارىنا بايلانىستى بولدى. جانە دە ءبىزدىڭ مينيسترلىك زياتكەرلىك مەنشىك وبەكتىلەرى قۇقىعىن قورعاۋدى جەتىلدىرۋگە باعىتتالعان شارالار قابىلداۋدا, دەدى ماسەلەگە قاتىستى سوزىندە م.بەكەتاەۆ.
ادىلەت مينيسترلىگى ءۇشىن نەگىزگى پروبلەمالاردىڭ ءبىرى − ادۆوكاتتاردىڭ جەتكىلىكسىزدىگى. ۆەدومستۆو كورسەتىلگەن پروبلەمانىڭ بىرتىندەپ شەشىلۋىن جوسپارلاپ وتىر.
كەلەسى جىلى ءبىز كۇردەلى, بىراق قاجەتتى ادۆاكاتۋرا جانە نوتاريات ينستيتۋتتارىنىڭ رەفورمالاۋىنا كوشەمىز, دەدى مينيستر.
باياندامانىڭ ءۇشىنشى توپتاماسى قابىلدانعان زاڭداردىڭ اياسىندا وتكىزىلگەن جۇمىسقا, اتاپ ايتقاندا, سوت اكتىلەرىن ورىنداۋ جانە سوت ساراپتاماسى سالالارىنا ارنالادى. جەكە سوت ورىنداۋشىلار ينستيتۋتى ەنگىزىلگەلى 4,5 مىڭنان استام ليتسەنزيا بەرىلدى. قابىلدانعان شارالاردىڭ ارقاسىندا جەكە سوت ورىنداۋشىلار رەسپۋبليكانىڭ بارلىق اۋماقتارىندا, ءتىپتى اۋداندارىندا قىزمەت ەتىپ وتىر. ازاماتتاردىڭ ەرەكشە قيىندىققا تۇسكەن ساتتەردىڭ ءبىرى بەرەشەكتىكتىڭ كەسىرىنەن ەل اۋما-
عىنان شىعۋعا مۇمكىندىكتىڭ بولماۋى بولدى. كەيبىر كەزدەردە قانداي سەبەپپەن تىيىم سالىنعانى جونىندە ازاماتتاردىڭ وزدەرى دە بىلمەدى. بۇل ماسەلەنى شەشۋ ماقساتىندا مينيسترلىك «قازپوشتا» اق-پەن ءبىر مەزەتتە تىيىم سالۋ الىناتىن تەرمينالداردى ەنگىزۋ بويىنشا جۇمىستار اتقارۋدا. مۇنداي تەرمينالدار قازاقستاننىڭ بەس قالاسىندا, دالىرەك ايتساق, استانا, الماتى, قاراعاندى, اقتاۋ, شىمكەنتتە ورناتىلىپ, تەستىلەۋ رەجىمىندە قىزمەت ەتۋدە. جىل ىشىندە ولاردى ەلدىڭ بارلىق اۋەجايلارىندا ىسكە قوسۋدى جوسپارلاپ وتىرمىز, دەدى م.بەكەتاەۆ.
مينيستر كەزدەسۋگە كەلگەن ازاماتتاردىڭ, بەينەكونفەرەنتسيالىق بايلانىس ارقىلى ەلدىڭ باسقا ايماق تۇرعىندارىنىڭ جانە مينيسترلىكتىڭ سايتىنا كەلىپ تۇسكەن سۇراقتارىنا جاۋاپ بەردى.
راۋان قايدار,
«ەگەمەن قازاقستان»
