نۇرسۇلتان نازارباەۆقا موناكونىڭ ۇلتتىق پاۆيلونىندا ەنەرگەتيكالىق تۇرعىدا «جاسىل ەكونوميكاعا» ءوتۋدىڭ پروبلەمالارىنا ارنالعان ەكسپوزيتسيالار جانە كنيازدىكتە قولدانىلاتىن ۇزدىك تاجىريبەلەر كورسەتىلدى. مەملەكەت باسشىسى «بولاشاقتىڭ بەينەسى» اتتى ينستاللياتسيامەن, موناكونىڭ اۋماعىن كەڭەيتۋ جونىندەگى جوبانىڭ ماكەتىمەن, «جاسىل زەرتحانا» سەكتسياسىمەن جانە كۇن ەنەرگياسىمەن جۇرەتىن ۆەلوسيپەد سياقتى باسقا دا ەكسپوزيتسيالارمەن تانىستى.
سوڭىندا نۇرسۇلتان نازارباەۆ موناكو كنيازدىگى ۇلتتىق پاۆيلونىنىڭ قۇرمەتتى قوناقتار كىتابىنا قولتاڭبا قالدىرىپ, ءىى البەرگە قازاقستاننىڭ «نۇر الەم» ۇلتتىق پاۆيلونىن كورسەتتى. وندا ەكى ەلدىڭ كوشباسشىلارى ۋراندى جەراستى ۇڭعىمالى تازارتۋ ءادىسىن, «توكاماك» تەرمويادرولىق رەاكتورىنىڭ ينتەراكتيۆتى ماكەتىن جانە قازاقستاننىڭ مادەنيەتى مەن تاريحىنا ارنالعان باسقا دا ەكسپوزيتسيالاردى كوردى.
***
موناكو كنيازدىگى ۇلتتىق پاۆيلونىنىڭ تاقىرىبى – «بولاشاقتىڭ بەينەسى». وندا 2025 جىلعا قاراي تەڭىزدىڭ 6 گەكتارىندا قۇرىلىس جۇرگىزۋ ارقىلى كنيازدىك اۋماعىن كەڭەيتۋ جونىندەگى شەشىمدەرگە ارنالعان ەكسپوزيتسيالار, ەكولوگيالىق ورنىقتىلىق پەن ەكولوگيالىق موبيلدىلىك سالاسىنداعى جوبالار قويىلعان.
