«ورازا ايت مەرەكەسىنە امان-ەسەن جەتكىزگەن اللا تاعالاعا سانسىز شۇكىرلەر مەن ماداقتار بولسىن. سىزدەردى مۇسىلمان قاۋىمىنىڭ ۇلىق, قاستەرلى مەرەكەسى - ورازا ايت مەيرامىنىڭ باستالۋىمەن قۇتتىقتايمىن. ايت مۇباراك بولسىن, اعايىن!
قاسيەتتى رامازان ايىنىڭ اياقتالعانىن بىلدىرەتىن ورازا ايت - مەيىرىمدىلىكتىڭ, يگىلىكتىڭ, بىرلىكتىڭ, ىزەتتىلىكتىڭ, قايىرىمدىلىقتىڭ مەرەكەسى. بۇل مەيرام بارشا حالىقتى ىزگىلىككە ۇيىتادى. ەلىمىزدىڭ مۇسىلمان قاۋىمى قاسيەتتى رامازاندا اۋىز بەكىتىپ, شاراپاتى مول ايدا جاسالعان ىزگى ءىس-شارالارىمىزعا اتسالىستى. مەشىتتەرىمىزدە اۋىزاشارلار مەن قايىرىمدىلىق اكتسيالار ءوتتى. تۇرمىس جاعدايى تومەن وتباسىلارىنا كومەك كورسەتىلدى. ساۋابى تەڭدەسسىز وسىناۋ قايىرىمدىلىق شارالارعا ۇلەس قوسقان وتانداستارىما ءوزىمنىڭ جانە قازاقستان مۇسىلماندارى ءدىني باسقارماسى اتىنان «اللا رازى بولسىن» دەيمىن.
«ايت» ءسوزى - «مەرەكەلەۋ», «حال سۇراسۋ», ء«بىر-ءبىرىن قۋانتۋ», «قۋانىشقا توپتالۋ» دەگەن ماعىنالاردى بىلدىرەدى. جاراتۋشى يەمىز ءاربىر ىزگى امال مەن يگىلىكتى ءىستىڭ ساۋابىن بەرىپ, مەيىرىم-شاپاعاتىن توگەدى. اللا تاعالا: «مەن پارىز ەتكەن ورازانى پەندەلەرiم وتەپ, اقىسىن الۋعا (ايت نامازىن وتەۋگە) مەشiتكە بەت الدى. ولار مەن ءۇشiن ورازا ۇستادى, مەنiڭ پارمەنiممەن اۋىز اشتى, ەندi قۋانىشقا كەنەلسiن...», - دەيدى. ورازا ايت - ءبىر اي بويى ورازا ۇستاپ, ىقىلاسپەن جاقسىلىق جاساعان ادامنىڭ قۇرمەتكە, ماراپاتقا يە بولاتىن كەزى. اللا بارشامىزدى مول ساۋاپقا كەنەلگەن قۇلدارىنىڭ قاتارىنا قوسۋىن تىلەيمىن. ايت كۇنىندە تولىق جۋىنىپ, جۇپار ءيىس سەبىنىپ, جاماعاتپەن ايت نامازىنا قاتىسۋدىڭ ساۋابى ەرەكشە. ايت نامازىنا بارۋدان بۇرىن قۇرمادان ءدام تاتۋ - پايعامبارىمىز مۇحاممەدتىڭ (وعان اللانىڭ سالاۋاتى مەن سالەمى بولسىن) سۇننەت امالى. اعايىن-تۋىستى, كورشىلەر مەن وزگە ۇلت وكىلدەرىن ورتاق مەرەكەمەن قۇتتىقتاپ, تىلەۋلەستىك ءبىلدىرۋ - يگى امال.
ورازا ايت - وتباسىلىق مەرەكە. مەيرام كۇنى اتا-انامىزعا, بالالارعا سىيلىق ۇلەستىرىپ, اعايىن-كورشى, تۋىس, باۋىرلاردى قوناققا شاقىرىپ, ايرىقشا كوڭىل ءبولۋ دە - ساۋاپتى ءىس. ورازا ايت مەرەكەسى قۇتتى بولسىن! اللا تاعالا ۇستاعان ورازامىزدى, دۇعا-تىلەكتەرىمىزدى, قاسيەتتى ايدا جاساعان ءاربىر قايىرلى امالدارىمىزدى, بەرگەن زەكەت پەن ءپىتىر ساداقالارىمىزدى قابىل ەتىپ, مول ساۋاپتان جازعاي! ءاربىر وتباسىنا اماندىق, جاقسىلىق, دەندەرىڭىزگە ساۋلىق, جۇمىستارىڭىزعا بەرەكە تىلەيمىن! راببىمىز بارشامىزدى رامازاننان رامازانعا دەيىن امان-ەسەن جەتكىزە بەرسىن! ەلىمىز امان جۇرتىمىز تىنىش, تاۋەلسىزدىگىمىز باياندى بولعاي! ءاۋمين!», - دەلىنگەن باس ءمۇفتيدىڭ قۇتتىقتاۋىندا.
