اقتوبەلىكتەر اۋەلى ءوڭىر ەرەكشەلىگى بولىپ سانالاتىن قاراحان, ايشا ءبيبى كەسەنەلەرىنە بارىپ, شاھارداعى بىرقاتار ءبىلىم, مەديتسينا نىساندارىندا دا بولدى. اقتوبە وبلىسىنىڭ اكىمى بەردىبەك ساپارباەۆ باستاعان دەلەگاتسيا قۇرامى ەكى كۇن بويى اۋليەاتا جۇرتشىلىعىنا ءوڭىر جەتىستىكتەرى مەن ەرەكشەلىكتەرىن تانىستىردى. سونداي-اق, جامبىل وبلىسىنىڭ اكىمى كارىم كوكىرەكباەۆ ۇلى دالانىڭ ۇلاعاتتى ءۇنى تۇنعان تاريحي تاراز شاھارىنىڭ جانە جالپى جامبىل ءوڭىرىنىڭ بۇگىنگى دامۋ تاريحىن اڭگىمەلەدى.
ءوز كەزەگىندە ەكى وبلىس باسشىلارى ارنايى جينالىس وتكىزىپ, ءوزارا ىنتىماقتاستىق پەن وڭىرارالىق بايلانىستى كەڭەيتۋدىڭ جولدارىن قاراستىردى. اتاپ ايتساق, جيىن بارىسىندا ەكى ءوڭىردىڭ كاسىپكەرلىك, ءبىلىم بەرۋ, دەنساۋلىق ساقتاۋ, مادەنيەت جانە سپورت سەكىلدى بەس باعىت بويىنشا تاجىريبە الماسۋ جايى ءسوز بولدى.
اقتوبە كۇندەرىنىڭ اياسىندا تاراز تۇرعىندارى مەن قوناقتارى ورتالىق ستاديونعا كەلىپ, اقتوبە مەن تاراز سپورت مەكتەپتەرىنىڭ تاربيەلەنۋشىلەرى اراسىنداعى فۋتبولدان جولداستىق كەزدەسۋدى تاماشالادى. سونداي-اق, اقتوبەلىك ساحنا مايتالماندارى جامبىل وبلىستىق قازاق دراما تەاترىندا «ەسىگىمدى قاققان كىم؟» سپەكتاكلىن ساحنالاپ, كورەرمەن كوزايىمىنا يە بولدى. قوعامداعى وتكىر ماسەلەلەردى قوزعاعان قويىلىم كوپشىلىكتىڭ كوكەيىنە وي سالدى. ال اقتوبە وبلىسى بالالارىنىڭ تەحنيكالىق شىعارماشىلىقتاعى جەتىستىكتەرىنىڭ كورمەسى ءوتىپ, روبوت تەحنيكاسىنىڭ جەتىستىكتەرى جانە تاعى دا باسقا جوبالار ۇسىنىلدى. بۇدان كەيىن تاراز قالاسىنداعى ورتالىق «دوستىق» الاڭىندا اقتوبە قالاسى مەن 12 اۋدان كاسىپكەرلەرىنىڭ قاتىسۋىمەن اۋىلشارۋاشىلىق جارمەڭكەسى ۇيىمداستىرىلدى.
اقتوبەلىكتەر جامبىلدىقتارعا ەت, شۇجىق جانە كونسەرۆى ونىمدەرىن, بالىق, ءسۇت, وسىمدىك مايى, بال جانە وزگە دە ازىق-ت ۇلىك ونىمدەرىن بازار باعاسىنان 8-15 پايىز ارزان باعاعا ۇسىندى. جارمەڭكەدەن كەيىن اقتوبە وبلىسىنىڭ اكىمى بەردىبەك ساپارباەۆ جامبىل اتىنداعى «رۋحانيات» ورتالىعىنا ارنايى كەلىپ, نىساننىڭ تىنىس-تىرشىلىگىمەن تانىستى. ورتالىق كورمەلەرىن ارالاپ, اۋليەاتا وڭىرىنەن شىققان كەنەن ازىرباەۆ, باۋىرجان مومىش ۇلى, شونا سماحان ۇلى, شەرحان مۇرتازا, اكىم تارازي, مىرزاتاي جولداسبەكوۆ, كۇلاش احمەتوۆا سىندى ۇلتتىق زيالىلاردىڭ ونەگەلى ءومىر جولىنا توقتالدى. ال جامبىل وبلىسىنىڭ اكىمى كارىم كوكىرەكباەۆ «جامبىل اتىنداعى «رۋحانيات» ورتالىعى ءبىزدىڭ زيالى قاۋىممەن كەزدەسىپ, رۋحاني شارۋالاردى اقىلداساتىن ورنىمىز. بۇل جەردە تالاي-تالاي تانىمال تۇلعالارىمىز قوناقتا بولعان. سوندىقتان مۇنىڭ ءبارى اسىرەسە جاستارىمىز ءۇشىن پايدالى دەپ ويلايمىن» دەدى.
سونداي-اق, اقتوبەلىك دەلەگاتسيا «قازاق حاندىعىنا 550 جىل» مونۋمەنتىنە جانە «كونە تاراز» تاريحي-مادەني كەشەنىندە بولىپ, ءوڭىردىڭ ساۋلەت ونەرىن تاماشالادى.
حاميت ەسامان,
«ەگەمەن قازاقستان»
جامبىل وبلىسى
