ەلباسى جيىنعا قاتىسۋشىلاردى ايتۋلى كۇنمەن قۇتتىقتاپ, ءدال وسى كۇنى شيرەك عاسىر بۇرىن قازاقستان رەسپۋبليكاسى ىشكى ىستەر ورگاندارىنىڭ قۇرىلعانىن اتاپ ءوتتى.
- بۇل تاۋەلسىزدىگىمىزدىڭ باستاپقى كەزەڭىنىڭ ايتۋلى قادامى بولدى. ىشكى ىستەر ورگاندارىنىڭ قالىپتاسۋ تاريحى مەملەكەتىمىزدىڭ دامۋ تاريحىمەن تىعىز بايلانىستى, - دەدى نۇرسۇلتان نازارباەۆ. مەملەكەت باسشىسى قازاقستان پوليتسياسىندا جانكەشتىلىك پەن ەرلىك ۇلگىلەرىن كورسەتكەندەر از ەمەس ەكەنىن ايتتى. - ولار قىلمىسپەن كۇرەستە الدىڭعىلاردىڭ قاتارىنان تابىلىپ, ازاماتتاردىڭ قۇقىقتارى مەن بوستاندىقتارىن ءبىرىنشى بولىپ قورعايدى. سوڭعى جىلدارى قىزمەتتەرىڭىزدىڭ ناتيجەلەرى ايقىن كورىنۋدە. بىلتىرعى جىلمەن سالىستىرعاندا قىلمىس جاساۋ 15 پايىزدان اسا ازايعان. اۋىر جانە اسا اۋىر قىلمىستاردى اشۋ كورسەتكىشى 72 پايىزعا جەتتى. قالا مەن اۋىل كوشەلەرىندەگى تۇرعىنداردىڭ قاۋىپسىزدىك دەڭگەيى ايتارلىقتاي ارتتى. وندا قىلمىس جاساۋ 14 پايىزدان اسا ازايدى, - دەدى قازاقستان پرەزيدەنتى.
سونىمەن قاتار, ەلباسى جاھاندىق تۇراقسىزدىق جاعدايىندا بيلىك وكىلدەرى - پوليتسياعا دەگەن سەنىم ەرەكشە ماڭىزعا يە بولىپ وتىرعانىنا نازار اۋداردى.
- سىزدەر قىزمەتتىك پارىزدى مۇلتىكسىز اتقارعاندا عانا قوعام مەن مەملەكەتتىڭ جاڭعىرۋى جۇزەگە اسادى. سوندىقتان ءبىز قازىر قابىلدانعان باعدارلامالاردىڭ اياسىندا قۇرىلىمداردى قايتا قۇرۋ جونىندە جۇمىستار جۇرگىزىپ جاتىرمىز. سونىڭ ناتيجەسىندە جەرگىلىكتى پوليتسيا قىزمەتى قۇرىلدى. زاڭدىلىقتىڭ, ازاماتتاردىڭ قۇقىقتارى مەن بوستاندىقتارىنىڭ ساقتالۋىن قاتاڭ باقىلاۋعا الۋ قاجەت. بۇل - ەلىمىزدىڭ ورنىقتى ءارى تۇراقتى دامۋىنىڭ باستى فاكتورىنىڭ ءبىرى. سونداي-اق, زاماناۋي تۇرعىدا ءتيىمدى پوليتسيا قىزمەتى مەملەكەت پەن حالىقتىڭ باسەكەگە قابىلەتتىلىگىن ارتتىرۋعا سەپتىگىن تيىگىزەدى, - دەپ تۇيىندەدى نۇرسۇلتان نازارباەۆ.
بۇدان بولەك, مەملەكەت باسشىسى جوعارىدا كورسەتىلگەن ستراتەگيالىق مىندەتتەردىڭ ىسكە اسىرىلۋىن قامتاماسىز ەتۋ ءۇشىن 2017 جىلعى 1 شىلدەدەن باستاپ ىشكى ىستەر ورگاندارى قىزمەتكەرلەرىنىڭ ەڭبەكاقىسىن 25 پايىزعا ءوسىرۋ جونىندە شەشىم قابىلدانعانىن ايتتى.
- جۇرت سىزدەرگە قاراپ, مەملەكەتتىك بيلىك تۋرالى پىكىر قالىپتاستىرادى. سول سەبەپتى, پوليتسيا قىزمەتكەرى بارشاعا ۇلگى بولۋعا ءتيىس. قازاقستان پوليتسەيلەرى الداعى ۋاقىتتا دا بار كۇشىن, تاجىريبەسى مەن قۋاتىن ابىرويلى پارىزدى ءساتتى ورىنداۋعا جۇمسايتىنىنا سەنىمدىمىن, - دەدى قازاقستان پرەزيدەنتى.
نۇرسۇلتان نازارباەۆ كەزدەسۋدە ىشكى ىستەر مينيسترلىگى ارنايى ماقساتتاعى بولىمشەسىنىڭ ينسپەكتورى ب.دۇيسەنوۆتى ءى دارەجەلى «ايبىن» وردەنىمەن, پاۆلودار وبلىسى ىشكى ىستەر دەپارتامەنتىنىڭ شارباقتى اۋداندىق ىشكى ىستەر ءبولىمىنىڭ باستىعى ج.مۇقاتوۆتى ءىى دارەجەلى «ايبىن» وردەنىمەن, وڭتۇستىك قازاقستان وبلىسى ىشكى ىستەر دەپارتامەنتىنىڭ ورداباسى اۋداندىق ىشكى ىستەر ءبولىمىنىڭ باستىعى ق.ساحوۆتى ءىى دارەجەلى «ايبىن» وردەنىمەن, استانا قالاسى ىشكى ىستەر دەپارتامەنتىنىڭ تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى ۆ.شۋتكونى ءىى دارەجەلى «ايبىن» وردەنىمەن, ىشكى ىستەر مينسترلىگى قىلمىستىق-اتقارۋ جۇيەسى كوميتەتىنىڭ اسا ماڭىزدى ىستەر جونىندەگى اعا ۋاكىلى ا.عاليەۆتى «ەرلىگى ءۇشىن» مەدالىمەن, الماتى وبلىسى ىشكى ىستەر دەپارتامەنتىنىڭ جەدەل-كريميناليستىك باسقارماسىنىڭ باستىعى ل.كيمدى «ەرلىگى ءۇشىن» مەدالىمەن ماراپاتتادى. قازاقستان رەسپۋبليكاسىنىڭ قۇرمەت گراموتاسىمەن اقتوبە قالاسى ىشكى ىستەر باسقارماسىنىڭ ۋچاسكەلىك پوليتسيا ينسپەكتورى س.بالتامبەكوۆا, اقتاۋ قالاسى ىشكى ىستەر باسقارماسىنىڭ ۋچاسكەلىك پوليتسيا ينسپەكتورى ە.جولداسوۆ جانە قاراعاندى قالاسى ىشكى ىستەر باسقارماسى ارناۋلى مەكەمەسىنىڭ پوليتسەيى ن.رەدچەنكو ماراپاتتالدى. سوڭىندا قازاقستان پرەزيدەنتى كەزدەسۋگە قاتىسۋشىلارعا العىس ايتىپ, زور دەنساۋلىق, باق-بەرەكە جانە جاۋاپتى قىزمەتتەرىنە ساتتىلىك تىلەدى.
