ءتۇس اۋا «ازيا «ەكونوميكالىق كەرەمەتىنىڭ» قۇپياسى. داعدارىس كەزىندەگى تۇراقتىلىق جانە الەمدىك نارىقتا كوشباسشىلىققا جەتۋ جولدارى» تاقىرىبىمەن جالعاسىن تاپقان القالى كەڭەستىڭ ارالىق ۇزىلىسىندە كىتاپتى اۆتورلىق قولتاڭبامەن سىيعا تارتۋ شاراسى ۇيىمداستىرىلدى.
الەمدىك ساياسات ساحناسىنىڭ سان قۇبىلۋى مەن مەگاقالالاردىڭ دامۋ پروتسەسى جانە ادامزات بالاسىنىڭ وركەنيەتكە قۇلاش ۇرۋ قارقىنىن قۇلشىنا زەرتتەپ, زەردەلەپ جۇرگەن ءۇندى ازاماتى سياسى كەپپەگەن سۋ جاڭا كىتابىنىڭ تۇساۋكەسەر ءراسىمىن جاس قالا بولسا دا, اتاعى الىسقا كەتكەن استانا شاھارىندا جاساۋدى ءجون ساناپتى.
«بۇل كىتاپتىڭ وسى جىلعى ەۋرازيالىق مەديا فورۋم قارساڭىندا جارىققا شىعۋى وزىندىك ۇيلەسىمىن تاپقان يگى ىستەردىڭ ءبىرى بولدى. ونىڭ ۇستىنە استانا قالاسى ەۋرازيا كەڭىستىگىندە وتە جاس قالا بولعانىمەن, ونىڭ دامۋ دەڭگەيى الەم جۇرتشىلىعىنىڭ تاڭدانىسىن تۋدىرۋدا. ماسەلەن, قازاقستان پرەزيدەنتىنىڭ سىرتقى ساياساتتاعى قارىشتى قادامدارى مەن مەملەكەتتىڭ حالىقارالىق شەڭبەردەگى شارالارعا بەلسەندى قاتىسىپ, ابىروي-بەدەلىنىڭ اسقاقتاۋى جانە جەرجاھاندى جاڭاشىلدىققا باستايتىن ەكسپو-2017 كورمەسىنىڭ وسى قالادا ءوتۋى – استانانىڭ جارقىن بولاشاعىنىڭ كەپىلىندەي بولىپ كورىنەدى. سونىمەن قاتار, وسىنداي جوعارى دەڭگەيدە ۇيىمداستىرىلعان كەرەمەت باسقوسۋ اياسىندا ءوز كىتابىمنىڭ وقىرمانعا جول تارتىپ وتىرعانىنا بەك قۋانىشتىمىن», دەيدى كىتاپ اۆتورى.
شارا اياسىندا فورۋم قاتىسۋشىلارى مەگاقالالاردىڭ الەمدىك ساياسات ساحناسىنا اسەرى جانە زاماناۋي اعىمعا ساي دامۋعا جەتەلەيتىن اتالمىش كىتاپتى زور قىزىعۋشىلىقپەن قابىل الىپ جاتتى. ويتكەنى, اعىلشىن تىلىندە ۇلىبريتانيادا باسىلىپ شىققان بۇل ادىستەمەلىك قۇرال قالالار ارقىلى الەمنىڭ وسى كۇنگى باعىت-باعدارىن باعامدايدى.
نۇرلىبەك دوسىباي,
«ەگەمەن قازاقستان»
