بيرفينگ بارىسىندا بالجيت گرەۆال «سامۇرىق-قازىنا» اق ءۇش نەگىزگى ماقساتىنا (قورجىندىق كومپانيالاردىڭ قۇنىن ارتتىرۋ, ەل ەكونوميكاسىن جاڭعىرتۋ جانە تۇراقتى دامۋ) جەتۋ جولىندا قوردا قولعا الىنعان التى ستراتەگيالىق باستاما تۋرالى باياندادى.
«بۇگىنگى تاڭدا Sovereign Wealth Fund Institute ەسەبى بويىنشا قۇنى 67,4 ملرد اقش دوللارىنا جەتەتىن اكتيۆتەردى يەلەنۋشى «سامۇرىق-قازىنا» اق الەمدىك دەڭگەيدەگى قورعا اينالۋعا ۇمتىلۋدا. دەسەك تە, بۇل ۇيىم الەمنىڭ 30 ءىرى تاۋەلسىز قورىنىڭ قاتارىنا كىرەدى. تيىمدىلىكتىڭ تاعى ءبىر ماڭىزدى كورسەتكىشى – ROE جۇيەسى بولىپ وتىر. سوندىقتان دا ءبىز قازىر كاپيتالعا قايتارىم بويىنشا ءىرى الەمدىك قورلاردان ىلگەرىمىز جانە ارى قاراي دا قارجىلىق كورسەتكىشتەرىمىزدى جاقسارتا تۇسۋگە مۇددەلىمىز», دەدى ب.گرەۆال.
«سامۇرىق-قازىنا» اق 2014 جىلدان بەرى حالىقارالىق تاۋەلسىز قورلار فورۋمىنىڭ (IFSWF) مۇشەسى بولىپ تابىلادى. IFSWF مۇشەلەرى قۇقىقتىق جانە ينستيتۋتسيونالدىق قىزمەت اياسىن, سونداي-اق ينۆەستيتسيالار مەن تاۋەكەلدەردى باسقارۋ قۇرىلىمىن انىقتايتىن 24 ءپرينتسيپتى (سانتياگو پرينتسيپتەرى) نەگىزگە الادى. سانتياگو ۇستانىمدارىن ورىنداۋ ارقىلى حالىقارالىق قارجىلىق نارىقتارعا تاۋەلسىز ءال-اۋقات قورلارىنداعى جۇمىستىڭ دۇرىس اتقارىلىپ جاتقانىن, ال ينۆەستيتسيالاردىڭ ورىندى ەكونوميكالىق جانە قارجىلىق شارتتارعا سايكەس جۇزەگە اسىرىلعانىن كورسەتۋ كوزدەلگەن.
«بۇگىنگى تاڭدا «سامۇرىق-قازىنا» قورىنىڭ قىزمەتى سانتياگو پرينتسيپتەرىنىڭ كوبىنە ساي كەلەدى. اسىرەسە, جاريالىقتى قامتاماسىز ەتۋ تۇرعىسىنان العاندا بيىلعى جىلدىڭ ءبىرىنشى توقسانىندا ءبىزدىڭ كومپانيا تاۋەلسىز ءال-اۋقات قورلارىنىڭ ىشىندە Linaburg-Maduell Transparency Index جاريالىق رەيتينگىندە ەڭ جوعارعى 10 ۇپايدى يەلەندى. بەدەلدى رەيتينگ كورسەتكىشتەرىنىڭ وسىنداي دەرەگىنە سۇيەنە وتىرىپ, قارجىلىق ينستيتۋتتار مەن تاۋەلسىز قورلاردىڭ وزگە ستەيكحولدەرلەرى (مۇددەلى تۇلعالارى) نارىق ءۇشىن قانشالىقتى اشىق ءارى جاريالى ەكەنىنە كوز جەتكىزەدى», دەدى قۇقىقتىق سۇيەمەلدەۋ جانە تاۋەكەلدەر جونىندەگى باسقارۋشى ديرەكتورى ع.بيتەنوۆ.
ال IFSWF ستراتەگيا جانە كوممۋنيكاتسيالار جونىندەگى ديرەكتورى ۆيكتوريا بارباري بولسا, الداعى تاۋەلسىز قورلار فورۋمىنىڭ وتىرىسى جايىندا ايتىپ بەردى.
«فورۋم وتىرىستارىن جىل سايىن وتكىزۋدىڭ ماقساتى – ەڭ وزەكتى ماسەلەلەردى تالقىلاپ, ماقسات-مىندەتتەردى شەشۋدىڭ قولدانبالى تاسىلدەرى ىزدەستىرۋ. شارا اياسىندا ۇيىم مۇشەلەرى عانا قاتىساتىن جابىق كەزدەسۋلەر مەن قوناقتار جانە باق وكىلدەرى شاقىرىلاتىن اشىق پانەلدىك سەسسيالار وتەدى. قازاقستاندىق تىلشىلەر ءۇشىن الەمنىڭ تاۋەلسىز ءال-اۋقات قورلارىنىڭ باسشىلارىنا ءوز ساۋالدارىن جولداۋعا مۇمكىندىك بار», دەدى ول.
ايتا كەتەيىك, جوعارىدا اتاپ وتكەن حالىقارالىق تاۋەلسىز ءال-اۋقات قورلارىنىڭ فورۋمى – جالپى قۇنى 3,5 ترلن اقش دوللارىن اكتيۆتەرىن باسقاراتىن 31 ەلدىڭ 32 قورى ەنەتىن ۇيىم. ال «سامۇرىق-قازىنا» اق بيىلعى جىلدىڭ 5-7 قىركۇيەك ارالىعىندا ۇيىمنىڭ جىل سايىنعى وتىرىسىن استانادا ۇيىمداستىرادى دەپ جوسپارلانۋدا. قازاقستان ەلورداسىندا تاۋەلسىز قورلاردىڭ باسشىلارى تۇراقسىز الەم نارىقتارىندا اكتيۆتەردى ۇيلەستىرۋ جانە تاۋەكەلدەردى باسقارۋ ماسەلەلەرىن, تاۋەلسىز قورلار ءۇشىن عالامدىق ينۆەستيتسيالاردىڭ بەس جىلدىق جوسپارى جانە ساندىق ەكونوميكانىڭ باستى كورىنىستەرىن تالقىلايدى. سونىمەن قاتار قوناقتار نازارىنا قازاقستاننىڭ ينۆەستيتسيالىق مۇمكىندىكتەرى ۇسىنىلادى دەپ كۇتىلۋدە.
نۇرلىبەك دوسىباي,
«ەگەمەن قازاقستان»
