دارحان قىدىرالى پرەزيدەنت نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ قازاقستاننان تىسقارى شەتەلدەردە ۇلكەن سەرپىلىس تۋدىرعانىن ايتا كەلىپ, بۇل رەتتە «ۇلتىمىزدىڭ رۋحىن اسقاقتاتىپ, ساناسىنا سەرپىن بەرگەن بۇل باعدارلاما بۇگىنىمىزدى بۇتىندەپ, باياندى بولاشاعىمىزدى بەكەمدەۋدىڭ بەرىك قازىعىنا اينالدى. بارشاعا باعدار بولعان بۇل بايلامدى باتۋاعا قازاق بالاسى تۇگەل اتسالىسۋعا ءتيىس دەپ ويلايمىز. وسى ورايدا, مادەني جاۋھارلارىمىزدى جاھانعا جۇيەلى تانىتۋ ماقساتىندا شەت ەلدەردە, اسىرەسە, دياسپورا شوعىرلانعان ەلدەردە ارنايى ورتالىقتار اشىلسا دەگەن تىلەگىمىز بار. بۇل ارقىلى قاستەرلى قازاق ءتىلى دە قۇلاشىن كەڭگە جازىپ, تۇعىرىن بەكىتە تۇسەدى دەپ پايىمدايمىز», دەدى باسقارما توراعاسى.
«كۇڭىرەنىپ كۇن تۇبىنە جورتقان كۇلتەگىنگە ۇران بولعان كوك ءبورى ءسۇيىنباي جىرىندا ءبورىلى بايراق بولىپ قايتا كوتەرىلدى! سوندىقتان, قازاق ەلى بۇكىل تۇركى الەمىنىڭ جانە كۇللى كوشپەلى وركەنيەتتىڭ مۇراگەرى رەتىندە مويىندالىپ وتىر. بىرنەشە مەملەكەتتىڭ ەنشىسىندە جاتقان التايدىڭ ءتورت تاراپىن دا قازاقتاردىڭ مەكەندەيتىنى وسىنىڭ ايقىن ايعاعى ىسپەتتى. ەندەشە, قازاق الەمىن دۇنيەجۇزىنە تانىتۋ ارقىلى ءبىز تامىرلاس جۇرتتىڭ قۇندىلىقتارىن تۇگەندەي تۇسەمىز دەگەن ويدامىز», دەپ ءسوزىن تۇيىندەدى «ەگەمەن قازاقستان» گازەتىنىڭ باسشىسى.
جيىن بارىسىندا شەتەلدەردەگى قازاق دياسپوراسىنىڭ مادەني-رۋحاني جانە اقپارات قۇرالدارى جونىندەگى مۇقتاج ماسەلەلەرى مەن ەتنيكالىق كوشى-قوننىڭ الەۋمەتتىك سيپاتى, وزەكتى جايتتارى كوتەرىلىپ, ولاردى شەشۋ جونىندە بىرقاتار ناقتى ۇسىنىستار ايتىلدى. بۇل رەتتە مەملەكەت باسشىسى اتاجۇرتقا كوشىپ كەلۋگە ىنتالى ازاماتتارعا زاڭدىق-قۇقىقتىق جاعىنان جەڭىلدىكتەر جاساۋ قاجەتتىگىن ەسكەرتتى. مەملەكەت باسشىسى قازاق دياسپوراسىنا قاتىستى وزەكتى ماسەلەلەردىڭ جوسپارلى شەشىمىن ۇسىنا وتىرىپ, ۇكىمەتتىڭ, ءتيىستى مينيسترلىكتەر مەن وبلىستىق اكىمدىكتەردىڭ مىندەتتەرىن بەلگىلەدى.
