وسىناۋ شيرەك عاسىر مۇعدارىندا شىعىس قازاقستاننىڭ ءتارتىپ ساقشىلارى ىزدەۋدە جۇرگەن 13 مىڭنان استام قىلمىسكەردى قۇرىقتاپ, ءىز-ءتۇسسىز كەتكەن 20 مىڭعا جۋىق ادامنىڭ قايدا جۇرگەنىن انىقتاپتى. ءوڭىردىڭ ىشكى ىستەر ورگاندارىنىڭ 38 قىزمەتكەرى قىزمەتتىك بورىشىن وتەۋ بارىسىندا قازا تاپقان. توعىز پوليتسەي بەيبىت كۇندە باتىرلىقتىڭ ەرەن ۇلگىسىن كورسەتىپ, ونىڭ 5-ەۋى «ەرلىگى ءۇشىن» مەدالىمەن ماراپاتتالعان. ايماقتىڭ تەرگەۋشىلەرى سوڭعى ءتورت جىلدا ەلىمىز بويىنشا ءبىرىنشى ورىندا كەلەدى ەكەن. ريددەر قالاسىنىڭ ىشكى ىستەر ءبولىمىنىڭ تەرگەۋشىسى, پوليتسيا لەيتەنانتى اسحات احمەتوۆ «2016 جىلدىڭ ەڭ ۇزدىك تەرگەۋشىسى» دەپ تانىلىپتى.
ەلباسىنىڭ ۇلت جوسپارى – «100 ناقتى قادام» باعدارلاماسى اياسىندا 2015 جىلى جەرگىلىكتى پوليتسيا قىزمەتى قۇرىلعانى بەلگىلى. ءوڭىردىڭ قۇقىق قورعاۋ سالاسىنىڭ ماتەريالدىق-تەحنيكالىق بازاسىن نىعايتۋ ماقساتىندا وبلىستىق بيۋدجەتتەن 2016 جىلى 5, بيىل 6 ميلليارد تەڭگەدەن استام قارجى ءبولىنىپتى.
ء«تارتىپ ساقشىلارىن زاماناۋي تەحنيكالارمەن, قىزمەتتىك پاتەرلەرمەن قامتاماسىز ەتۋگە ەرەكشە كوڭىل ءبولىنىپ جاتىر. وتكەن جىلى جەرگىلىكتى پوليتسياعا 107 اۆتوكولىك پەن 5 اۆتوبۋس بەرىلدى, بيىل 101 اۆتوبۋس پەن 140 اۆتوكولىك بەرۋدى جوسپارلاپ وتىرمىز. وسىنىڭ ناتيجەسىندە ىشكى ىستەر قىزمەتكەرلەرىنىڭ جۇمىس تيىمدىلىگى ارتتى. بۇعان بيىل ايماقتاعى قوعامدىق ورىندارداعى قىلمىس سانىنىڭ 18, كوشەدەگى قىلمىس سانىنىڭ 12, كامەلەتكە تولماعانداردىڭ قاتىسۋىمەن ورىن الاتىن قىلمىس سانىنىڭ 10, وتباسىلىق قارىم-قاتىناستاعى قىلمىستىڭ 48 پايىزعا جانە جول كولىك وقيعاسىنىڭ 14 پايىزعا تومەندەۋى دالەل», – دەدى وبلىس اكىمى دانيال احمەتوۆ سالتاناتتى جيىندا سويلەگەن سوزىندە.
ءوڭىر باسشىسى ايماقتىڭ پوليتسەيلەرىن ءتول مەرەكەلەرىمەن قۇتتىقتاعاننان كەيىن بىرنەشە ءتارتىپ ساقشىسىن شىعىس قازاقستان وبلىسىنىڭ قۇرمەت گراموتاسىمەن ماراپاتتادى.
ازامات قاسىم,
«ەگەمەن قازاقستان»
فوتو: ەسىمحان ورىنباەۆ.
