ايدار شارىباەۆ – قازاقستان بوكس مەكتەبىنىڭ تۇلەگى. ەكىنشى جارتىلاي جەڭىل سالماقتا ونەر كورسەتەتەتىن ول ءبىر كەزدەرى اۋەسقوي بوكستان قازاقستان ۇلتتىق قۇراماسى ساپىندا بولىپ, سان رەت ەل چەمپيونى اتاندى. اۋەسقوي بوكستا 250 كەزدەسۋ وتكىزگەن. وسىدان ءۇش جىل بۇرىن كاسىپقوي بوكسقا ويىسقان وتتى جىگىت, ۇلكەن سپورتتاعى ونەرىن تابىستى باستادى. از ۋاقىت ىشىندە 6 جەكپە-جەك وتكىزىپ, بارلىعىندا جەڭىس تۇعىرىنان كورىندى. ونىڭ ىشىندە بەس قارسىلاسىن نوكاۋتپەن سۇلاتتى. ايدار العاش كارەراسىن باستاعان تۇستا تاعى ءبىر قازاقستاندىق كاسىپقوي بوكسشى قانات يسلامنىڭ سپاررينگ-قارسىلاسى بولىپ, ونىمەن بىرگە شەتەلدەگى وقۋ-جاتتىعۋ جيىندارىندا قاتار ءجۇردى. ۇلكەن سپورتتىڭ قىر-سىرىنا قانىققان ازاماتتىڭ العاشقى اياق الىسى بۇكىلالەمدىك كاسىپقوي بوكس ماماندارىنىڭ نازارىنا ىلىكتى. ايدار جۇدىرىقتاساتىن سالماقتا الەم بويىنشا 2020 بىلعارى قولعاپ شەبەرى بار دەسەك, وتانداسىمىز سولاردىڭ ىشىندە رەيتينگكتىك كورسەتكىش بويىنشا ۇزدىك ەلۋلىككە تابان تىرەگەن.
ەلىمىزدە ءوتىپ جاتقان ەكسپو-2017 كورمەسى اياسىندا ايدار Wۆا INTERCONTINENTAL تۇجىرىمى بويىنشا چەمپيوندىق بەلدىككە تالاسادى. اتالمىش جەكپە-جەك تامىزدىڭ وتىزى نەمەسە قىركۇيەك ايىنىڭ توعىزى كۇنى استانادا وتەدى دەپ كۇتىلۋدە. جاۋاپتى باسەكەگە تىڭعىلىقتى دايىندالىپ, وقۋ-جاتتىعۋ جيىندارىن وتكىزۋ ءۇشىن ايدار اقش-قا اتتانادى. وسىعان وراي, الماتىداعى «Aidar Classis» بوكس زالىندا بىلعارى قولعاپ شەبەرىمەن جۋرناليستەردىڭ كەزدەسۋى ءوتتى. كەزدەسۋ بارىسىندا سپورت جانكۇيەرلەرى مەن جۋرناليستەر الداعى جوسپارلانىپ وتىرعان جەكپە-جەكتىڭ بارىسى تۋرالى بوكسشىنىڭ ءوز اۋزىنان ەستىپ, ايداردىڭ جاتتىعۋ ساتىنە كۋا بولدى. قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى داڭقتى بوكسشى ۆيكتور دەميانەنكوعا كوكەيدە جۇرگەن سۇراقتارىن قويىپ وتاندىق كاسىپقوي بوكستىڭ جاي-كۇيى جايلى مول اقپاراتقا قانىقتى.
– الەم بويىنشا ەڭ تانىمال سپورتتاردىڭ ءبىرى كاسىپقوي بوكس ءبىزدىڭ ەلىمىزدە دە تىڭ سەرپىن الىپ كەلەدى. قازىرگى تاڭدا 6 پروموۋتەرلىك كومپانيا جۇمىسىن جۇرگىزىپ, 40-قا جۋىق سپورتشىعا قازاقستان كاسىپقوي بوكس فەدەراتسياسىنىڭ ليتسەنزياسى بەرىلدى. شارىباەۆ ۇلكەن سپورتتاعى مانسابىن تابىستى باستادى. ادەتتە, بوكسشىلار كەم دەگەندە 20 كەزدەسۋدە جەڭىسكە جەتكەننەن كەيىن عانا چەمپيوندىق بەلبەۋگە تالاسادى. الايدا, ايداردىڭ رەيتينگى جوعارى بولۋىنا بايلانىستى ماماندار تاراپىنان زور سەنىم ارتىلىپ وتىر. دەگەنمەن, ءبارى قارجىعا كەلىپ تىرەلەدى. ايداردىڭ پروموۋتەرلەرى جاعداي جاساي السا, كورمە كەزىندە كەرەمەت تارتىستىڭ كۋاسى بولۋىمىز ابدەن مۇمكىن. ءوز باسىم Diamond Ring-كە سەنىم ارتامىن. ويتكەنى اتالعان پروۋموتەرلىك كومپانيا جەكپە-جەك ۇيىمداستىرىپ قانا قويماي, بوكسشىلاردى تۇراقتى تۇردە وقۋ-جاتتىعۋ جيىندارىنا جىبەرىپ وتىرادى. بوكس كەشىندە قانات يسلام, جانات جاقيانوۆ, بەكمان سويلىباەۆ, يسا اقبەرباەۆ, فيرۋزا شاريپوۆا سىندى بوكسشىلار ونەر كورسەتۋگە ءتيىس, – دەيدى قازاقستان كاسىپقوي بوكس فەدەراتسياسىنىڭ ۆيتسە-پرەزيدەنتى ۆيكتور دەميانەنكو.
ايداردىڭ چەمپيوندىق بەلدىككە تالاساتىن قارسىلاسىنىڭ ەسىمى ازىرگە بەلگىسىز. امەريكاداعى جاتتىعۋ بارىسىندا ول سپاررينگ-قارسىلاس رەتىندە ليۋك كەمپبەل جانە يۋريوركۋس گامبوا سىندى وليمپيادا چەمپيوندارىمەن شەبەرلىك شىڭداپ, بەلگىلى كۋبالىق مامان وسميري فەرناندەستىڭ ءتالىمىن الاتىن بولادى. بىزدە ءوز تاراپىمىزدان ەل نامىسىن ارقالاپ جۇرگەن ازاماتقا جەڭىستى جولدىڭ جالعانا بەرۋىن تىلەپ, شايقاي بەر, شارىباەۆ دەگىمىز كەلەدى.
ارمان وكتيابر,
«ەگەمەن قازاقستان»
الماتى
