مەملەكەت باسشىسى ۇسىنىسىمەن دۇنيەجۇزى قازاقتارى قاۋىمداستىعىنىڭ تورالقا توراعاسىنىڭ ءبىرىنشى ورىنباسارى بولىپ زاۋىتبەك تۇرىسبەك سايلاندى.
«ەندى ءبىز توراعانىڭ ءبىرىنشى ورىنباسارىن سايلاۋىمىز كەرەك. جانىمدا وتىرعان تالعات ماماشەۆ 2004 جىلدان باستاپ اتقارىپ كەلەدى. ءبىراز جۇمىس ىستەلدى. تالعات اسىل ۇلىنىڭ جەمىستى جۇمىسى ءۇشىن ريزاشىلىعىمدى ءبىلدىرىپ, راحمەت ايتامىن. سىرتتاعى وتانداستارىمىزبەن رۋحاني-مادەني بايلانىستار نىعايا ءتۇستى. مەن ەندى وسى ورىنعا زاۋىتبەك تۇرىسبەكوۆتى ۇسىنعىم كەلەدى. تاۋەلسىزدىك جىلدار ىشىندە مەنىڭ تاپسىرماممەن تالاي جاۋاپتى قىزمەتتەر اتقاردى. ىسىلعان, تاجىريبەلى. جالپى سىرتتاعى اعايىننىڭ ءومىر ءسۇرۋى مەن ءجۇرىس-تۇرىسىمەن جەتە تانىس ەڭ نەگىزگىسى - قانداستارىمىز ەڭ كوپ تۇراتىن رەسەي مەن وزبەكستاندا ەلشى بولدى. ولاردىڭ جاعدايىن جاقسى بىلەدى», – دەگەن پرەزيدەنت كوپشىلىك داۋىسقا سالدى. قۇرىلتاي دەلەگاتتارى زاۋىتبەك تۇرىسبەكوۆتىڭ كانديداتۋراسىن ءبىراۋىزدان قولداپ داۋىس بەردى.
«ۇلكەن سەنىمگە كوپ راحمەت. بۇل قىزمەت ءار قازاققا بولەك دۇنيە. مەن كوپ سويلەمەيمىن, ءىس بىلەمىن. ەرتەڭگى كۇنى بارىنشا ىسپەن دالەلدەيمىن»,– دەدى توراعانىڭ جاڭا ءبىرىنشى ورىنباسارى زاۋىتبەك تۇرىسبەك.
ەستەرىڭىزگە سالا كەتسەك, 2004 جىلى قازاقستان رەسپۋبليكاسىنىڭ پرەزيدەنتى, دۇنيەجۇزى قازاقتارى قاۋىمداستىعىنىڭ تورالقا توراعاسى ن.ءا.نازارباەۆتىڭ شەشىمىمەن قاۋىمداستىق تورالقا توراعاسىنىڭ ءبىرىنشى ورىنباسارى مىندەتى ت.ا.ماماشەۆقا جۇكتەلگەن بولاتىن.
زاۋىتبەك قاۋىسبەك ۇلى تۇرىسبەكوۆ 1951 جىلى 15 جەلتوقساندا وڭتۇستىك قازاقستان وبلىسى تۇلكىباس اۋدانىندا دۇنيەگە كەلگەن. قازاق حيميا-تەحنولوگيالىق ينستيتۋتىن جانە الماتى جوعارى پارتيا مەكتەبىن بىتىرگەن.
1993-1997 جىلدارى وڭتۇستىك قازاقستان وبلىسىنىڭ اكىمى, 1997 جىلعى جەلتوقساننان - قر كوشى-قون جانە دەموگرافيا اگەنتتىگىنىڭ توراعاسى, 1999 جىلعى قاڭتاردان - قر پرەزيدەنتى اكىمشىلىگى باسشىسىنىڭ ورىنباسارى - قر پرەزيدەنتى اكىمشىلىگى ۇيىمداستىرۋ-باقىلاۋ ءبولىمىنىڭ مەڭگەرۋشىسى, 2000 جىلدان - قر مەملەكەتتىك قىزمەت ىستەرى اگەنتتىگىنىڭ توراعاسى, 2003 جىلدان - قر ىشكى ىستەر ءمينيسترى. 2005 جىلدان قر مەملەكەتتىك قىزمەت ىستەرى اگەنتتىگىنىڭ توراعاسى, 2007 جىلدان - قر-نىڭ وزبەكستانداعى توتەنشە جانە وكىلەتتى ەلشىسى, 2009 جىلعى تامىزدان - قر-نىڭ رەسەيدەگى توتەنشە جانە وكىلەتتى ەلشىسى, 2012 جىلعى ساۋىردەن قر-نىڭ ۋكرايناداعى توتەنشە جانە وكىلەتتى ەلشىسى, قر-نىڭ مولدوۆا رەسپبۋليكاسىنداعى توتەنشە جانە وكىلەتتى ەلشىسى قىزمەتىن قوسا اتقارۋشى بولدى.
ايا ءومىرتاي,
«ەگەمەن قازاقستان»
