ەلباسى ءوز سوزىندە لاتىن الىپبيىنە كوشۋ تۋرالى ايتتى. پرەزيدەنتتىڭ اتۋىنشا, لاتىن الىپبيىنە كوشۋ - انا ءتىلىمىزدىڭ جاھاندىق عىلىم مەن بىلىمگە كىرىگۋىن, رۋحاني تۇتاستىعىن قامتاماسىز ەتەتىن بىرەگەي قادام.
"تمد ەلدەرى كيريلليتسا, قىتايداعى قانداستارىمىز - توتە جازۋ, باتىس ەلدەرىندەگى باۋىرلارىمىز لاتىن ءارپىن قولدانادى. سوندا, سويلەسكەندە ءتىلىمىز ءبىر بولعانىمەن, وقىعاندا ءتىلىمىز ءۇش ءتۇرلى. ءبىر-ءبىرىمىزدى تۇسىنە المايمىز. جازۋىن ۇقپايمىز. بۇل ءبىر جاعىنان, جەر جۇزىنە تارىداي شاشىلعان قازاقتىڭ كەيىنگى ۇرپاعىن ءبىر-بىرىنەن الىستاتادى. ەكىنشى جاعىنان, عىلىم مەن تەحنيكاعا, ينتەرنەتكە لاتىن ءارپى كەرەك", - دەدى نۇرسۇلتان نازارباەۆ.
مەملەكەت باسشىسى لاتىن الىپبيىنە كوشۋ الەمنىڭ تۇكپىر-تۇكپىرىندەگى قازاقتاردى رۋحاني جاقىنداستىرا تۇسەتىنىن اتاپ ءوتىپ, ءوزىنىڭ جولداۋىندا 2025 جىلعا دەيىن بۇل ماسەلەگ مەجە قويۋىن تاپسىرعانىن ايتتى.
"بىراق ونى سوزا بەرۋدىڭ قاجەتى جوق دەپ ويلايمىن. ءبىزدىڭ عالىمدارىمىز ءتيىستى ءارىپتىڭ بىزگە كەرەك ۇلگىلەرىن تۇرىك جانە باسقا لاتىن ارپىنە كوشكەن ازەربايجان, وزبەكستان ۇلگىلەرىنە قاراپ وتىرىپ, كەمشىلىكتەرىن ەسكەرە وتىرىپ, بىزگە كەرەكتى الىپپەنى تاڭداپ الۋى كەرەك. مەنىڭشە, قيىندىعى جوق. سەبەبى, 1 سىنىپتان باستاپ بارلىق بالالارىمىز اعىلشىن تىلىندە وقيدى. بارلىق مەكتەپتەردە اعىلشىن ءتىلى وقىتىلادى. ولاردا لاتىن ءارپى قولدانىلادى.ء وسىپ كەلە جاتقان ۇرپاققا ونىڭ ەشقانداي قيىندىعى جوق. بىزگە دە ونشا قيىنشىلىعى جوق دەپ ويلايمىن. كەيبىر اعايىنداردىڭ ءبىزدىڭ شىعارمالارىمىز نە بولادى دەپ قىنجىلاتىنى بار. قازىرگى ينتەرنەت زامانىندا ەشقانداي پروبلەما جوق", - دەدى ەلباسى.
ءوز سوزىندە پرەزيدەنت شەتەلدەگى جانە ەلگە كوشىپ كەلگەن اعايىنداردى قولداۋ ءۇشىن وتانداستار قورى قۇرىلاتىنىن ايتتى.
«قانداستارعا مەملەكەت پەن قوعام تاراپىنان جان-جاقتى قولداۋ, كومەك جاساۋ ءۇشىن شەتەلدەگى جانە ەلگە كوشىپ كەلگەن اعايىنداردى قولداۋ ءۇشىن «وتانداستار» دەگەن قور قۇرامىز. مەن ونى ۇكىمەتكە تاپسىراتىن بولامىن», - دەدى نۇرسۇلتان نازارباەۆ.
سونىمەن قاتار پرەزيدەنت "بولاشاققا باعدار: رۋحاني جاڭعىرۋ" اتتى باعدارلاما اياسىندا گۋمانيتارلىق باعىتتاعى ەڭ ۇزدىك 100 وقۋلىق قازاق تىلىندە شىعارىلاتىندىعىن, بۇل قازاقستاندىقتار ءۇشىن عانا ەمەس, بۇكىل دۇنيەجۇزىندەگى قازاقتارى ءۇشىن ماڭىزدى جوبا ەكەندىگىن اتاپ ءوتتى.
"رۋحاني قۇندىلىقتاردى, گۋمانيتارلىق بىلىمدەردى, وقۋلىقتاردى, شەت تىلدەرىنەن, اعىلشىننان ورىسشاعا, ورىس تىلىنەن قازاقشاعا اۋدارعانشا 10-15 جىل وتەدى. سوندىقتان ءبىز ەڭ كەرەكتى 100 وقۋلىقتى شىعارۋ ماسەلەسىن الدىمىزعا قويىپ وتىرمىز. ەندى قانداستارىمىز قاي ەلدە تۇرعانىنا قاراماستان دۇنيەدەگى ەڭ تاڭداۋلى بىلىممەن انا تىلىندە سۋسىندايتىن بولادى دەپ ەسەپتەيمىز", - دەي كەلە ەلباسى قۇرىلتايعا قاتىسۋشىلاردىڭ بارلىعىن بۇل جوباعا بەلسەنە قاتىسۋعا شاقىردى.
ەستەرىڭىزگە سالا كەتەيىك, ءدال قازىر استاناداعى تاۋەلسىزدىك سارايىندا دۇنيەجۇزى قازاقتارىنىڭ بەسىنشى قۇرىلتايى وتۋدە. وعان 750-دەن استام دەلەگات كەلدى. ونىڭ ىشىندە الەمنىڭ 39 ەلىنەن 350 دەلەگات قاتىسۋدا.
گۇلنۇر قۋانىشبەكقىزى,
"ەگەمەن قازاقستان"
سۋرەتتى تۇسىرگەن ەرلان وماروۆ,
"ەگەمەن قازاقستان"
