جىل سايىن قازاق ءتىلى مەن ادەبيەتى ءپانى بويىنشا سىنعا ءتۇسىپ, داستۇرگە اينالعان وليمپيادا بيىل دۇنيەجۇزى قازاقتارىنىڭ قۇرىلتايى قارساڭىندا اقتوبە قالاسىندا جالاۋىن كوتەردى. «دارىن» عىلىمي پراكتيكالىق ورتالىعى ۇيىتقى بولعان وليمپيادا ق.جۇبانوۆ اتىنداعى اقتوبە مەملەكەتتىك ۋنيۆەرسيتەتىندە ەكى كەزەڭ بويىنشا ءوتتى.
ورتالىقتىڭ ديرەكتورى شولپان قيراباەۆانىڭ ايتۋىنشا, «قازاقستان – اتاجۇرتىم, قاسيەتىم, انا ءتىلىم» اتتى كەزەكتى XIV حالىقارالىق وليمپيادا سايىسى ەكى كەزەڭنەن تۇرادى. ءبىرىنشىسى, جازباشا شىعارماشىلىق جۇمىستار, ەكىنشى كەزەڭ اۋىزشا اڭگىمە تۇرىندەگى سىن. وسىعان وراي قىتاي, يران, وزبەكستان, موڭعوليا جانە رەسەيدەن كەلگەن وقۋشىلار ءبىرىنشى كەزەڭگە ساي جازبا جۇمىستارىن قازىلار القاسىنىڭ نازارىنا ۇسىندى. وسى تۇستا ونىڭ قۇرامى ەلىمىزدەگى ەليتارلىق جوعارى وقۋ ورىندارىنىڭ بىلىكتى پروفەسسورلارى مەن عىلىم دوكتورلارى جانە كانديداتتارى اراسىنان ىرىكتەلگەنىن ايتا كەتكەن ءجون. مۇنىڭ ءوزى جۇمىس قورىتىندىلارىن باعالاۋ ىسىنە ۇيىمداستىرۋشىلار تاراپىنان ۇلكەن ءمان بەرىلگەنىن كورسەتەدى. قازىلار القاسىنىڭ توراعاسى, بەلگىلى عالىم قۇلبەك ەرگوبەك:
«بۇگىندە وليمپيادانىڭ تۇرلەرى كوبەيدى عوي. دەگەنمەن, ءمانى مەن ماڭىزى جاعىنان جانە شەت ەلدەگى قانداستارىمىزدىڭ جوعالتا باستاعان ۇلتتىق قۇندىلىقتارىن تۇگەندەۋدە بۇل وليمپياداعا ەشقانداي باعا جەتپەيدى. حالىقارالىق دەڭگەيدەگى باق سىناۋعا قاتىساتىن وقۋشىلاردىڭ ءبارى دە شەت ەلدەردە وقيتىن قازاق دياسپورالارىنىڭ بالالارى. سوندىقتان, كوميسسيا مۇشەلەرى ولاردىڭ شىعارماشىلىق قىزمەتىنە ءسال جەڭىلدىكپەن قاراعانى ءجون. ويتكەنى, وزگە مەملەكەتتەردەگى پاندەر باعدارلاماسى مەن ەلىمىزدەگى باعدارلامانىڭ ءبىراز ايىرماشىلىعى بار», دەدى.
بۇل وليمپياداعا قاتىسۋشىلاردىڭ ەشقايسىسى دا ۇتىلمايدى. ويتكەنى, جەڭىمپازدار قازاقستانداعى جوعارى وقۋ ورىندارىنىڭ بىرىنە گرانتپەن قابىلدانادى. بۇل وليمپياداعا شەت ەلدەگى قازاق دياسپورالارىنىڭ بالالارى جەتى سىنىپتان باستاپ قاتىسا الادى. ال گرانتتار تەك جوعارى سىنىپتا وقيتىن وقۋشىعا بەرىلەدى.
سوڭعى جىلدارى داستۇرگە اينالعان وليمپيادانىڭ جەڭىمپازدارىنا گرانت بولۋگە اباي اتىنداعى قازاق ۇلتتىق پەداگوگيكالىق ۋنيۆەرسيتەتى, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى, ق.ياساۋي اتىنداعى حالىقارالىق قازاق-تۇرىك ۋنيۆەرسيتەتى مەن باسقا دا جوعارى وقۋ ورىندارى قولداۋ كورسەتىپ كەلەدى.
تەمىر قۇسايىن,
«ەگەمەن قازاقستان»
اقتوبە
