قازاقستاننىڭ دەپوزيتتەرگە كەپىلدىك بەرۋ قورى بەكىتكەن, تەڭگەمەن سىياقى مولشەرلەمەسىنىڭ ۇسىنىلعان ەڭ جوعارى جىلدىق 14 پايىزدىق دەڭگەيى وزگەرىسسىز قالادى. بۇل تۋرالى جۋرناليستەردىڭ سالىمدار بويىنشا مولشەرلەمەلەردىڭ جوسپارلى وزگەرۋى تۋرالى سۇراعىنا جاۋاپ بەرە وتىرىپ قر ۇلتتىق بانكىنىڭ توراعاسى دانيار اقىشەۆ حابارلادى. اقىشەۆتىڭ ايتۋىنشا, دەپوزيتتەر بويىنشا پايىزدىق مولشەرلەمە ەلدەگى ينفلياتسيا دەڭگەيىنە, بانكتەردەگى وتىمدىلىك جاعدايىنا, ەلدەگى ماكروەكونوميكالىق احۋالعا, سونداي-اق بانكتەردىڭ شىعىستارى مەن تاۋەكەلدەرىنە قاراي قالىپتاسادى. "دەپوزيتتەر بويىنشا مولشەرلەمەلەردىڭ تومەندەپ جاتقانىن بايقاپ وتىرمىز جانە ءبىز مۇنداي پروتسەستى قۇپتايمىز, - دەدى ول. - بانك سەكتورىندا وتىمدىلىكتىڭ قولايلى جاعدايى ساقتالعان, سونداي-اق ينفلياتسيالىق پروتسەستەر تومەندەگەن جاعدايدا, دەپوزيتتەر بويىنشا مولشەرلەمەلەر ودان ءارى تومەندەۋى مۇمكىن. قدكق "شەكتى مولشەردى" بەلگىلەدى, ودان جوعارى كوتەرۋگە بولمايدى, تومەن تۇسكەنىن قولدايمىز".
سونداي-اق, اقىشەۆ اقپاراتتىق اگەنتتىكتەردىڭ رەداكتورلارىمەن وتكەن كەزدەسۋدە قايتارىمسىز دەپوزيتتەر تاقىرىبىن دا قوزعادى. "كەز كەلگەن دەپوزيت تالاپ ەتكەنگە دەيىنگى دەپوزيت بولىپ تابىلادى. قر ازاماتتىق كودەكسىنە سايكەس كەز كەلگەن بانك 3 كۇن ىشىندە سالىمشىعا دەپوزيتتى قايتارۋعا مىندەتتى. بۇل نورما بانك پەن سالىمشى اراسىنداعى ءوزارا قارىم-قاتىناستى ايتارلىقتاي ورنىقسىز ەتەدى", - دەپ سانايدى اقىشەۆ, سونىمەن بىرگە ول, قازىرگى ۋاقىتتا ۇلتتىق بانك ەكىنشى دەڭگەيدەگى بانكتەرمەن تالقىلاۋدى ەسكەرە وتىرىپ, قاراجاتىن مەرزىمىنەن بۇرىن الماۋ تالابىمەن بانككە جاڭادان قاراجات سالۋعا دايىن سالىمشىلار ءۇشىن ىڭعايلى قايتارىمسىز دەپوزيتتەر ەنگىزۋدىڭ وڭتايلى ۇلگىسى جونىندەگى ماسەلەنى پىسىقتاپ جاتقانىن دا اتاپ ءوتتى. بۇل سالىمداردى ولاردىڭ مەرزىمى اياقتالمايىنشا الۋعا بولمايتىنىن, بىراق وسىنداي شەكتەۋ ءۇشىن سىياقى مولشەرى دە جوعارى بولاتىنىن بىلدىرەدى.
"ول ءۇشىن زاڭنامانىڭ كەيبىر نورمالارىن اۋىستىرۋ قاجەت. قانداي دەپوزيت تاڭدايتىنىن سالىمشى ءوزى شەشۋگە ءتيىس, بىراق قايتارىمسىز دەپوزيتتەردى ەنگىزۋدىڭ قولدانىستاعى دەپوزيتتەرگە قاتىسى بولمايدى. قايتارىمسىز دەپوزيتتەر بويىنشا مولشەرلەمە مەن كەپىلدىك بەرىلگەن سوما جوعارى بولۋعا ءتيىس. وسى ماسەلەلەردى ءبىز تالقىلاۋدامىز جانە وسى جوبانى ىسكە اسىرۋعا تۇجىرىمدامالىق تۇرعىدان دايىنبىز", - دەدى اقىشەۆ.
ول الەمدىك پراكتيكادا سالىمشىلارعا اقشا قاراجاتىن اناعۇرلىم تارتىمدى كىرىستىلىكپەن, قوسىمشا قورعاۋ تەتىكتەرىمەن ۇزاق مەرزىمگە جيناقتاۋ مۇمكىندىگىن بەرۋ قايتارىمسىز دەپوزيتتەردىڭ نەگىزگى ارتىقشىلىقتارى بولىپ تابىلاتىنىن اتاپ ءوتتى. "سونىمەن بىرگە بانكتەر ءۇشىن مۇنداي قۇرالدىڭ بولۋى نەعۇرلىم ورنىقتى قورلاندىرۋ بازاسىنىڭ قالىپتاسۋىنا, وتىمدىلىك تاۋەكەلىن تومەندەتۋگە جانە ۇزاق مەرزىمدى پەرسپەكتيۆاعا كرەديتتەۋگە ىقپال ەتەتىن بولادى", - دەپ مالىمدەدى دانيار اقىشەۆ.