بۇل قۇرىلىستىڭ العاشقى كەزەگى «نۇرلى جەر» باعدارلاماسىنىڭ قاناتقاقتى جوباسى اياسىندا بوي كوتەرىپ كەلەدى. اتالعان اۋقىمدا جالپى سانى 2529 وتباسى قونىس تويلارىن تويلاماق. قۇرىلىستىڭ العاشقى كەزەگى بويىنشا بەلگىلەنگەن جيىرما ءۇي الدىمىزداعى تامىز-قىركۇيەك ايلارىندا تاپسىرىلادى دەپ كۇتىلۋدە. ال ونىڭ ەكىنشى كەزەگىندە 194 از قاباتتى تۇرعىن ءۇي سالىنباق.
«نۇرلى جەر» باعدارلاماسى اياسىندا جۇرگىزىلىپ جاتقان جەكە تۇرعىن ءۇي قۇرىلىسىنا جەرگىلىكتى قۇرىلىس ماتەريالدارى قولدانىلادى. بۇل ءوز كەزەگىندە قۇرىلىستىڭ وزىندىك كۇنىنىڭ ارزان بولۋىنا سەپتىگىن تيگىزەدى. ءارى وڭىردە قۇرىلىس يندۋسترياسىنىڭ بۇرىن-سوڭدى بولماعان كەڭ دەڭگەيدە دامۋىنا العىشارت قالايدى. وسى ارقىلى قۇرىلىس ماتەريالدارىن شىعاراتىن مەنشىك نىساندارىن ءجۇز پايىز جۇكتەمەمەن قامتۋعا جول اشىلادى. «نۇرلى جەر» باعدارلاماسىنىڭ ەل-جۇرتقا تيگىزەتىن باستى شاپاعاتىنىڭ ءبىرى – جەر تەلىمدەرىن الۋ ءۇشىن كەزەككە تۇرعان ازاماتتاردىڭ كەزەگىن قىسقارتۋعا مۇمكىندىك بەرەدى. بۇگىنگى كۇنى وبلىس ورتالىعىندا 111 مىڭ 570 ادام جەر تەلىمى كەزەگىندە تۇرعانىن ەسكەرسەك – بۇل ماسەلەنىڭ قانشالىقتى كۇردەلى, قانشالىقتى وزەكتى جانە قانشالىقتى كوكەيكەستى ەكەندىگىن بايىپتاۋ اسا قيىنعا تۇسپەيدى.
ءبىر سوزبەن ايتقاندا, «نۇرلى جەر» باعدارلاماسى اياسىندا باسپانالى بولعاندار ء«بىر وقپەن ەكى قوياندى اتادى», ياعني ولار جەر تەلىمىنە دە, تۇرعىن ءۇي كىلتىنە دە ءبىر مەزگىلدە قاتار يە بولا الادى. ءسىرا, مۇنداي مۇمكىندىك ەگەمەن ەلىمىزدىڭ ارعى-بەرگى تاريحىندا بۇرىن-سوڭدى بولىپ كورمەگەن شىعار. مىنە, «نۇرلى جەردىڭ» شاپاعاتى! الگىندە ايتىپ وتكەنىمدەي جەر تەلىمى كەزەگىندە تۇرعاندار سانى از ەمەس. ونى تەك از قاباتتى تۇرعىن ءۇي تۇرعىزۋ ارقىلى ازايتۋ ەش مۇمكىن ەمەس. سوندىقتان دا, وڭىردە وسى ءتۇيىندى دە تۇيتكىلدى ماسەلەنى وڭتايلى شەشۋدىڭ وزگە دە جولدارى قاراستىرىلۋدا. ايتالىق, جەر كەزەگىنە 2006 جىلى تۇرعان تۇرعىنداردىڭ ءبىراز بولىگى «نۇرلى جەر» باعدارلاماسى بويىنشا تۇرعىن ءۇي الۋعا ءوتىنىش بەرىپ وتىر. ولاردىڭ قۇجاتتارى – «تۇرعىن ءۇي قۇرىلىس جيناق بانكىنە» جولداندى. بيىل وبلىس ورتالىعىنىڭ ينجەنەرلىك-كوممۋنيكاتسيالىق ينفراقۇرىلىمىن دامىتۋ باعدارلاماسى بويىنشا 36 جوبانى جۇزگە اسىرۋ بەلگىلەنگەن. وسى جوبالاردىڭ بىرقاتارى جەكە تۇرعىن ءۇي قۇرىلىسى ماسەلەلەرىنە باعىتتالعان. قازىرگى كەزدە وسى باعىتتاعى ۋچاسكەلەرگە ينجەنەرلىك جەلىلەر جۇرگىزۋ ءىسى باستالدى. ونىڭ ءبارى «نۇرلى جەر» باعدارلاماسى بويىنشا بوي كوتەرمەك. بۇگىنگى كۇنى اقتوبە قالاسىندا «نۇرلى جەر» شەڭبەرىندە تۇرعىن ءۇي سالۋشىلاردى ىنتالاندىرۋ شارالارى قولعا الىندى. بۇل باعىت بويىنشا «تۇرعىن ءۇي قۇرىلىس جيناق بانكى» اق وبلىستىق فيليالى, «سبەربانك» جانە «سوللەرس» جشس اراسىندا ءتيىستى كەلىسىمگە قول قويىلدى. مۇنىڭ ءوزى رەسپۋبليكا وبلىستارى اراسىندا جۇزەگە اسقان تۇڭعىش ىنتىماقتاستىق تۋرالى كەلىسىم ەكەنىن ايتقان ءجون. وبلىستا سوڭعى بەس ايدا «نۇرلى جەر» باعدارلاماسى بويىنشا 204 مىڭ شارشى مەتر تۇرعىن ءۇيدى پايدالانۋعا بەرۋ كەستەسى بۇزىلعان جوق. «تۇرعىن ءۇي قۇرىلىس جيناق بانكى» اق-نىڭ اقتوبە وبلىستىق فيليالىنىڭ ديرەكتورى باۋىرجان جۋاسباەۆ سالىمشىلار ءوز پاتەرلەرىنە قولجەتىمدى نەسيە ارقىلى يە بولا الاتىنىن مالىمدەپ وتىر. بۇگىنگى كەزدە وبلىستا «نۇرلى جەر» باعدارلاماسى اياسىندا بوي كوتەرىپ جاتقان نەسيەلىك تۇرعىن ءۇي قۇرىلىستارى قارقىندى جۇرگىزىلۋدە.
سەرىك تولەنبەرگەنوۆ,
اقتوبە وبلىستىق قۇرىلىس, ساۋلەت جانە قالا قۇرىلىسى باسقارماسىنىڭ باسشىسى
