كاسىپكەرلىكتىڭ كوكجيەگىن كوتەرۋ ءىسى دە وسى قاتاردا تۇر. بيىلعى جولداۋدىڭ باستى وزگەشەلىگى – بۇل ماسەلەلەردىڭ الەمدىك اۋقىمداعى بۇگىنگى زامانعى ۇردىستەرمەن تىعىز ۇشتاستىرىلۋىندا. اقتوبە وبلىسى كاسىپكەرلەرى پالاتاسىنىڭ ديرەكتورى نۇرلىبەك مۇقانوۆپەن اڭگىمە وسى باعىتتا ورىستەدى.
– ءبىز ەلباسىنىڭ سارابدال ساياساتىنىڭ ارقاسىندا بۇگىنگى زامانعى, قاشاندا دوستىققا ارقا سۇيەيتىن, كىم-كىمگە دە اشىق تۇردەگى قازاقستاندى قۇرۋ جولىندامىز. جولداۋداعى كەلەلى مىندەتتەر جۇمىستارىڭىزعا سەرپىن بەرە الدى ما؟
– وتە ورىندى سۇراق قويىپ وتىرسىز. بۇگىنگى كۇنى الەمدىك قاۋىمداستىق ءبىزدى دامۋشى ءارى بولاشاعى زور ەل رەتىندە تاني باستادى. ەگەر ويىمدى اڭگىمەمىزدىڭ باستى تاقىرىبى بيزنەسكە قاراي بۇرسام, بۇگىنگى كۇنى «ماde in Kazakhstan» دەگەن تاۋارلىق بەلگى سوعىلعان ازىق-ت ۇلىك ونىمدەرى بارشا الەم جۇرتشىلىعىنا ۇسىنىلا باستادى دەسەم, شىندىقتان الشاق كەتە قويماسپىن. مۇنى بىرىنشىدەن مەملەكەت باسشىسىنىڭ وتاندىق ءونىمدى قولداي ءبىلۋىنىڭ ناتيجەسى ءارى وعان دەگەن شىن جاناشىرلىعىنىڭ كورىنىسى دەپ ۇعىنۋىمىز كەرەك شىعار. ءسوز جوق, مۇنداي قولداۋ اگروونەركاسىپ كەشەنىن قوسا العانداعى وڭدەۋ ونەركاسىبى سالاسىنداعى كاسىپكەرلىكتى دامىتۋعا ۇلكەن سەپتىگىن تيگىزە الادى.
– جولداۋدا كورسەتىلگەن ەكىنشى باسىمدىق بيزنەس-ورتانى تۇبەگەيلى جاقسارتۋ جانە كەڭەيتۋ ەكەنى بەلگىلى. سونىمەن بىرگە, پرەزيدەنت ەلدىڭ ىشكى جالپى ونىمىندەگى شاعىن جانە ورتا بيزنەستىڭ ۇلەسىن 2050 جىلعا قاراي كەم دەگەندە ەلۋ پايىزعا جەتكىزۋ مىندەتىن قويدى. وسى وتە ءورشىل ماقساتقا بايلانىستى نە ايتار ەدىڭىز؟
– مەنىڭ ويىمشا, ءدال وسى باسىمدىقتا وتاندىق بيزنەستى دامىتۋدىڭ بارلىق جيناقتاۋشى فاكتورلارى تۇگەلگە دەرلىك قامتىلعان. كاسىپكەرلەر پالاتاسىندا قىزمەت جاساي ءجۇرىپ مەن ءىس جۇزىندە قارجىلىق قولجەتىمدىلىك ماسەلەلەرىمەن كۇن سايىن بەتپە-بەت كەلىپ ءجۇرمىن. بيزنەس ورتانىڭ وكىلدەرىنە ءار ءتۇرلى نەگىزسىز تالاپ قويعىسى كەلەتىن تەكسەرۋشى ورگاندار دا كەزدەسىپ تۇرادى. ءتىپتى ەكى ارادا قوسىمشا جۇكتەمە ارقالايتىن ساتتەرىمىز دە جەتكىلىكتى. سونداي-اق, ءار ءتۇرلى تەكسەرۋشى ورگانداردىڭ تىم بىرجاقتى شەشىم قابىلدايتىن كەزدەرى دە ورىن الىپ تۇرادى. مۇنداي جاعدايدا كاسىپورىننىڭ كەلەشەكتەگى تاعدىرى كۇماندى بولىپ قالا بەرمەك. ايتايىن دەگەنىم – بيزنەس وكىلدەرىنە الاڭسىز ءونىم وندىرۋگە جاعداي تۋعىزىلسا, ەلباسى ايتقانداي كورسەتىلگەن مىندەتكە قول جەتكىزۋگە ابدەن بولادى.
قالاي دەگەندە دە قازىرگى كۇنگە دەيىن بيزنەستىك ورتادا جۇرگەندەردىڭ زاڭسىز تالاپ-تىلەكتەرى بىرقاتار جاعدايلاردا اياقسىز قالىپ كەلگەنى جاسىرىن ەمەس. ەگەر ناقتى مىسالعا كەزەك بەرسەم, وتكەن جىلى وڭىردە كاسىپكەرلەر ۇسىنىستارىنىڭ دەنى پروكۋراتۋرا ورگاندارى تاراپىنان قولداۋ تاۋىپتى. ءسويتىپ, بيزنەسمەندەردىڭ زاڭدى قۇقىقتارى قالپىنا كەلتىرىلىپتى. ءبىزدىڭ پالاتا 2013 جىلدىڭ قازان ايىندا قۇرىلعان ەدى. سودان بەرى سوت ساتىلارى ارقىلى 6,5 ميلليارد تەڭگەنىڭ م ۇلىكتىك قۇقى قورعالىپتى. مەملەكەت باسشىسى ءوز جولداۋىندا ۇكىمەتكە «اتامەكەن» ۇلتتىق كاسىپكەرلىك پالاتاسىمەن بىرلەسىپ, بيزنەستىڭ بارلىق شىعىنىن جاپپاي ازايتۋ جونىندە شارالار قابىلداۋ كەرەكتىگى جونىندە تاپسىرما بەرگەنى ۇلكەن سەنىم تۋعىزادى. مۇنداي جاعدايدا ەل ەكونوميكاسىنداعى شاعىن جانە ورتاشا بيزنەستىڭ ۇلەسىن پرەزيدەنت كورسەتكەن مەجەگە جەتكىزۋ مۇمكىندىگى دە ءبىرشاما جاقىنداي تۇسەدى.
