– استانادا ءوتىپ جاتقان ەكسپو-2017 كورمەسى ەكى ەل اراسىنداعى قارىم-قاتىناستى جاڭا ءبىر دەڭگەيگە كوتەرەدى دەپ سەنەمىن. جاھاندىق كورمە بارىسىندا, ياعني 20 ماۋسىمدا فينليانديانىڭ ۇلتتىق كۇنى اتاپ وتىلەدى. وعان ارنايى كەلگەن فين ەلىنىڭ پرەزيدەنتى ساۋلي نينيستە قاتىسادى. دەلەگاتسيانىڭ قۇرامىندا 70-كە جۋىق بيزنەس وكىلدەرى بولادى. ارينە, جوعارى دەڭگەيدەگى كەزدەسۋلەر بولاتىنى انىق. فينليانديا ەكسپو-عا ۇلكەن دايىندىقپەن كەلىپ وتىر, – دەدى قازاقستاننىڭ فينلياندياداعى توتەنشە جانە وكىلەتتى ەلشىسى مۇرات نۇرتىلەۋوۆ.
ەلشىنىڭ ايتۋىنشا, ەكسپو-2017 كورمەسى اياقتالعاننان كەيىن استانا-حەلسينكي اۋە رەيسى الماتى قالاسىنا اۋىستىرىلادى. قازىرگى ۋاقىتتا وسى ماسەلە بويىنشا كەلىسسوزدەر ءوتىپ جاتىر.
ايتا كەتەيىك, فينليانديا سولتۇستىك ەۋروپا ەلدەرى اراسىنان العاش بولىپ 1991 جىلى 30 جەلتوقساندا قازاقستان تاۋەلسىزدىگىن تانىعان ەل. ال 1992 جىلدىڭ 13 مامىرىندا قوس مەملەكەت اراسىندا ديپلوماتيالىق قارىم-قاتىناس ورنادى. ەكى ەل اراسىنداعى تاۋار
اينالىمىنىڭ كورسەتكىشى دە جوعارى دەڭگەيدە. 2014 جىلعى كورسەتكىش 1,1 ملرد دوللاردى قۇراسا, 2015 جىلى 467 ملن دوللارعا تومەندەگەن. ال وتكەن جىلى بۇل كورسەتكىش 342 ملن دوللار بولىپتى.
جيىن بارىسىندا قازاقستاننىڭ شۆەتسيا كورولدىگىندەگى ەلشىسى داستان ەلەۋكەنوۆ ءسوز الىپ, ەكى مەملەكەت اراسىنداعى قارىم-قاتىناستار جايىندا قىسقاشا بايانداپ بەردى.
– ءار جىلدارى ەكونوميكالىق جاعدايلارعا بايلانىستى ساۋدا اينالىمى بىردە تومەندەپ, بىردە كوتەرىلىپ وتىردى. دەگەنمەن, سوڭعى ۋاقىتتا ءبارى جاقسارىپ كەلەدى. وتكەن جىلدىڭ قورىتىندىسى بويىنشا ەكى ەل اراسىنداعى ساۋدا اينالىمى 311 ملن دوللاردى قۇرادى, – دەدى داستان ەلەۋكەنوۆ.
ول, سونداي-اق, قازاقستاننىڭ يادرولىق قارۋعا بايلانىستى ۇستانىمىن شۆەتسيا قولدايتىنىن ەرەكشە اتاپ ءوتتى. قازاق ەلىنە جۇمىس ساپارىمەن كەلگەن شۆەتسيا كورولدىگى پارلامەنتىنىڭ توراعاسى ۋربان الين كەزىندە وسى ماسەلەمەن اينالىسقانىن دا تىلگە تيەك ەتتى. سونىمەن قاتار, ديپلومات كۇزدە ەلباسى نۇرسۇلتان نازارباەۆتىڭ شۆەتسيا كورولدىگىنە رەسمي ساپارمەن باراتىنىن ايتىپ, ەكى ەل اراسىنداعى بايلانىس بۇدان دا جوعارى دەڭگەيگە كوتەرىلەتىنىنە سەنىم ءبىلدىردى.
ايان ءابدۋالي,
«ەگەمەن قازاقستان»
