دوڭگەلەك ۇستەل جۇمىسىنا جوعارعى جانە جەرگىلىكتى سوتتاردىڭ سۋديالارى, باس پروكۋراتۋرانىڭ, ادىلەت مينيسترلىگىنىڭ, ۇلتتىق بانك پەن ەكىنشى دەڭگەيلى بانكتەردىڭ, «اتامەكەن» ۇكپ مەن قازاقستاننىڭ قارجىگەرلەر قاۋىمداستىعىنىڭ وكىلدەرى قاتىستى.
ءىس-شارانى اشا كەلە, جوعارعى سوتتىڭ ازاماتتىق ىستەر جونىندەگى سوت القاسىنىڭ توراعاسى ە.ابدىقادىروۆ پرەزيدەنتتىڭ قازاقستان حالقىنا جولداۋىنداعى نەگىزگى مىندەت رەتىندە زاڭنامانى جاڭا جاعداياتقا ساي بەيىمدەۋدىڭ باسىم مىندەتتەرىنىڭ ءبىرى رەتىندە ايقىندالعانىن اتاپ ءوتتى.
پرەزيدەنت پروبلەمالىق يپوتەكالىق قارىزداردى قايتا قارجىلاندىرۋ باعدارلاماسىنا ەرەكشە نازار اۋدارۋدى تاپسىردى. وسى ورايدا بيىلعى جىلى «بانكتەر جانە بانك قىزمەتى تۋرالى» زاڭعا, قازاقستان رەسپۋبليكاسىنىڭ ازاماتتىق كودەكسىنە وزگەرىستەر مەن تولىقتىرۋلار ەنگىزىلدى. سونداي-اق, كوللەكتورلىق اگەنتتىكتەردىڭ قىزمەتىن رەتتەيتىن «كوللەكتورلىق قىزمەت تۋرالى» زاڭ قابىلداندى.
جوعارىدا اتالعان نورماتيۆتىك اكتىلەردىڭ نورمالارىنا سايكەس, جوعارعى سوتتىڭ باستاماسىمەن بانكتەردىڭ قارىز الۋشىلارعا تالاپ قويۋ مەرزىمى بەس جىل دەپ بەلگىلەنگەن.
دوڭگەلەك ۇستەل بارىسىندا ادىلەت مينيسترلىگىنىڭ زاڭناما دەپارتامەنتى ديرەكتورىنىڭ ورىنباسارى ن.جامالادين, باس پروكۋراتۋرانىڭ 4-دەپارتامەنتىنىڭ جوعارعى سوتتا قاتىسۋىن قامتاماسىز ەتۋ ءبولىمىنىڭ باستىعى ا.يبراەۆا, ۇلتتىق بانكتىڭ قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ جانە سىرتقى كوممۋنيكاتسيالار باسقارماسىنىڭ ورىنباسارى ي.ءال-كەيسي, استانا قالاسى سوتىنىڭ سۋدياسى ش.ءنۇسىپوۆا, الماتى قالالىق سوتىنىڭ سۋدياسى ر.بايشەۆ بايانداما جاسادى.
دوڭگەلەك ۇستەلگە قاتىسۋشىلار جوعارعى سوتتىڭ قۇقىق قولدانۋ ماسەلەلەرىن شەشۋدەگى ماڭىزدى ءرولىن اتاپ ءوتىپ, بانكتىك زاڭنامانىڭ وڭ وزگەرىستەرى جانە قۇقىق قولدانۋ ماسەلەلەرىن تالقىلاۋ مەن ولاردى شەشۋ جولدارىن تابۋعا مۇمكىندىك بەرەتىن وسىنداي ۇلگىدەگى ءىس-شارالاردى وتكىزۋ قاجەتتىگى اتالدى.
دوڭگەلەك ۇستەل جۇمىسىنىڭ سوڭىندا زاڭنامانى جەتىلدىرۋ بويىنشا ءتيىستى ۇسىنىمدار ازىرلەندى.
جولدىباي بازار,
«ەگەمەن قازاقستان»
