ول قىزمەت بابىن جەكە مۇددەسىنە پايدالانىپ, زاڭ تالاپتارىن ورەسكەل بۇزعان. اتاپ ايتقاندا, اۋىلشارۋاشىلىق وندىرىستىك كووپەراتيۆىن قۇرۋعا ىقپال جاساپ, تيەسىلى قاراجاتتى اكەسىنە, ودان قالدى تۋعان-تۋىستارىنا قىلداي ەتىپ ءبولىپ بەرگەن. وسىلايشا 3 ميلليون 96 مىڭ تەڭگە دەمەۋقارجىنى شۇلەن تاراتقانداي ۇلەستىرگەن. كەيىن تەكسەرىس ناتيجەسىندە قاراجات قايتارىلسا دا, شەنەۋنىكتىڭ مەملەكەتتىك قىزمەتشى اتىنا كىر كەلتىرگەن ءىس-ارەكەتىنە قاتاڭ باعا بەرىلىپ, لاۋازىمىنان شەتتەتىلەتىن بولدى.
اقجار اۋداندىق اۋىل شارۋاشىلىعى ءبولىمىنىڭ باسشىسى ءابدىجاپار قيمانوۆ اسىل تۇقىمدى مال وسىرۋمەن اينالىساتىن فەرمەرلەرگە سۋبسيديا بەرۋ تۋرالى قۇجاتقا ەكى رەت قول قويىپ, ءبىر جىلدىڭ ىشىندە 1 ميلليون 800 مىڭ تەڭگەنى قولدارىنا ۇستاتىپ جىبەرگەن. ول شتاتتا ماماندار جەتىسپەيدى, جۇمىس جۇكتەمەسى كوپ, سۋبسيديا العاندارىن بىلمەدىم دەپ سان سىلتاۋ ايتقانىمەن, قىزمەتىنە تولىق ساي ەمەس دەگەن ۇيعارىم شىعارىلدى. ءۋاليحانوۆ اۋداندىق اۋىلشارۋاشىلىق ءبولىمىنىڭ جەتەكشىسى ازامات جاۋاروۆقا دا قىزمەتىنە تولىق ساي ەمەستىگى بەتىنە باسىلدى. ول 13 شارۋاشىلىققا زاڭسىز سۋبسيديا بولگەن.
جەڭىلدىكتى سۋبسيديا, دەمەۋ قارجى بولۋگە, تولەۋگە بايلانىستى زاڭسىزدىقتاردىڭ ءجيى كەزدەسۋىنە قاراعاندا, ءتيىستى ورىندار تاراپىنان باقىلاۋ مەن تالاپتىڭ بوساڭسىعانىن اڭعارۋ قيىن ەمەس.
ال م.جۇماباەۆ اۋدانى ۆوزۆىشەن اۋىلدىق وكرۋگىنىڭ اكىمى قايسار ابىشەۆ مادەنيەت ءۇيىنىڭ شاتىرىن كۇردەلى جوندەۋدەن وتكىزۋ ءۇشىن اشىق كونكۋرس وتكىزۋ تالابىن بىلە تۇرا, ليتسەنزياسى جوق «ۋسپەح سك» جەكە كاسىپكەرلىگىمەن مەملەكەتتىك ساتىپ الۋ جونىندە كەلىسىمشارتقا وتىرعان. وسىنىڭ سالدارىنان قۇرىلىس جۇمىستارى ساپاسىز جۇرگىزىلىپ, 200 مىڭ تەڭگە شىعىن كەلگەن. وسى زاڭسىز ارەكەتى ءۇشىن ول اكىمشىلىك جاۋاپكەرشىلىككە تارتىلىپ, 100 ايلىق ەسەپتىك كورسەتكىش كولەمىندە ايىپپۇل تارتقان. كەڭەس مۇشەلەرى وعان قاتاڭ سوگىس جاريالادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
