قىسقى وليمپيادا دەمەكشى, وسىدان ءتورت جىل بۇرىن سوچيدە وتكەن ويىنداردا ءبىزدىڭ ەل دەنيس تەننىڭ جالعىز عانا قولا جۇلدەسىمەن كوڭىل جۇباتقان. اتالعان دودانى كوزبەن كورگەن مىنا ءبىز سپورتتىق دەلەگاتسيامىزدى باسقارعان ازاماتتاردىڭ سول كەزدە قاتتى ساسقانىنا كۋا بولعان ەدىك. تەننىڭ «قولاسى» بولماسا, ابىرويدان جۇرداي بولادى ەكەنبىز-اۋ دەپ ءبىز دە دەمىمىزدى ىشكە العانبىز. نەسىن ايتاسىز, سول سوچي بىزدەگى قىسقى سپورتتىڭ كەنجەلەپ قالعانىن, قىسىلعاندا قايرات قىلار ۇل-قىزدارىمىزدىڭ جوققا ءتان ەكەندىگىن كوزگە شۇقىپ كورسەتكەن ەدى-اۋ...
جوعارىداعى اڭگىمەمىزگە ورالايىق. «تۋعان اي تۋراعان ەتپەن تەڭ» دەگەن قازاق. انە-مىنە دەگەنشە توعىز ايدىڭ قالاي وتە شىققانىن بىلمەي دە قالامىز. سول سەبەپتى, وسى باستان قامدانباساق بولمايدى. قازاق ەلىنىڭ قىسقى سپورتتا تالاسى بار ورەندەرىنە ءتاستۇيىن دايىندىق كەرەك. ەندىگى ماسەلە مىنادا: ءبىز سوچي-2014 وليمپياداسىنان ساباق الا بىلدىك پە؟
تاياۋدا سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆپەن كەزدەسكەنىمىزدە, اراداعى اڭگىمەمىز قىر استىنداعى قىسقى وليمپياداعا دەگەن دايارلىق بارىسى ارقاۋ بولدى. توراعانىڭ ايتۋىنشا, بۇگىنگى كۇننىڭ وزىندە 62 سپورتشىمىز جولدامادان ۇمىتكەر ەكەن. ال مۇزدا مانەرلەپ سىرعاناۋشى شەبەرلەرىمىزدىڭ ليتسەنزياسى رەسمي تۇردە راستالعان. جولدامانىڭ باسىم بولىگىن الدىمىزداعى 2017-2018 جىلعى ماۋسىمدا وتەتىن حالىقارالىق تۋرنيرلەردە الۋ جوسپارلانىپتى.
بۇدان بولەك, ەل قۇراماسىنىڭ قىسقى وليمپياداعا دەگەن دايارلىعىن تالقىلاعان جيىندا ۇلتتىق وليمپيادا كوميتەتىنىڭ پرەزيدەنتى تيمۋر ق ۇلىباەۆ قالىڭ ۇيقى قۇشاعىندا جۇرگەن فەدەراتسيالاردى وياتۋ كەرەك دەدى. «ۇلتتىق قۇراما كوماندالاردىڭ دايارلىق بارىسىنا ۇلتتىق وليمپيادا كوميتەتى جەتەكشىلىك ەتەتىن بولادى. بىزدە «ۇيقىداعى» فەدەراتسيالار بار, ولارعا قوزعاۋ سالاتىن ۋاقىت جەتتى. بۇل شارۋادان ءمان شىقپاسا, وندا ولاردى اۋىستىرامىز. بىزگە سپورتتىڭ جىلىگىن شاعىپ, مايىن ىشكەندەر عانا ەمەس, سونىمەن قاتار, وسى سالانىڭ دامۋىنا ينۆەستيتسيا قۇيۋعا دايىن ادامدار كەرەك», – دەپ اتاپ ايتتى ق ۇلىباەۆ مىرزا.
ء«ۇش كۇندىگىن ويلاماعان ايەلدەن بەز, ءۇش جىلدىعىن ويلاماعان ەركەكتەن بەز» دەيدى حالىق دانالىعى. مۇنىڭ ءبارى دۇرىس, ارينە. ەرتە باستان قامدانعان – كۇنى ەرتەڭ قاپى قالمايدى. بىراق, وسى جولعى دودادا دەنيس تەننەن باسقا ءۇمىت ارتاتىن كىمىمىز بار, ءوزى؟ كەشەگى وتكەن XXVIII بۇكىلالەمدىك قىسقى ۋنيۆەرسيادا جارىسىندا 11 التىن, 8 كۇمىس جانە 17 قولا مەدالمەن جالپى ەسەپتە تەك قانا رەسەيدى العا جىبەرىپ, مارەنى ەكىنشى بولىپ قيدىق دەپ ماقتانعاندا الدىمەن ماسەلەگە تەرەڭىرەك ءۇڭىلىپ الۋىمىز كەرەك شىعار. بىرىنشىدەن, وليمپيادا مەن ۋنيۆەرسيادانىڭ اراسى جەر مەن كوكتەي. ەكىنشىدەن, ستۋدەنتتەردىڭ سول سايىسىنا قىسقى سپورتتاعى ساڭلاقتارىمىزدىڭ ءبارىن قوستىق. سونىڭ وزىندە كورشىمىزدىڭ شاڭىنا ىلەسە المادىق. ماقتاۋلى دەنيس تەننىڭ دەڭگەيى تومەن بولدى, جارىلقايدى دەپ جۇرگەن جەلاياق قىزىمىز ەكاتەرينا ايدوۆا ايدالادا قالدى, رومان كرەچكە دە ريزا بولمادىق, شورت-ترەكشىلەرىمىز ول – شاڭ جۇتىپ قالدى. بۇلاردى الابوتەن اتاپ وتىرعانىمىزدا سەبەپ بار: اتالعان سپورتشىلار – وليمپيادادا جۇلدە الادى دەپ ءۇمىت ارتقان اينالايىندارىمىز. وسىنىڭ بارىنە قاراپ وتىرىپ, ء«اي, وسى ءبىز سوچيدەن ساباق الا الدىق پا؟», دەگەن ويعا قالاسىڭ...
ءيا, بۇگىنگى كۇندە قازاق سپورتىندا قابىرعالى وزگەرىستەر بولىپ جاتىر. ەسكى جۇيەنىڭ ورنىنا الەمدەگى وزىق تاجىريبەلەرگە سۇيەنگەن ەستى جۇيە كەلدى. مۇندا سپورتتىق فەدەراتسيالارعا مول مۇمكىندىكتەر مەن باسىمدىقتار بەرىلگەن. جالپاق تىلمەن ايتقاندا, ولاردىڭ قاعاناعى قارق, ساعاناعى سارق بولادى. بىراق, سەنىم جۇگى ارتىپ, جاۋاپكەرشىلىك تە كۇشەيگەن. ەستۋىمىزشە, سپورتتىڭ بىرنەشە تۇرىنەن شەتەلدىك ماماندار سپورتشىلارىمىزدى جاتتىقتىرىپ ءجۇر ەكەن.
ۇلتتىق وليمپيادا كوميتەتىنىڭ باسشىسى ەل قۇراما كوماندالارىن تورتجىلدىقتىڭ باستى دوداسىنا دايىنداعاندا كەشەندى-عىلىمي توپتاردىڭ (كعت) ماڭىزدى ءرول اتقاراتىنىنا ەرەكشە ءمان بەرىپ وتىر. دەگەنمەن, وڭىرلەردە قىسقى سپورتتى دامىتپاي, ينفراقۇرىلىمعا ينۆەستيتسيا قۇيماي, شاڭعى مەن كونكيدى تۇسىندە كورەتىن بالالار مەن جاسوسپىرىمدەرگە جاعداي جاسامايىنشا, كوسەگەمىز كوگەرمەيدى. مىنە, ءبىرىنشى كەزەكتە وسىعان ءمان بەرۋ كەرەك. ارتىنان قاۋلاپ وسكەن وڭكەي تالانت تىرەپ تۇرماسا, ات توبەلىندەي از عانا توپپەن الىسقا بارماسىمىز انىق.
قايرات ءابىلدينوۆ,
