ەلوردادا ءتارتىپ نىعايىپ كەلەدى

كەشە استانا قالاسى ءىىد-دە 2009 جىلدىڭ جۇمىس ناتيجەسىن قورىتىندىلاۋ كەڭەسى بولىپ ءوتتى. وتكەن جىلدىڭ 12 ايىندا 3243 قىلمىس تىركەلسە, بۇل 2008 جىلعى تىركەلگەن قىلمىس سانىنان ءبىرشاما از. ويتكەنى, اۋىر جانە اسا اۋىر قىلمىستار ازايعان. كىسى ءولىمى, قاراقشى­لىق, دەنەگە اۋىر زاقىم كەلتىرۋ, بوپسالاۋ مەن توناۋ سانى كەمىگەن. ادام ءولتىرۋ, توناۋ, كولىك ايداپ كەتۋ, بۇزاقىلىق پەن بوتەننىڭ مۇلكىن ۇرلاۋ فاكتىلەرىنىڭ اشىلۋى جاقسارا ءتۇستى. استانا قالاسى ءىىد نەگىزگى جۇمىسىنىڭ ءبىرى – قوعامدىق قاۋىپسىزدىكتى ساقتاۋ, سوندىقتان وسى باعىتتا جۇمىس كۇشەيتىلدى. پوليتسيا ناريادتارىنىڭ جۇمىس رەجىمى جانە ورنالاستىرىلۋ سحەماسى قاراستىرىلىپ, مارشرۋت­تار سانى مەن قالانىڭ شەت ايماقتارىنىڭ قاۋىپسىزدىگىن ساقتايتىن پوليتسيا سانى كوبەيتىلدى. تاۋلىك بويىنا قالاداعى قۇقىقتىق ءتارتىپتى 1000-عا جۋىق پوليتسيا قىزمەتكەرى مەن ىشكى اسكەردىڭ 220 اسكەريلەرى ساقتايدى. قىلمىستى بولدىرماۋ جانە الدىن-الۋ ماقساتىندا جەكە سەكتورلار مەن ساياجايلاردا كۇن سايىن رەيدتىك ءىس-شارالار جۇرگىزىلەدى. قوعامدىق قاۋىپسىزدىكتى ساقتاۋعا 563 ادامنان تۇراتىن “كونسەرج قىز­مەتى”, 11 جوعارى وقۋ ورىندارىنىڭ 352 ستۋ­دەنتىنەن قۇرىلعان 32 جەدەل جاساق, مەملەكەتتىك ەمەس كۇزەت قىزمەتىنىڭ 305 قىزمەتكەرى قاتىسادى. ءىىد ۇسىنىسى بويىنشا قالالىق ەڭبەكپەن قامتۋ جانە الەۋمەتتىك باعدارلاما باسقارماسىندا ەسەپتە تۇرعان 120 جۇمىسسىز ازاماتتار قوعامدىق ءتارتىپتى كۇزەتۋگە شىعادى. ءسويتىپ, 12 ايدا قوعامدىق قۇرىلىم وكىلدەرىنىڭ قاتىسۋىمەن 327 قىلمىس اشىلىپ, 5782 ادام ءار ءتۇرلى قۇقىق بۇزۋشىلىق ءۇشىن ۇستالدى, دەپ حابارلايدى ءىىد ءباسپاسوز قىزمەتى. “ەگەمەن-اقپارات”.