استانادا قايىرىمدىلىق اكتسياسى ءوتتى

استانادا قازاقستاندا جۇمىس ىستەيتىن ەلشىلىكتەردىڭ ۇيىمداستىرۋىمەن قايىرىمدىلىق اكتسياسى ءوتتى. 51 مەملەكەتتىڭ ۇلت وكىلدەرى وزدەرىنىڭ ۇلتتىق تاعامدارى مەن قولدان جاساعان بۇيىمدارىن ساتتى. اكتسيادان تۇسكەن قارجى كومەككە مۇقتاج جاندارعا, جەتىمدەر ۇيىنە اۋدارىلادى. اكتسيا بارىسىندا ۇتىس ويىندارى دا ويناتىلدى. باعى جانعان كورەرمەندەرگە يتاليا مەن ماكەدونياعا جولداما  بەرىلسە, ەندى بىرىنە تۇرمىستىق تەحنيكالار بۇيىردى. - كورەي حالقىنىڭ مادەنيەتى مەن ۇلتتىق تاعامدارىن تانىستىرىپ, قامقورلىق اكتسياسىنا ءوز ۇلەسىمىزدى قوسۋدامىز. وزدەرىڭىزگە بەلگىلى, ەلباسى ن.نازارباەۆ جاقىندا ەلىمىزدىڭ پرەزيدەنتىمەن كەزدەسىپ, ەكىجاقتى كەلىسىمگە قول قويىلعان بولاتىن. بۇل ەكى ەل اراسىندا ءوزارا ىنتىماقتاستىقتىڭ, بىرلىكتىڭ ارقاسى,-  دەيدى كورەيانىڭ قازاقستانداعى وكىلەتتى ەلشىسى حان مان چۋن. ال جاپونيا ەلشىلىگىنىڭ مۇشەسى مەگۋلي كاۆاباتا: "بۇل قايىرىمدىلىق اكتسياسى وسىمەن ونىنشى رەت وتكىزىلىپ وتىر. ءبىزدىڭ ماقساتىمىز وسى شارادان تۇسكەن قارجىنى الەۋمەتتىك جاعىنان كومەككە ءزارۋ ادامدارعا, ەمدەلۋ ورتالىقتارىنا اۋدارۋ. مۇندا  قازاقستاننىڭ مادەنيەتىمەن, ۇلتتىق ونەرىمەن تانىسىپ, ەرەكشە اسەر الىپ جاتىرمىز", - دەدى. ايمان مۇقىشەۆا, "ەگەمەن قازاقستان".