قازاقستان وقۋشىلارى حالىقارالىق زەرتتەۋدە ۇزدىك اتاندى

قازاقستان جاراتىلىستانۋ-ماتەماتيكالىق ءبىلىمنىڭ ساپاسى بويىنشا TIMSS رەيتينگىندە كوشباسشى ەلدەر قاتارىنا ەندى. بۇل تۋرالى ورتالىق كوممۋنيكاتسيالار قىزمەتىندە العاش رەت وتكىزىلگەن جاڭا ۇلگىدەگى اقپاراتتىق كەزدەسۋدە ءبىلىم جانە عىلىم مينيسترلىگىنە قاراستى «اقپاراتتىق-اناليتيكالىق ورتالىعى» اق پرەزيدەنتى سەرىك ىرساليەۆ مالىمدەدى. ونىڭ ايتۋىنشا, زەرتتەۋ ناتيجەلەرىنە سايكەس قازاقستان جاراتىلىستانۋ-ماتەماتيكالىق ءبىلىم ساپاسى بويىنشا كوشباسشى-ەلدەر قاتارىنا ەندى, ال قازاقستاندىق وقۋشىلاردىڭ ناتيجەلەرى الەمدىك ورتاشا كورسەتكىشتەردەن ايتارلىقتاي جوعارى بولىپ شىقتى. «قازاقستاندىق مەكتەپتەردىڭ سەگىزىنشى سىنىپ وقۋشىلارى 2011 جىلعى كورسەتكىشتەرمەن سالىستىرعاندا ماتەماتيكا بويىنشا ناتيجەلەرىن 41 باللعا, جاراتىلىستانۋ عىلىمى بويىنشا 43 باللعا جاقسارتتى. بۇل قازاقستانعا الەمنىڭ 39 ەلى اراسىنان سايكەسىنشە سەگىزىنشى جانە توعىزىنشى ورىنداردى يەلەنۋگە مۇمكىندىك بەردى. سونىمەن قاتار 4 سىنىپ وقۋشىلارىنىڭ كورسەتكەن ناتيجەلەرى دە تاڭ قالدىردى. جاراتىلىستانۋ عىلىمى بويىنشا ورتاشا بالل ءوسىمى 55 بالل, ماتەماتيكا بويىنشا 43 باللدى قۇرادى», – دەپ اتاپ ءوتتى س. ىرساليەۆ. وسىلايشا, حالىقارالىق زەرتتەۋ ناتيجەسى بويىنشا قازاقستان وقۋشىلارى اقش, انگليا, گەرمانيا, كانادا, اۆستراليا, يزرايل, شۆەتسيا, دانيا, نيدەرلاندى, پولشا, چەحيا, ليتۆا, مالايزيا, تۇركيا جانە باسقا دا ەلدەردەن كەلگەن قاتارلاستارىن باسىپ وزعان. TIMSS – بۇل 4 جانە 8 سىنىپ وقۋشىلارىنىڭ جاراتىلىستانۋ مەن ماتەماتيكا عىلىمدارىنان دايىندىق دەڭگەيىن باعالايتىن العاشقى حالىقارالىق زەرتتەۋ. ءتورت جىلدا ءبىر رەت جۇرگىزىلەتىن زەرتتەۋگە 60-تان استام ەل قاتىسادى. ايدار ورىسباەۆ, "ەگەمەن قازاقستان".