«تۇنگى ستۋديادا" ەلباسى اتا-انا الدىنداعى پارىز جايىندا ايتتى

«قازاقستان» ۇلتتىق تەلەارناسىنىڭ «تۇنگى ستۋديادا نۇرلان قويانباەۆپەن» حابارىندا قوناقتا بولعان پرەزيدەنت نۇرسۇلتان نازارباەۆ اتا-انانى قۇرمەتتەۋ, تەلەديداردىڭ قوعام الدىنداعى ماڭىزى جانە «باقىت دەگەن نە؟» اتتى سۇراق توڭىرەگىندەگى ويلارىن ايتتى. «جۇمىس بابىمەن كوپ جەرلەردە بولام عوي. كەيدە قارتتار ۇيىنە دە بارام. سوندا قازاق قارتتارىن كورەم. مەنىڭ جاستاۋ كەزىمدە مۇنداي ورىندا قازاقتىڭ قاريالارى بولماۋشى ەدى. قازىر قازاق قارتتارىن دا كورەتىن بولدىق. جاندارىنا وتىرىپ «بالالارىڭىز بار ما؟» دەپ سۇرايمىن. سوندا ولاردىڭ كوبى «ونى سۇراماي-اق قويىڭىز» دەپ جاۋاپ بەرەدى» دەگەن ەلباسى اتا-انانى قۇرمەتتەۋدىڭ قاندايلىق ۇلى پارىز ەكەنىن ايتتى. «ولارعا ءبىر نارسە ءبولىپ بەرۋ دە قاجەت ەمەس. تەك جاندارىنا ءبىراز وتىرىپ, قۇشاقتاساڭدار, سونىڭ ءوزى ولار ءۇشىن ۇلكەن قۋانىش» دەدى پرەزيدەنت. سونىمەن قاتار نۇرسۇلتان نازارباەۆ تەلەديداردىڭ اعارتۋشىلىق, ادامگەرشىلىككە شاقىرۋ باعىتى باسىم بولۋى كەرەكتىگىن اتاپ ءوتتى. «مەنىڭشە, تەلەديداردىڭ ماقساتى – جاقسى نارسەگە ۇيرەتۋ» دەدى ەلباسى. نۇرسۇلتان نازارباەۆ قاتىسقان «تۇنگى ستۋديا» حابارى شامامەن ون مينۋتقا سوزىلدى.