شىمكەنتتىڭ 12 ايى قالاي وتەدى؟

ءاسىلى, شىمكەنت – ءتۇرلى-ءتۇستى بوياۋدىڭ, قاراما-قارسى رەڭكتەردىڭ قالاسى. مۇندا ءبىر كۇندە كورۋگە بولاتىن قىزىق جانە تانىمدىق نارسەلەردىڭ كوپتىگى سونشا, كەلگەن ادام ءوزىن سول بويدا قازىرگى الماعايىپ زاماننىڭ كەيىپكەرى سەزىنىپ شىعا كەلەدى. بۇل جەردە ءبىر كۇننىڭ ىشىندە ولكەنىڭ تاريحىن زەرتتەۋگە, قاجىلىق ورىندارىنا بارۋعا, تاۋ شىڭىنا شىعۋعا جانە ىشىندە تاڭعالارلىق اعاشتار وسەتىن ۇڭگىرگە تۇسۋگە بولادى. شىنايىلىق تۇنعان شىمقالا سول سەبەپتى دە تۋريزم ءۇشىن وتە-موتە قولايلى شاھار بولىپ تابىلادى. سونىمەن, بۇل قالاعا قادام باسقان ءتۋريستىڭ جىل ون ەكى اي ىشىندە كورەتىن كەرەمەتتەرى جونىندە مالىمەتتەر بەرىپ كورەيىك. قاڭتار. جاڭا جىل مەرەكەسى ارتتا قالعاننان كەيىن وتباسى بولىپ تاۋ اياسىندا جاقسى دەمالىس وتكىزۋگە مۇمكىندىك بار. ال ونداعى سان الۋان قىزىقتار تاۋ شاڭعىسى, سكيتۋر, جاياۋ جورىق, ۆاترۋشكامەن سىرعاناۋ, اتپەن سەرۋەندەۋ, قىمىزبەن ەمدەلۋ, فورەل اۋلاۋ, ساق مونشاسىن كورۋ تۇرىندە جالعاسىپ كەتەر ەدى. اقپان. بۇل اي سپورت اۋەسقويلارى ءۇشىن تاپتىرمايتىن ۋاقىت. بۇل ايدا سونداي-اق ۆەلوساپارلار دا جاندانادى. بۇعان شىمكەنت كليماتىنىڭ جىلىلىعى مۇمكىندىك بەرەدى. بۇعان قوسا, وبلىستىڭ كورىكتى جەرلەرىنە ارنالعان ۆەلوجارىستار ۇيىمداستىرىلادى. ناۋرىز. كوكتەمنىڭ العاشقى ايىندا شىمكەنتتىكتەر جىلدىڭ كەلۋىن تويلاۋعا دايىندالادى. اي ىشىندەگى بۇل تويدى اتاپ ءوتۋدىڭ ەڭ كونە داستۇرلەرىنىڭ ءبىرى – سەيىل قوشقار اتا. مەيرام قوشقار-اتا وزەنىنىڭ باستاۋىندا وتەدى. وندا قوشقارلار جارىسى باستى كورىنىس بولادى. سەيىل قوشقار اتا مەيرامىنا حالىق تاياۋداعى بارلىق وڭىرلەردەن جينالادى. سالماعى كەمىندە 85 كيلو كەلەتىن قوشقارلاردى كوتەرۋ جارىسى قىزىقتى وتەدى. اي ىشىندە بۇدان بولەك, تۇركىستان, وتىرار, سايرام, ساۋران سەكىلدى كونە قالالارعا ساپار جاسالادى. ءساۋىر. قالا تۇرعىندارى مەن قوناقتار قىزعالداقتاردىڭ شەشەك اتقانىن كورە الادى. مۇنىڭ اسەم كورىنىسىن قاراتاۋ ەتەگىندە ورنالاسقان قىزىل تاۋدا كورۋگە بولادى. سول جەردە وسەتىن گرەيگ جانە كاۋفمان قىزعالداقتارى قىزىل كىتاپقا ەنگىزىلگەن, ولار قازىرگى قىزعالداق وسىمدىگىنىڭ ءتۇپ اتاسى بولىپ سانالادى. تاۋدا الپينيزم سپورتى اشىلادى. قالادا وسى كۇندەرى بارد اندەرى فەستيۆالى, دجاز جانە ۆىسوتسكيدى ەسكە الۋ كونتسەرتتەرى وتەدى. بۇل ونەر مەرەكەسىنە اۆتورلىق اندەر يەلەرى مەن ورىنداۋشىلار, سونداي-اق تاياۋ شەتەلدىكتەر قاتىسا الادى. مامىر. بۇل اي – باسىن قار جاتقان تاۋدا جورىق جاساۋ ءۇشىن ەڭ قولايلى ۋاقىت. شىمكەنتتىكتەر ءۇشىن ءداستۇرلى دەمالىس كۇندەرىن قالادان 40 شاقىرىم جەردەگى قازىعۇرت تاۋىندا وتكىزۋگە قۇمار. اڭىزداردا نۇح كەمەسى توقتاعان دەلىنەتىن مۇيىستە سونىڭ قۇرمەتىنە جەرگىلىكتى شەبەرلەر اعاش پەن مەتاللدان جاساعان «ۇشاتىن كەمە» دە بار. ماۋسىم. وڭتۇستىكتىڭ جۇرتى اعىن سۋعا شومىلۋدى باستايدى. وقۋشىلار مەن ستۋدەنتتەر جازعى دەمالىسقا شىعاتىن ۋاقىت. باسسەينى نەمەسە تابيعي قاينارى بار جەرگىلىكتى دەمالىس ورىندارى وسى تۇستا سىزگە قامقور قولىن ۇسىنادى. قالا ايماعىندا كۇنى بويى سۋدا شومىلۋعا جانە تازا اۋادا كۇنگە قارايۋعا بولاتىن بىرنەشە اكۆاپارك بار. قالادان تىس جەرلەردە دە تاماشا تىنىعۋعا بولادى. كوزدىڭ جاۋىن الاتىن شاتقالدار, وزەندەر مەن كولدەر ءسىزدىڭ الدىڭىزدان شىعادى. شىلدە. شىمكەنتتە جاز كەزىندە وتباسى بولىپ دەمالىسقا شىققىسى كەلەتىندەرگە قولايلى ورىندار كوپ. قالاداعى ساياباقتاردىڭ بارلىعىنان تىنىش, وڭاشا, كوركەم جەر تابۋعا بولادى. ولاردا اتتراكتسيوندار دا وتە كوپ. جاڭادان اشىلعان «جايلاۋكول» ساياباعىندا بيىك كوزبەن شولۋ دوڭعالاعىنا وتىرىپ, بۇكىل قالانى 20 قاتارلى عيمارات بيىكتىگىنەن كورۋگە بولادى. بۇل جەردە سۋىق قىس كۇندەرىندە جانىڭىزعا جىلۋ بەرەتىن ەستەلىك فوتوعا تۇسۋگە بولادى. تامىز. بۇل كەزدە ونتۇستىك ءوڭىردىڭ ومىرىمەن, سالتتارىمەن تانىسۋعا بولاتىن «شىعىس بازارىنا» بارۋ داستۇرگە اينالادى. سورەلەر ءتۇرلى جەمىسكە تولىپ تۇر. بۇل اي تاۋعا جانە قۇزعا شىعۋ ءۇشىن دە ىڭعايلى بولىپ تابىلادى. ءاربىر قالاعان ادام «ءبىزدىڭ تاۋلار» فەستيۆالى قاتىسۋشىلارى توپتارىنا قوسىلا الادى. ءداستۇر بويىنشا ول تولە بي اۋدانى, سايرام-ۋگام ۇلتتىق ساياباندا وتەدى. سايرام-سۋ شاتقالىنا بارۋ ارقىلى, «سكايراتينگكە» وتىرۋ ارقىلى نەمەسە جاڭا رەكورد ءۇشىن ەڭ بيىك نۇكتەگە كوتەرىلۋ ارقىلى دا ۋاقىتتى تاماشا وتكىزۋگە بولادى. قىركۇيەك. قالا كۇنىن تويلاۋ ءبىر كۇنمەن شەكتەلمەي, اپتا بويىنا سوزىلادى. توي باعدارلاماسىنا كوپتەگەن مادەني جانە سپورتتىق شارالار, جاڭا نىسانداردىڭ اشىلۋى جانە ءار ءتۇرلى جارىس جەڭىمپازدارىن قۇتتىقتاۋ كىرەدى. ءدال وسى كەزدە وڭتۇستىك قازاقستان وبلىستىق قازاق جانە ورىس دراما تەاترلارى, كىشكەنتاي كورەرمەندەر ءۇشىن وبلىستىق قۋىرشاق تەاترى ماۋسىمدارىن باستايدى. قازان. اي ىشىندە ەرەكشە ەستە قالاتىنداردىڭ ءبىرى «پالاۋ فەستيۆالى» بولماق. شىمكەنت قاشاننان ءوزىنىڭ شىعىس تاعامدارىمەن تانىمال. شارانى وزبەك ۇلتتىق ورتالىعى وتكىزەدى. ال «قازاق رومانسياداسى» – تۇرعىنداردىڭ سۇيىكتى مۋزىكا جارىسى. شىمكەنتتى راسىمەن دە ورتالىق ازيانىڭ رومانس «استاناسى» دەۋگە بولادى. قاراشا. ارىس وزەنىنىڭ بويىمەن قايىقپەن جۇزۋگە بولادى. ول جەردە سۋ ءتۋريزمى مەن سالاۋاتتى ءومىر سالتىن دارىپتەۋ جانە دامىتۋ ماقساتىندا جارىستار وتەدى. ەگىن جيناۋ سوڭىنان اۋىل شارۋاشىلىعى جارمەڭكەسى اشىلادى. جەلتوقسان. ءسويتىپ, جاڭا جىل دا كەلىپ قالدى. عاجايىپ مەرەكە اتموسفەراسىنا وشاعى جانە مونشاسى بار قالا سىرتىنداعى ءۇي دە ەنەدى. بۇل جەردە وتباسى, دوستار بولىپ تىنىعۋعا بولادى. مۇنداي ۇيلەردىڭ اكىمشىلىگى مىندەتتى تۇردە جاڭا جىلدىق ءتۇندى ۇمىتىلماستاي ەتەدى. باقتيار تايجان, «ەگەمەن قازاقستان» شىمكەنت