وبلىس ورتالىعىنداعى كوركەمسۋرەت گالەرەياسىندا كيىزدەن جاسالعان قولونەر بۇيىمدارىنىڭ «كيىز الەمى» اتتى قولدانبالى-دەكوراتيۆتىك كورمەسى اشىلدى. قوستانايدا كيىزدەن جاسالعان بۇيىمدارمەن كورەرمەندەرىن تاڭعالدىرىپ جۇرگەن سۋرەتشىلەر مەن قولونەرشىلەردىڭ ناۋرىز مەيرامى قارساڭىندا ءبىرىنشى كورمەسى وتكىزىلىپ وتىر.
قازاقستان جەرىندە كوشپەلىلەر كيىزدى ءبىزدىڭ داۋىرىمىزگە دەيىنگى ءى مىڭجىلدىقتا پايدالانعان. كيىز قازاق حالقىنىڭ توسەنىشى, كيىمى, كولىگىنىڭ جابۋى بولعان. ول ادامدى قىستا سۋىقتان, جازدا ىستىقتان قورعاعان. كوشپەلىلەر قولدانعان كيىز بۇگىندە سۋرەتشىلەر مەن ديزاينەرلەردىڭ, قول ونەر شەبەرلەرىنىڭ ءوز ويىن, سۇلۋلىقتى جەتكىزەتىن ماتەريالىنا اينالعان.
«كيىز ادامداردىڭ تۇرمىستا قولدانۋىنا ەكولوگيالىق ەڭ تازا ماتەريال بولسا, ونەر ادامدارىنىڭ دا قولدانۋىنا وتە قولايلى. ونى قازىرگى جاڭا تەحنولوگيالارمەن ارلەي تۇسكەندە قايتالانباس سۇلۋلىق بەرەدى» دەيدى سۋرەتشى, ءمۇسىنشى بايان باتالوۆا.
كورمەگە قاتىسقان ونەر يەلەرىنىڭ ايتۋىنشا, بۇگىندە كيىزدەن جاسالمايتىن زات جوق. كىلەمنەن باستاپ, كيىم, اياق كيىم, قۋىرشاق پەن گۇلگە دەيىن جاساۋعا بولادى.
ءنازيرا جارىمبەتوۆا «ەگەمەن قازاقستان»
