قازاتومونەركاسىپ كاسىپورىندارى شقو-عا 3 ميلليارد تەڭگە بولەدى

2017 جىلعى 16 ناۋرىز كۇنى وسكەمەن قالاسىندا قر پرەمەر-ءمينيسترى باقىتجان ساعىنتاەۆتىڭ شىعىس قازاقستان وبلىسىنا جۇمىس ساپارى اياسىندا «قازاتومونەركاسىپ» كومپانياسى, «ءۇلبى مەتاللۋرگيالىق زاۋىتى» اق جانە وبلىس اكىمدىگى اراسىنداعى ىنتىماقتاستىق تۋرالى مەموراندۋمعا قول قويىلدى, دەپ حابارلايدى "قازاتومونەركاسىپ" اق ءباسپاسوز قىزمەتى. مەموراندۋمعا ەكونوميكا مەن الەۋمەتتىك سالانى ودان ءارى دامىتۋعا, تۇرعىنداردىڭ ءال-اۋقاتىن ارتتىرۋعا باعىتتالعان ايماقتى الەۋمەتتىك-ەكونوميكالىق دامىتۋ سالاسىنداعى تاراپتاردىڭ ىنتىماقتاستىعى ارقاۋ بولعان. مەموراندۋمعا قول قويۋ راسىمىنە «قازاتومونەركاسىپ» ۇاك» اق باسقارما توراعاسى اسقار جۇماعاليەۆ پەن شىعىس قازاقستان وبلىسىنىڭ اكىمى دانيال احمەتوۆ قاتىستى. قۇجاتقا سايكەس, ءۇمز ءوڭىردى الەۋمەتتىك-ەكونوميكالىق دامىتۋ ءىس-شارالارىنا بەلسەندى قاتىساتىن بولادى. وسى ماقساتتا زاۋىت 2017-2019 جىلدارى وبلىس بيۋدجەتىنە 3 ملرد تەڭگە اۋدارادى, وعان قوسا, ينۆەستيتسيالىق جوبالار شەڭبەرىندە جاڭا جۇمىس ورىندارىن اشادى. قازاتومونەركاسىپتىڭ ەنشىلەس كاسىپورنى سانالاتىن ءۇلبى مەتاللۋرگيالىق زاۋىتى قازىرگى كەزدە شىعىس قازاقستان وبلىسىندا بىرقاتار ينۆەستيتسيالىق جوبالاردى ىسە اسىرىپ كەلەدى. سولاردىڭ قاتارىندا جىلىنا اتوم رەاكتورلارىنا ارنالعان 200 توننا جىلۋ بولگىش قۇرامالار شىعاراتىن قۋاتقا يە ءوندىرىس تە بار. مەموراندۋم شەڭبەرىندە اكىمدىك ءۇلبى مەتاللۋرگيالىق زاۋىتى قىزمەتكەرلەرىن كاسىبي دايىنداۋ, قايتا دايىنداۋدان وتكىزۋ جانە ولاردىڭ بىلىكتىلىگىن ارتتىرۋدى ۇيىمداستىرۋعا ىقپال ەتپەك. سول كۇنى «قازاتومونەركاسىپ» كومپانياسى مەن د. سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتى اراسىنداعى عىلىمي-تەحنيكالىق ىنتىماقتاستىق تۋرالى كەلىسىمگە قول قويىلدى. كومپانيا باسشىسى اسقار جۇماعاليەۆ پەن ۋنيۆەرسيتەت رەكتورى جاسۇلان شايمەردەنوۆ اتوم سالاسى جانە بالاما ەنەرگەتيكاداعى ىرگەلى جانە قولدانبالى زەرتتەۋلەر, ءوندىرىستى ءارتاراپتاندىرۋ ماقساتىندا سيرەك جانە سيرەك جەر مەتالدار الۋ جانە وڭدەۋ, ۇلتتىق اتوم كومپانياسى ءۇشىن كادرلار دايارلاۋ سالاسىنداعى بىرلەسە اتقارار جۇمىستاردى كەلىسىپ الدى.