ستۋدەنتتەردى جاتاقحانامەن قامتۋدىڭ جولى قانداي؟

سەناتتىڭ جالپى وتىرىسىندا ۆ.رەدكوكاشين باستاعان ءبىر توپ دەپۋتات پرەمەر-مينيستر ب.ساعىنتاەۆتىڭ اتىنا ساۋال جولدادى. وندا بىلاي دەلىنەدى: «استانا مەديتسينا ۋنيۆەرسي­تەتى» اق پەن ل.ن.گۋميلەۆ اتىن­­داعى ەۋرازيا ۇلتتىق ۋنيۆەرسيتەتىن­­دە وتكەن جۇمىس كەزدەسۋلەرى كەزىن­دە اتالعان ۋنيۆەرسيتەت ۇجىم­دارى وڭىرلەردەن كەلگەن ستۋدەنتتەردى جاتاقحانامەن قامتۋ ماسەلەسىنە قاتىستى قالىپتاسقان احۋال تۋرالى ايتتى. بۇگىندە ەلورداداعى ۇلتتىق جو­عارى وقۋ ورىندارىندا ءبىلىم الىپ جاتقان ستۋدەنتتەردىڭ سانى 18 000 ادامدى قۇرايدى. ونىڭ ىشىندە تەك قانا ل.ن.گۋميلەۆ اتىنداعى ۋني­ۆەرسيتەتتە 16 847 ستۋدەنت وقيدى, ولاردىڭ 4 561-ءى عانا جاتاقحانامەن قامتىلعان. استانا مەديتسينا ۋنيۆەرسي­تەتىن­دە قالىپتاسقان جاعداي ودان دا كۇردەلى. ۋنيۆەرسيتەت ستۋ­دەنت­تەرىنىڭ جالپى سانى 6 774 ادام بولسا, ولاردىڭ 3 500-ىنە جاتاق­حانا كەرەك, 2000-نان استامى جاتاق­حاناعا وتە ءزارۋ دەۋگە بولادى (حا­لىق­­تىڭ از قامتىلعان بولىگىنەن شىق­­قان بالالار, جەتىم بالالار, كوپبالالى وتباسىنان شىق­قان بالا­لار جانە ت.ب.). استانا مەديتسينا ۋنيۆەرسيتەتى قۇرىلعاننان بەرگى ارالىقتا ءبىر عا­نا جاتاقحانا سالىنىپتى. ول جە­ڭىس داڭعىلى, 35, 35ا مەكەنجايىن­دا ورنالاسقان, 1974 جىلى سالىن­عان عيمارات. بارلىعى 980 ادامعا ارنالعان. 2012 جىلى ۋنيۆەرسيتەتكە ستۋ­دەنتتەر جاتاقحاناسىن سالۋ ءۇشىن جەر تەلىمى بولىنگەن. الايدا, رەس­پۋب­ليكا بويىنشا بىرقاتار باع­­دارلا­ما­نى قارجىلاندىرۋ قىس­قارىپ, ۇلتتىق ەكونوميكا مينيستر­­­لىگى ۋنيۆەرسيتەتكە ارنالعان جاتاق­­حانا سالۋدى دامۋ جوسپارىنان الىپ تاستاعان, جەر تەلىمى مەملەكەت­­كە قايتارىلعان. وسىلايشا, اتال­عان وقۋ ورىندارىندا جاتاقحانا جەتىسپەۋشىلىگى وزەكتى كۇيىن­دە قالىپ كەلەدى, ال جاڭاسىن سالۋ بيۋدجەتتەن مول قاراجات ءبولۋدى قاجەت ەتەدى. وسىعان بايلانىستى, «استانا ەكسپو-2017» حالىقارالىق كورمەسى وتكەننەن كەيىن بوساعان تۇرعىن ۇيلەردى ستۋدەنتتەر ۇيىنە اينالدىرۋ قالىپتاسقان احۋالدى شەشۋدىڭ جولى دەگەن ويدامىز. بۇل ستۋدەنتتەر ۇيلەرىندە استانا مەديتسينا ۋنيۆەرسيتەتىندە, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە جانە باسقا دا ەلوردالىق جوعارى وقۋ ورىندارىندا ءبىلىم الاتىن ستۋدەنتتەر تۇرار ەدى».