«بارىستىڭ» باعى جانبادى

قۇرلىقتىق حوككەي ليگا­سىنداعى پلەي-وفف كەزەڭىنىڭ شيرەك فينالىندا ونەر كورسەت­كەن استانانىڭ «بارىس­ى» ماگ­نيتوگورسكىنىڭ «مەتال­لۋرگىمەن» ءتورتىنشى رەت كەزدەسىپ, بۇل جولى دا ۇتىلىپ قالدى. ەسەپ – 2:3. العاشقى ءۇش ويىندا ەسە جىبەرگەن ەلوردالىقتار ويىن باستالا سالا العا ۇمتىلدى. كەزدەسۋدىڭ 11-مينۋتىندا برەن­دون بوچەنسكيدەن پاس العان نايدجەل دوۋس قوناقتار قاقپاسىن ءدال كوزدەپ, ەسەپ اشتى. ەكىنشى كەزەڭدە قوس كوماندا قاۋىپتى شابۋىلدار ۇيىمداستىرعانىمەن, گول سوعىلمادى. دەگەنمەن, سوڭعى كەزدەسۋدە جانكۇيەرلەر ءۇش بىردەي شايبانىڭ كۋاسى بولدى. وي­ىن­شى باسىمدىعىن ءساتتى پاي­دالانعان قوناقتار ءۇش مينۋتتا استانالىقتاردى ەكى رەت قاپى قالدىرىپ ۇلگەردى. 46-مينۋت­تا يان كوۆارج تارازى باسىن تەڭەستىرسە, 49-مينۋتتا كريس لي «مەتاللۋرگتى» العا شىعاردى. ءوز ايدىنىندا ونەر كورسەتىپ جاتقان «بارىس» بارىن سالىپ, 53-مينۋتتا ەسەپتى تەڭەستىردى – 2:2. بۇل تۇستا نيكيتا ميحايليس مەرگەندىگىمەن تانىلدى. نەگىزگى ۋاقىتتىڭ سوڭىنا دەيىن وسى ەسەپ ساقتالىپ, جەڭىمپاز كوماندا وۆەرتايم ارقىلى انىقتالدى. ەدۋارد زانكوۆەتس شاكىرتتەرى ءۇشىن بۇل كەزدە ناعىز سىن ساعاتى سوعىلعان-دى. وكىنىشكە قاراي, بۇل جولى دا قوناقتاردىڭ مەرەيى ۇستەم بولىپ, جەڭىستى ج ۇلىپ اكەتتى. 79-مينۋتتا يان كوۆارج كەزەكتى رەت كوزگە ءتۇسىپ, ءوز ۇجىمىنىڭ كەلەسى راۋندقا وتۋىنە سەبەپشى بولدى. سونىمەن, «بارىس» پەن «مەتال­لۋرگ» اراسىنداعى سەريا­لىق ماتچ­تار مارەسىنە جەتتى. جال­پ­ى ەسەپتە جەرلەستەرىمىز 0:4 بولىپ جەڭىلىپ, قحل-داعى توعى­زىن­شى ماۋسىمىن وسىلايشا اياقتادى. ايتا كەتكەن ءجون, «بارىس» ءوز تاريحىندا وسىمەن سەگىزىنشى رەت پلەي-وفف كەزەڭىندە ونەر كورسەتتى. ايان ءابدۋالي, «ەگەمەن قازاقستان» استانا