ەلباسى نۇرسۇلتان نازارباەۆ تاياۋدا ەلدى دەموكراتيالاندىرۋدى دامىتۋ باعىتىنا ارنالعان ۇندەۋ جولدادى. وندا ءمالىم بولعانداي, الداعى ۋاقىتتا ەلىمىزدەگى بۇگىنگە دەيىن پرەزيدەنتتىڭ قۇزىرىندا بولىپ كەلگەن كوپتەگەن مىندەتتەر پارلامەنت پەن ۇكىمەتكە, وبلىس اكىمدىكتەرىنە جۇكتەلمەك. بۇل زاڭدى قۇزىرەت تاراپتارعا ءبولىنىپ, بيلىك تارماقتارىنىڭ جاۋاپكەرشىلىگى ارتادى دەگەن ءسوز. وسىنىڭ ءوزى ەلىمىزدىڭ تاۋەلسىزدىك الىپ, ءوز الدىنا دەربەس مەملەكەت بولعاننان كەيىنگى جيىرما بەس جىلدا جاڭا ساپالىق بيىككە كوتەرىلگەنىن كورسەتەدى. ەندى, مىنە, مەملەكەت باسشىسى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى ءداستۇرلى جولداۋىن جاريالاپ وتىر. جولداۋدا ەلىمىزدىڭ ساياسي, ەكونوميكالىق, الەۋمەتتىك جانە مادەني-رۋحاني تۇرعىدا دامۋىن جالعاستىرۋدى قامتاماسىز ەتەتىن بىرنەشە باعىت بەلگىلەنگەن. سونىڭ ىشىندە, قازاقستاننىڭ جاھاندىق باسەكەلەستىككە قابىلەتتىلىگىن ارتتىرۋعا جول اشاتىن بەس نەگىزگى باسىمدىق كورسەتىلگەن. سولاردىڭ ىشىندە مەن ءتورتىنشى باسىمدىق تۋرالى وي بولىسسەم دەيمىن. ادامي كاپيتال ساپاسىن جاقسارتۋ ماڭىزدى مىندەتتەردىڭ ءبىرى بولىپ تابىلادى. ەل كونستيتۋتسياسىندا «مەملەكەتتىڭ ەڭ قىمبات قازىناسى – ادام جانە ادامنىڭ ءومىرى» دەپ جازىلعان مەملەكەت ءۇشىن ادام كاپيتالىن جاقسارتۋ ۇلكەن ماقسات-مىندەتتەردىڭ بىرىنە سانالۋى – زاڭدى. ءيا, ادام فاكتورى, ادامي كاپيتالدىڭ دامۋى – قازاقستان ءۇشىن ستراتەگيالىق مىندەت. سول ءۇشىن دە پرەزيدەنت وسى باعىتقا ينۆەستيتسيا سالۋدى, اتاپ ايتقاندا, جالپى ازاماتتاردىڭ ءبىلىم الۋى مەن دەنساۋلىعىن جاقسارتۋى ءۇشىن ءتيىستى قاراجات ءبولىپ, ەكى سالانى ۇزدىكسىز دامىتىپ وتىرۋدى ۇدايى نازاردا ۇستاپ كەلەدى. رەسپۋبليكالىق بيۋدجەتتىڭ 40 پايىزدان استامى دەنساۋلىق ساقتاۋ, ەڭبەك جانە حالىقتى الەۋمەتتىك قورعاۋ, ءبىلىم جانە عىلىم سالالارىنا بولىنەتىنى وسى ءسوزىمىزدىڭ ايعاعى. ازاماتتاردىڭ ءبىلىم ساپاسىن ارتتىرىپ, ەڭبەككە جارامدى تۇلعالاردىڭ باسەكەگە قابىلەتتى ساپالى مامان بولىپ قالىپتاسۋىنا جول اشۋ ءۇشىن ەلباسى, ەڭ الدىمەن, ءبىلىم بەرۋ جۇيەسىنىڭ وزگەرۋى كەرەكتىگىن ايتتى. جولداۋدا بۇل تۇرعىدا ء«بىزدىڭ مىندەتىمىز – ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ ورتالىق بۋىنىنا اينالدىرۋ. وقىتۋ باعدارلامالارىن سىني ويلاۋ قابىلەتىن جانە ءوز بەتىمەن ىزدەنۋ داعدىلارىن دامىتۋعا باعىتتاۋ كەرەك», دەلىنگەن. سونىمەن قاتار, ءىت ءبىلىمدى, قارجىلىق ساۋاتتىلىقتى قالىپتاستىرىپ, ۇلتجاندىلىقتى دامىتۋعا دا زەر سالۋ قاجەتتىگى ەسكەرىلگەن. قالا مەن اۋىل مەكتەپتەرى اراسىنداعى ءبىلىم ساپاسىنىڭ الشاقتىعىنا نازار اۋدارعان ەلباسى جولداۋدا ءبىلىم بەرۋدى جاقسارتۋ باعىتىندا جۇمىس جۇرگىزگەندە اۋىلدىق مەكتەپتەرگە جەتە كوڭىل بولىنبەي, تىسقارىلاۋ قالىپ قويماۋى قاجەتتىگىن اتاپ كورسەتەدى. ول ءۇشىن, ارينە, ەلىمىزدەگى جالپى ءبىلىم بەرەتىن مەكتەپتەردە وقىتىلاتىن وقۋلىقتار مەن وقۋ باعدارلامالارى وڭتايلاندىرىلىپ, قالاداعى ءبىلىم بەرۋ مەكەمەلەرىمەن قاتار, اۋىل مەكتەپتەرىنە دە ءبىلىمدى, بىلىكتى مۇعالىمدەر تارتىلۋى قاجەت. الداعى 2019 جىلدان باستاپ 10-11-سىنىپتاردا كەيبىر پاندەر اعىلشىن تىلىندە وقىتىلا باستاماق. وسىعان بايلانىستى پرەزيدەنت ۇكىمەتكە ءۇش ءتىلدى وقىتۋعا كەزەڭ-كەزەڭمەن كوشۋ ماسەلەسى بويىنشا ۇسىنىستار ازىرلەۋدى تاپسىرعان. بۇدان شىعاتىن قورىتىندى, بالالارىمىزعا شەت تىلدەرىن, سونىڭ ىشىندە اعىلشىن ءتىلىن قوسىمشا وقىتۋدىڭ ماڭىزى ارتا بەرمەك. بۇل ورايدا, ء«بىر ءتىل ءبىلۋ – ءبىر ادام بولۋ, ەكى ءتىل ءبىلۋ – ەكى ادام بولۋ» دەگەن قاعيدانى ساپالى ۇرپاق قالىپتاستىرۋدا بەرىك ۇستانعانىمىز ارتىق بولماسى ايان. «قازاق ءتىلىنىڭ باسىمدىعى ساقتالادى. ونىڭ ءارى قاراي دامۋىنا زور كوڭىل بولىنەدى», دەيدى پرەزيدەنت. بۇل ەلباسىنىڭ بولاشاقتا ءاربىر قازاقستان ازاماتى مەملەكەتتى قۇراۋشى ۇلت – قازاق حالقىنىڭ ءتىلىن ءبىلىپ, ءوز ەلىنىڭ ادال ازاماتى, ۇلتجاندى تۇلعاسى بولا وتىرىپ, اعىلشىن تىلىمەن, عىلىم-بىلىممەن قارۋلانىپ, حالىق ساپاسىنىڭ جوعارىلاۋىنا ۇلەس قوسسا دەگەن نيەتىن اڭعارتادى. سونىمەن قاتار, ورتا كاسىپتىك جانە جوعارى ءبىلىم بەرەتىن وقۋ ورىندارىنىڭ قىزمەت ساپاسىن ارتتىرىپ, «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسىن ودان ءارى جەتىلدىرۋ ماسەلەسى قامتىلعان. وسى جۇمىس بارىسىندا جۇمىسسىز نەمەسە تابىسى از, وزىنە ءتيىمسىز جۇمىسپەن جان باعىپ جۇرگەن ازاماتتاردى جاڭا كاسىپتەرگە ۇيرەتۋ جانە ەكونوميكاداعى جاڭا وندىرىستەر ءۇشىن ماماندار دايىنداۋ ماسەلەلەرىنىڭ قاتار شەشىلەتىنى قۋانتادى. قورىتا ايتقاندا, پرەزيدەنتتىڭ بيىلعى جولداۋى جاڭعىرۋىمىزدىڭ ءۇشىنشى كەزەڭىنە اياق باسقان ەلىمىزدى دامىتۋعا جارقىن جول اشاتىن بولادى.
الىبەك اسقاروۆ,
جازۋشى, مەملەكەتتىك سىيلىقتىڭ لاۋرەاتى
