مەرەكەدە كوممۋنالدىق قىزمەتتەر دەمالىسسىز جۇمىس ىستەيدى

مەرەكە كۇندەرى كوممۋنالدىق قىزمەتتەر دەمالىسسىز جۇمىس ىستەيتىن بولادى, دەپ حابارلادى استانا اكىمدىگىنىڭ ءباسپاسوز قىزمەتى. «استانا سۋ ارناسى» كاسىپورنىندا تاۋلىك بويى كەزەكشىلىك جۇرگىزىلىپ, قوسىمشا بريگادالار ۇيىمداستىرىلادى. كومپانيانىڭ حابارلاۋىنشا, بارلىق قىزمەتتەر جۇمىس ىستەيدى. اپات ورىن العان جاعدايدا كەز كەلگەن ۋاقىتتا ديسپەتچەرلىك قىزمەتكە حابارلاسۋعا بولادى. «استانا-تازالىق» جشس جاڭا جىل مەرەكەسى كۇندەرى ەكى اۋىسىممەن جۇمىس ىستەيدى. قالا كوشەلەرىنە جيناۋ ماشينالارى مەن قار جيناۋعا ارنالعان تەحنيكا شىعارىلادى. مۇنىمەن قوسا, ءتيىستى جۇمىستارعا قوسىمشا بريگادالار تارتىلادى. «استانا-تازارتۋ» جشس قىزمەتكەرلەرى 31 جەلتوقساندا ساعات 22:00-گە دەيىن جۇمىس ىستەيدى. ال 1 قاڭتار كۇنى قوقىس شىعارۋ جۇمىستارى ساعات تاڭعى 5-تە باستالادى. قالعان كۇندەرى ادەتتەگىدەي جۇمىس ىستەيدى. ايتا كەتەيىك, استانا قالاسىنىڭ ىشكى ىستەر دەپارتامەنتى دە 31 جەلتوقساننان 4 قاڭتارعا دەيىن, سونداي-اق 7-8 قاڭتار كۇندەرى كۇشەيتىلگەن رەجىمدە جۇمىس ىستەيدى. بارلىعى 1500 پوليتسيا قىزمەتكەرى مەن قر ءىىم ۇلتتىق ۇلاننىڭ اسكەري قىزمەتشىلەرى قوعامدىق ءتارتىپتى قاداعالايتىن بولادى.