ەلىمىزدىڭ ەڭ ءىرى مەگاپوليسى الماتى قالاسى اكىمدىگىنىڭ جانىنداعى مەملەكەتتىك ءتىل ساياساتىن ودان ءارى جەتىلدىرۋ جونىندەگى جۇمىس توبى سوڭعى جىلدارى تۇراقتى قىزمەت ەتىپ كەلەدى. جۇمىس توبى وتىرىستارىندا ءبىر عانا تاقىرىپ اياسىندا, اتاپ ايتقاندا, “مەملەكەتتىك ءتىلدىڭ قولدانىلۋ اياسىن كەڭەيتۋ جانە دامىتۋ باعىتىندا اتقارىلعان جۇمىستار تۋرالى” حابارلامالار تىڭدالىپ, پىكىر تالقىسى بارىسىندا جەتىستىكتەر مەن كەمشىن تۇستار اتالىپ ءوتىپ, الداعى ۋاقىتتا اتقارىلاتىن ءتيىمدى ءىس-شارالار ايقىندالىپ, ۇسىنىستار جاسالادى.
جۇمىس توبىنىڭ كەزەكتى وتىرىسىندا ءبىر مەكەمەدە مەملەكەتتىك تىلدە, ياعني قازاق تىلىندە ءىس جۇرگىزە المايتىن ۇلتى قازاق مەملەكەتتىك قىزمەتكەرلەردىڭ سانى پايىزعا شاققاندا كوپ ەكەنى قىزۋ پىكىرتالاس ءوربىتتى. ەلباسى سوزىمەن ايتقاندا, قازاقستان حالقىنىڭ بىرىكتىرۋشى قۇرالىن, ياعني مەملەكەتتىك ءتىلدى سىيلامايتىن, مەملەكەتتىك تىلدە جۇمىس ىستەي المايتىن ادامنىڭ مەملەكەتتىك قىزمەت اتقارۋىنا “قۇقى بار ما؟” دەگەن سۇراق تۋعانى سول ەكەن, ماجىلىسكە قاتىسىپ وتىرعان اۋدان اكىمى “قۇقىسى بار. “قۇقىسى جوق” دەگەن زاڭ جوق” دەپ, تەز جاۋاپ قايىردى. بۇل جاۋاپقا جۇمىس توبى مۇشەلەرىنىڭ ءبىرى “جارايدى, زاڭدىق تۇرعىدان دۇرىس بولسىن, الايدا, ءبىرىنشى باسشى مەملەكەتتىك ءتىلدى بىلمەيتىن قاراكوزدەردى جەكە شاقىرىپ الىپ, “اتا-تەگىڭنىڭ ءتىلىن نەگە ۇيرەنبەيسىڭ” دەپ, ۇلكەندىك جاساماي ما؟” دەپ, قىنجىلىس ءبىلدىردى. ايتايىن دەگەنىم, ەلىمىزدىڭ قاي زاڭىنان بولسىن جوعارى تۇراتىن نەگىزگى زاڭدا, كونستيتۋتسيادا مەملەكەتتىك ءتىل جانە رەسمي ءتىل تۋرالى ارنايى باپ جازىلعانى بەلگىلى. سونداي-اق مەملەكەتتىك ءتىلدىڭ قولدانىلۋ اياسىن كەڭەيتۋ جانە دامىتۋ جونىندەگى نەگىزگى زاڭنىڭ ءار تاراۋىندا تاراتىلىپ ناقتىلى كورسەتىلگەن. سوندا اتا زاڭنىڭ ارنايى بابىنىڭ مەملەكەتتىك قىزمەتكەرلەر ءۇشىن زاڭدىق كۇشى بولماعانى ما؟ كونستيتۋتسيالىق زاڭنىڭ مەملەكەتتىك ءتىل تۋرالى بابىنىڭ زاڭ ەكەنىن دالەلدەيتىن تاعى زاڭ كەرەك پە؟ دۇرىسىندا, ەلىمىزدىڭ نەگىزگى زاڭىنىڭ, كونستيتۋتسيانىڭ ءار بابى ەلىمىزدىڭ بارلىق ازاماتتارىنا ورتاق مىندەت جۇكتەيدى ەمەس پە؟! مەملەكەتتىك قىزمەت اتقارا ءجۇرىپ مەملەكەتتىك ءتىلدىڭ ءورىسىن كەڭەيتۋگە سالعىرت, كەيدە ءتىپتى نەمقۇرايدى قارايتىن قىزمەتكەرلەر مۇنى تۇسىنبەي مە, الدە تۇسىنگىسى كەلمەي مە؟ سايراش ابىشقىزى.
