قىزىلوردا اۋەجايىنا حالىقارالىق تەرمينال سالىنادى

مەملەكەتتىك-جەكە مەنشىك سەرىكتەستىك (مجس) شەڭبەرىندە ىسكە قوسۋ جوسپارلانعان قازاقستاننىڭ 12 جوباسى ماسكەۋدە وتكەن حالىقارالىق تاجىريبەلىك كونفەرەنتسيادا تانىستىرىلدى, دەپ حابارلايدى «قازاقپارات». ءىس-شارا ماقساتى قازاقستاندىق مجس جوبالارىن ىسكە اسىرۋعا رەسەيلىك جانە وزگە دە حالىقارالىق ينۆەستورلاردى جۇمىلدىرۋ بولىپ تابىلادى. «كونفەرەنتسياعا قىزىلوردا, ماڭعىستاۋ جانە اقمولا وبلىستارى, قازاقستاندىق مجس ورتالىعى, ۇلتتىق كاسىپكەرلەر پالاتاسى قاتىسۋدا, ولار الەۋەتتى رەسەيلىك ينۆەستورلارعا مجس سالاسىنداعى ءوز جوبالارىن تانىستىراتىن بولادى», - دەپ اتاپ ءوتتى قازاقستاننىڭ رەسەيدەگى ساۋدا وكىلىنىڭ ورىنباسارى گۇلجان بودىقوۆا. «مجس باعىتىنداعى 300 جوبا ەنگەن پورتفەلدىڭ جالپى سانىنىڭ 21-ءى - رەسپۋبليكالىق جانە 270-ءى جەرگىلىكتى دەڭگەيدەگى جوبالار», - دەيدى «قازاقستاندىق مجس ورتالىعى» اق-نىڭ باس ساراپشىسى ەرلان جاكين. سونداي-اق قىزىلوردا وبلىسى اكىمىنىڭ ورىنباسارى ەۆگەني كيم ماسكەۋدە تانىستىرۋ ءۇشىن ءوز وڭىرىنەن الىپ كەلگەن مجس جوبالارى تۋرالى ايتىپ بەردى. ولاردىڭ سانى - بەسەۋ. «بۇل قىزىلوردا قالاسى اۋەجايىنىڭ حالىقارالىق تەرمينالىنىڭ, 200 ورىندىق جاتاقحاناسى بار 600 ءبىلىم الۋشىعا ارنالعان كاسىبي-تەحنيكالىق ليتسەيدىڭ, قىزىلورداداعى ەمحانانىڭ جانە اۋىر اتلەتيكا ورتالىعىنىڭ قۇرىلىسى مەن قالانىڭ سول جاعالاۋىن دامىتۋ جوباسى. سونداي-اق ءبىز بايقوڭىر بويىنشا بىرنەشە جوبانى ۇسىناتىن بولامىز», - دەپ جەتكىزدى ە.كيم. وبلىس تانىستىراتىن جوبالاردىڭ جالپى قۇنى 37 ملرد. رۋبلگە جۋىقتى نەمەسە 195 ملرد. تەڭگەدەن استامدى قۇرايدى. قىزىلوردا ءوڭىرى باسشىسىنىڭ ورىنباسارى اتاپ وتكەندەي, رەسەيلىك ينۆەستورلار قىزىلوردا قالاسى اۋەجايىنىڭ حالىقارالىق تەرمينالىن سالۋ جوباسىنا قىزىعۋشىلىق ءبىلدىردى. ءوز كەزەگىندە «ۆيس» قۇرىلىس كومپانيالارى توبىنىڭ باس ديرەكتورى يگور سنەگۋروۆ قازاقستان بيزنەس ءۇشىن جايلى مەملەكەت ەكەنىن اتاپ ءوتىپ, ءىرى مجس جوبالارىندا جانە 1,5 ملرد. رۋبلدەن اساتىن كونتسەسسيالاردا سەرىكتەس تابۋعا نيەتى جونىندە جەتكىزدى.