استاناداعى ۇلتتىق مۋزەيدە «رەسپۋبليكالىق «كازاحستانسكايا پراۆدا» گازەتى» اكتسيونەرلىك قوعامى مەرەيلى مەرەكەمىز – تاۋەلسىزدىكتىڭ 25 جىلدىعىنا وراي ۇيىمداستىرعان «مەنىڭ قازاقستانىم» اتتى فوتوكورمە سالتاناتتى تۇردە اشىلىپ, گازەت ۇجىمى مۇرىندىق بولعان فوتوبايگە جەڭىمپازدارى ماراپاتتالدى.
مەرەكەلى جىلى «كازاحستانسكايا پراۆدا» گازەتىندە فوتو شەبەرلەرىنىڭ مارتەبەسىن ارتتىرىپ, ونەگەلى ونەردە باقتارىن سىناپ كورۋى ءۇشىن «مەنىڭ قازاقستانىم» تاقىرىبىمەن فوتوبايگە جاريالانعان بولاتىن. سودان بەرگى مەزگىلدەردە ەلىمىزدىڭ ءار ايماعىنان رەداكتسيا قورجىنىنا 60 فوتوسۋرەتشىنىڭ 600-دەن استام تۋىندىسى كەلىپ ءتۇسىپ, ونىڭ ەڭ ۇزدىكتەرى گازەت بەتىندە جاريالانىپ وتىردى. ال بۇگىنگى مىنا ۇلتتىق مۋزەيدىڭ كورمە زالىنا ءارتۇرلى تاقىرىپتاردى قامتىعان, سونىڭ ىشىندە ەڭ نەگىزگىسى – فوتوسۋرەت ارقىلى تۋعان ولكەمىزدىڭ سۇلۋلىعىن, تابيعاتىن جانە ونى مەكەندەگەن وتانداستارىمىزدىڭ ادامي كەلبەتىن ءار قىرىنان بەينەلەگەن «مەنىڭ قازاقتانىم» بايقاۋىنا قاتىسۋشىلاردىڭ 40-تان استام ۇزدىك تۋىندىلارى قويىلىپ, كورەرمەن نازارىنا ۇسىنىلدى.
باسقوسۋ بارىسىندا ۇلتتىق مۋزەي ديرەكتورى دارحان مىڭباي, «رەسپۋبليكالىق «كازاحستانسكايا پراۆدا» گازەتى» اكتسيونەرلىك قوعامى باسقارما توراعاسىنىڭ ورىنباسارى الەكساندر تاراكوۆ پەن وسى گازەتتىڭ ءفوتوتىلشىسى يگور بۋرگاندينوۆ ءسوز سويلەپ, فوتوونەردىڭ قىر-سىرى مەن ءمان-ماعىناسىنا كەڭىنەن توقتالىپ, بۇگىنگى جەڭىمپازدارعا شەبەرلىك شىڭىنا ورلەي بەرۋلەرىنە تىلەكتەستىك ءبىلدىردى.
قازىلار القاسىنىڭ شەشىمىمەن بايگە جەڭىمپازدارى بولعان جۇلدەگەرلەردى «رەسپۋبليكالىق «كازاحستانسكايا پراۆدا» گازەتى» اكتسيونەرلىك قوعامىنىڭ باسقارما توراعاسى ۆياچەسلاۆ پاششەنكو قۇتتىقتاپ, ارنايى ماراپاتتارىن تابىستادى. اتالعان بايقاۋدا «اۋىلداعى جاز» اتتى تۋىندىسى كوزايىم بولعان ايتجان مۇرزانوۆ (الماتى قالاسى) ءبىرىنشى ورىندى يەمدەنسە, جاستاردىڭ اسكەري-پاتريوتتىق جيىنى بارىسىندا تۇسىرىلگەن تۋىندىسى ءۇشىن اعا سەرجانت دۋمان قۇرمانعاليەۆ (قاراعاندى قالاسى) ەكىنشى جۇلدەنى ەنشىلەپ, سەرگەي سۋروۆ (وسكەمەن قالاسى) ءوزىنىڭ «اق ارۋاناسىمەن» ءۇشىنشى بايگەنى ولجالادى.
بەرىك سادىر,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
