«التايدىڭ» الار اسۋى الدا

قۇرىلعالى بەرگى ءبىر جىل ىشىندە ءبىراز بيىكتى باعىندىرىپ ۇلگەرگەن شىعىس وڭىرىندەگى «التاي» ۆولەيبول كلۋبىنىڭ ديرەكتورى دوسجان ۋالحانوۆپەن اڭگىمەلەسىپ, سپورت ۇجىمىنىڭ تىنىس-تىرشىلىگى تۋرالى بىلگەن ەدىك. – دوسجان نۇرباي ۇلى, «التاي» ۆولەيبول كلۋبى از ۋاقىتتا ءبىراز جەتىستىكتەرگە جەتتى. ۇلتتىق ليگانى ۇتتى, قازاقستان كۋبوگىن ەن­شىلەدى. بۇل ءوڭىر تاريحىنداعى العاشقى جەڭىس پە؟ – 2015 جىلى تامىز ايىندا وبلىس اكىمى دانيال احمەتوۆتىڭ قولداۋىمەن, سەمەي قالاسىنداعى «سەمەي» مەن وسكەمەن قالاسىنداعى «شىعىس» ۆولەيبول كلۋبتارىن بىرىكتىرۋدىڭ ناتيجەسىندە شىعىس قازاقستان وبلىسىنىڭ «التاي» ۆولەيبول كلۋبى قۇرىلدى. سودان بەرى قازاقستان كۋبوگىنا, ۇلتتىق ليگانىڭ ەرلەر جانە ايەلدەر ارا­سىنداعى ەل چەمپيوناتىنا قا­تىستىق. ۇلتتىق ليگادا شەبەرلەر عانا وينايدى. كلۋبتا ايەلدەر مەن ەرلەر كومانداسى جانە ولاردىڭ ءىزباسارى ىسپەتتى قوسالقى كوماندالار, بارلىعى 4 كوماندا ونەر كورسەتەدى. سونداي-اق, بالالار ۆولەيبولىنا دا كوڭىل ءبولىپ وتىرمىز. بيىل ۇلتتىق ليگادا كلۋبتىڭ ەرلەر جانە ايەلدەر كومانداسى بىردەي توپ جاردى. بۇل – شىعىس ءوڭىرىنىڭ ۆولەيبول تاريحىنداعى ەڭ ۇلكەن جەتىستىك. بۇرىن «التاي ءۇمز» دەگەن ەرلەر كومانداسى بولعان. جوعارى ليگادا ونەر كورسەتىپ, ءۇشىنشى ورىن العان. «شىعىس-سۆينەتسستروي» اتتى ايەلدەر كومانداسى دا وسى جەتىستىكتى قايتالاپ, ءۇشىنشى ورىنمەن شەكتەلگەن, قازاقستان كۋبوگىندا بىرنەشە رەت جۇلدە العانىمەن, ەل چەمپيونى اتانباعان. سوندىقتان, ءبىز ءوڭىر تاريحىندا العاش رەت ءىرى جەڭىسكە قول جەتكىزدىك. – جالپى, باسقا وڭىرلەردە ەكى كوماندا بىردەي ۇلتتىق ليگادا ونەر كورسەتە بەرمەيدى. قۋاتتى قوس كوماندا «التاي» كلۋبىنىڭ ەرەكشەلىگى مە؟ – ءيا, كوپ وڭىردە ەكى كوماندا جوق. بىراق قوس كوماندانىڭ ءوز ەرەكشەلىگى بولادى. مىسالى, الماتى قالاسىنىڭ «الماتى» اتتى ەرلەر جانە ايەلدەر كومانداسى بار. ارقايسىسى جەكەلەي كلۋبتار بولىپ سانالادى. جەكە شاڭىراق بولعاننان كەيىن باسشىلارى, جۇمىس كەستەسى بولەك. ال ءبىزدىڭ كلۋبىمىز ەرلەرگە دە, ايەلدەرگە دە ورتاق. سوندىقتان, قوس كوماندامىزدىڭ جەتىستىگى – ءبىز ءۇشىن ۇلكەن ماقتانىش. – كلۋبتىڭ جەڭىس جولى كوز الدىمىزدا, ال ەكونوميكالىق تۇر­عى­دان قانشالىقتى ءتيىمدى بولدى؟ – ارينە, كلۋبقا جۇمسالاتىن بيۋدجەت كولەمى قىسقارعانى انىق. وڭتايلاندىرۋدىڭ قارجىلىق جا­عىنان قانشالىقتى ءتيىمدى بولعانىن ءدوپ باسىپ ايتا المايمىن. وبلىستىق سپورت جانە دەنە شىنىقتىرۋ باسقارماسى باس­شىلارىنىڭ ايتۋىنشا, شىعىن 30 پايىزعا دەيىن ۇنەمدەلگەن. ەڭ باستىسى, كلۋبىمىز العاش رەت ازيانىڭ كلۋبتار اراسىنداعى چەمپيوناتىنا قاتىستى. فيليپپيندە وتكەن قۇرلىقتىق جارىستا قىز­دارىمىز ءتورتىنشى ورىن السا, جىگىتتەر بەسىنشى ورىنعا تابان تىرەدى. بۇل – ۇلكەن جەتىستىك. ماسەلەن, ەرلەر كومانداسى العا جىبەرگەندەردىڭ ىشىندە يراندىقتار ءبىرىنشى ورىن الدى. يران – الەم بىرىنشىلىگى مەن وليمپيا ويىندارىندا التىلىققا ەنەتىن ازۋلى كوماندالاردىڭ ءبىرى. بۇدان كەيىنگى قاتار قارجىسى كوپ كوماندالار ساپىندا. ولاردىڭ ويىنشىلارى برازيليا, اقش, يتاليا سىندى ەلدەردەن كەلگەن لەگيونەرلەردەن قۇرالعان. ءۇشىنشى ورىن العان جاپونيا دا, تورتىنشىگە تۇراقتاعان قىتاي دا مىقتىلار ساناتىندا. مىنە, وسى كوماندالاردان كەيىن, 16 كلۋب اراسىنان ءبىزدىڭ ەرلەر كومانداسى بەسىنشى ورىنعا يە بولدى. ال قىزدار كومانداسى 14 كوماندا اراسىنان ءتورتىنشى ورىندى يەلەندى. العا جاپوندىقتار, قىتايلىقتار مەن تايلاندتىقتاردى جىبەردى. ەر­لەر كومانداسى قازاقستان كۋبو­گىن دا, سۋپەركۋبوكتى دا جەڭىپ السا, ايەلدەر كومانداسى قازاقستان كۋبو­گىندا كۇمىس جۇلدەگە جانە سۋپەر­كۋبوكقا يە بولدى. وسىلايشا, ءبىر جىلدا 6 كۋبوكقا قول جەتكىزدىك. – كلۋبتىڭ ماقساتى – جەر­گىلىكتى ۆولەيبول مەكتەبىن قالىپ­تاستىرۋ, دامىتۋ. بىراق قۇرامدا لەگيونەرلەر دە بار ەكەنىن بىلەمىز. – شەت ەلدەردەن شاقىرىلعان ويىن­شىلار قاتارىندا كۋبادان يۋنەسكا روبلەس, پۋەرتو-ريكادان رايمەريەللي سانتوس, رەسەيدەن داريا نەستەرەنكو بار. قازاقستان بىرىنشىلىگىنىڭ رەگلامەنتىنە ءساي­كەس, ايەلدەر كومانداسىندا ءۇش شەتەلدىك ويىنشى ويناي الادى. وسى ءليميتتى پايدالانىپ وتىرمىز. قازاقستان چەمپيوناتىنىڭ دەڭ­گەيىن كوتەرۋ ءۇشىن جوعارى دەڭگەيدە وينايتىن ويىنشىلار كەرەك. ءبىزدىڭ ۇل-قىزدارىمىز شەت­ەلدىك ويىنشىلارعا قاراپ وسەدى. ءوز قازانىمىزدا قايناي بەرسەك, حالىقارالىق جارىستاردا جوعارى ناتيجەگە جەتە المايمىز. – بىلىكتى جاتتىقتىرۋشىلار مەن ويىنشىلاردى ۇستاپ تۇرۋ ءۇشىن قارجى قاجەت. بۇل ماسەلە شەشىمىن تاپتى ما؟ – وبلىس باسشىلىعى قولداۋ كورسەتىپ وتىرعاندىقتان, قارجى ماسەلەسىندە قيىندىق جوق. كوز­دە­گەن ماقساتىمىز ورىندالىپ جاتىر. ءىزباسارلاردى دايارلاي­تىن قو­سال­قى قۇرامدار بار. قىزدار كو­مان­داسىنداعى جاستاردى جات­تىقتىرۋعا رەسەيدەن دەنيس مات­ۆەەۆ ەسىمدى بىلىكتى مامان شاقىر­دىق. ول «دينامو-قازان» كومانداسى باس جاتتىقتىرۋشىسىنىڭ كومەكشىسى, اعا جاتتىقتىرۋشىسى بولعان. جاقسى جۇمىس ىستەپ جاتىر. جاستار قۇرامىندا قازاقتىڭ قاراگوز قىزدارى كوپ. كەلەشەكتە مىقتى كوماندالاردىڭ ءبىرى بولادى دەگەن ۇمىتتەمىز. ەرلەر كومانداسىنىڭ جاتتىقتىرۋشىسى يگور نيكول­چەنكو ۋكراينادا تۋعانىمەن, قازاق­ستان ازاماتتىعىن العان. كوپ جىلدار بويى ورالدا «كوندەنساتتى» جاتتىق­تىردى. بىزدە دە ناتيجەلى جۇمىس ىستەۋدە. ال جانبولات بۇرحان – تۇركيا ازاماتى, 15 جىل بويى ءبىر كلۋبتا جۇمىس ىستەگەن بىلىكتى مامان. ءتۇر­كيانىڭ, يتاليانىڭ ازۋلى جات­تىقتىرۋشىلارىمەن بىرگە ەڭبەك ەتكەن. بىلتىر الدىمىزعا ۇلتتىق ليگادا ويناۋ تۋرالى جوسپار قويعاندا, وسى مامانعا توقتاپ, ەلگە شاقىردىق. ءبىزدىڭ ۇلتتىق قۇراما ويىنشىسى الەسيا سافرونوۆا كوپ جىل بويى تۇركيادا لەگيونەر بولىپ وينادى. تۇركيادا جانبولات ەكەۋى تانىسىپ, وتباسىن قۇرعان. ەكەۋى دە قازىر «التاي» كلۋبىندا. جالپى, ۇلتتىق قۇرامانىڭ ەرلەر كومانداسىنىڭ التى ويىنشىسى, ايەلدەر كومانداسىنىڭ بەس ويىنشىسى – «التايلىق». بۇل – ۆولەيبولدىڭ ورتالىعى شىعىسقا اۋىسقانىنىڭ كورىنىسى. كوماندامىز وسكەمەندە جاڭادان سالىنعان «جەكپە-جەك» سارايىندا, سپورتتىق-ساۋىقتىرۋ كەشەنىندە جاتتىعادى. – اڭگىمەڭىزگە راحمەت. اڭگىمەلەسكەن دۋمان اناش, «ەگەمەن قازاقستان» وسكەمەن