«قازاقستان تاۋەلسىزدىگى جانە ەلباسى» كونكۋرسى قورىتىندىلانادى

ورتالىق كوممۋنيكاتسيالار قىزمەتىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كىتاپحاناسى جانە مەملەكەت تاريحى ينستيتۋتى بىرلەسە ۇيىمداستىرعان «بىرلىك پەن جاسامپازدىقتىڭ 25 جىلى» حالىقارالىق عىلىمي-تاجىريبەلىك كونفەرەنتسياسىنا ارنالعان بريفينگ ءوتتى. شاراعا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ اتقارۋشى ديرەكتورى بەيسەمباي جۇمابەكوۆ, بەلارۋس ۇلتتىق عىلىم اكادەمياسى تاريح ينستيتۋتى ديرەكتورى, ت.ع.ك., دوتسەنت ۆياچەسلاۆ دانيلوۆيچ, باشقۇرتستان مەملەكەتتىك ۋنيۆەرسيتەتى تاريحناما جانە دەرەكتانۋ كافەدراسىنىڭ مەڭگەرۋشىسى, ت.ع.د., پروفەسسور روزا بۋكانوۆا, كولۋمبيا ۋنيۆەرسيتەتىنىڭ اديۋنكت-پروفەسسورى رافيس ابازوۆ جانە مەملەكەت تاريحى ينستيتۋتىنىڭ ديرەكتورى بۇركىتباي اياعان قاتىستى. ب. جۇمابەكوۆ ەل تاۋەلسىزدىگىنىڭ 25 جىلدىعىنا وراي ەلباسى كىتاپحاناسىندا 28 قاراشادا باستالعان «اشىق ەسىك كۇندەرى» جىل سوڭىنا دەيىن جالعاساتىنىن ايتتى. «ەلباسى كىتاپحاناسىندا 100-دەن استام بىرەگەي مۇراعات ماتەريالدارىنىڭ, 550 تاريحي كىتاپتاردىڭ 8 كورمەسىن تاماشالاۋعا بولادى. دۇيسەنبى كۇنى بۇقارالىق اقپارات قۇرالدارى اراسىندا جاريالانعان «قازاقستان تاۋەلسىزدىگى جانە ەلباسى» رەسپۋبليكالىق كونكۋرسىنىڭ جەڭىمپازدارى ماراپاتتالادى. وعان ەلىمىزدىڭ جەتىستىكتەرى, مەملەكەت باسشىسىنىڭ باستامالارى مەن يدەيالارى جايلى قالام تەربەگەن 111 اۆتور 365 جۇمىسىن جولدادى», – دەدى كىتاپحانانىڭ اتقارۋشى ديرەكتورى. سونداي-اق ول «بىرلىك پەن جاسامپازدىقتىڭ 25 جىلى» حالىقارالىق عىلىمي-تاجىريبەلىك كونفەرەنتسياسىندا تالقىلانىپ جاتقان وزەكتى تاقىرىپتارعا توقتالىپ ءوتتى. «كونفەرەنتسيانىڭ وتاندىق جانە شەتەلدىك قاتىسۋشىلارى قازاقستان رەسپۋبليكاسى تۇڭعىش پرەزيدەنتىنىڭ مەملەكەتتىلىكتى قالىپتاستىرۋ مەن نىعايتۋداعى ءرولى, ۇلتتىق ەكونوميكانى جاڭعىرتۋ ناتيجەلەرى مەن باسىمدىقتارى, عىلىمي-يننوۆاتسيالىق سالانىڭ جەتىستىكتەرى مەن باسىمدىقتارى جايلى ءوزارا پىكىر الماسىپ, قازاقستانداعى پرەزيدەنتتىك ينستيتۋت, ەتنوسارالىق تولەرانتتىلىق پەن قوعامدىق كەلىسىمنىڭ قازاقستاندىق مودەلى ماسەلەلەرىن كەڭىنەن تالقىعا سالدى», – دەپ اتاپ ءوتتى ب. جۇمابەكوۆ. ايدار ورىسباەۆ, "ەگەمەن قازاقستان".