سىر وڭىرىندە نەيرورەابيليتاتسيالىق ورتالىق اشىلدى

قىزىلوردا قالاسىنداعى №3 ەمحانانىڭ بازاسىندا ينسۋلتپەن اۋىرعان ناۋقاستارعا نەيرورەابيليتاتسيالىق ورتالىق اشىلدى. بۇل تۋرالى وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا وبلىستىق دەنساۋلىق ساقتاۋ باسقارماسىنىڭ باسشىسى اقمارال ءالنازاروۆا مالىمدەدى, دەپ حابارلادى قازاقپارات. ول بۇعان دەيىن  قازالى تەمىرجول اۋرۋحاناسىندا 15 ورىندىق نەيرورەابيليتاتسيالىق ءبولىمى بار ءىى دەڭگەيلى ينسۋلتتىق ورتالىق اشىلعانىن دا ايتتى. ايتا كەتكەن ءجون, جاڭا ورتالىق ارال, قازالى, قارماقشى اۋداندارى مەن بايقوڭىر قالاسىنىڭ تۇرعىندارىنا دا قىزمەت كورسەتەدى. «ايماعىمىزداعى بارلىق مەديتسينا ۇيىمدارىندا ناۋقاستاردى قولداۋ قىزمەتتەرى قۇرىلدى. حالىققا قىزمەت كورسەتۋ ساپاسىن جوعارىلاتۋ مەن ۇزىن-سونار كەزەكتى بولدىرماۋ ماقساتىندا بمسك ۇيىمدارىنداعى تىركەۋ ءبولىمىنىڭ جۇمىسى وڭتايلاندىرىلدى. وسى جىلدىڭ اقپان ايىندا العاش رەت Emdeu.kz بىرىڭعاي اقپاراتتىق پلاتفورماسى قۇرىلىپ, Call-تسەنتر قىزمەتىنىڭ اياسى كەڭەيە ءتۇستى. وعان بيۋدجەتتەن 5 ملن تەڭگە قارجى ءبولىندى. بۇل جۇيە ينتەرنەت, تەلەفون ارقىلى قاجەتتى دارىگەرگە جازىلۋعا نەمەسە ۇيدە وتىرىپ-اق دارىگەردى شاقىرۋعا مۇمكىندىك بەرەدى», – دەيدى باسقارما باسشىسى.