سان عاسىرلىق تاريحى بار ايتىس ونەرىندە تۇعىش رەت ەگىزدەر ايتىستى. استاناداعى №51 مەكتەپ-گيمنازياسىندا تاۋەلسىزدىكتىڭ 25 جىلدىعى قارساڭىندا وتكەن مەرەكەلىك شارادا سارىباي ەراسىل مەن بەكاسىل ايتىسىپ, ۇلتتىق ونەرىمىزدى دارىپتەدى.
العاش رەت مەكتەپ ساحناسىندا تۇساۋى كەسىلىپ, ايتىس ونەرىنە قانات قاققاعان وقۋشىلارعا ايتىسكەر اقىن بالعىنبەك يماشەۆ باتاسىن بەردى. «مەن ايتىستى كوپ زەرتتەدىم. تاريحقا كوز جۇگىرتسەك, اكە مەن بالا, اتاسى مەن كەلىنى, اعاسى مەن ءىنىسى, تۋىستىق قاتىناستاعى ادامداردىڭ ايتىسى بار. ال اناسىنىڭ قۇرساعىنان ەگىز بولىپ تۋىلعان جانداردىڭ ايتىسىن ءبىرىنشى رەت كورىپ تۇرمىن. ەگەر بۇل بالالار ۇلتتىق ونەرىمىزدى قاستەرلەپ, دومبىرانى قولدارىنان تاستاماي ايتىسقا بەت بۇرسا, تاريحتاعى تۇڭعىش ايتىسقان ەگىزدەر بولىپ قالادى», – دەدى ول. سونىمەن قاتار, بالعىنبەك يماشەۆ جاس ايتىسكەرلەرگە باتاسىن ەرىپ, ەكەۋىنەن ۇلكەن ءۇمىت كۇتەتىنىن جەتكىزدى.
سونداي-اق, مەرەكەلىك شارادا تەاتر جانە كينو سالاسىنداعى تانىمال اكتەرلەر دوسىمحان بەيسەنباەۆ پەن ءادىل احمەتوۆ ۇستازدار مەن وقۋشىلارعا ونەر سالاسىنداعى جەتىستىكتەر مەن ەلىمىزدىڭ دامۋى اياسىندا ماعىنالى سوزدەر ايتىپ, كورەرمەننىڭ ساۋالدارىنا جاۋاپ بەردى.
«ەلباسىمىز نۇرسۇلتان نازارباەۆ ايتقانداي, قازاقستاننىڭ بولاشاعى جاستاردىڭ قولىندا. سوندىقتان دا سەندەر جاقسى ازامات بولىپ قالىپتاسۋلارىڭ ءۇشىن بىلىمگە دەن قويىڭدار. بولاشاقتىڭ كىلتى بىلىمدە. وسى باستان ءىلىم-ءبىلىمدى تەرەڭ مەڭگەرسەڭدەر, قازاق ەلىنىڭ قارىشتاپ دامۋىنا سۇبەلى ۇلەس قوساتىن ازامات بولىپ شىعاسىڭدار. ءبىلىم سەندەردىڭ ومىرلىك ازىقتارىڭ», – دەدى ءادىل احمەتوۆ.
شارا بارىسىندا وقۋشىلار قوناقتارعا ءوز ونەرلەرىن كورسەتتى. مەكتەپ ديرەكتورى كۇنىمحان دۇيسەنوۆا كەلگەن قوناقتارعا ريزاشىلىعىن ءبىلدىردى.
تالعات رايىمبەك, "ەگەمەن قازاقستان".
