كاسىپكەرلىك بىلىمگە قاجەتتىلىك ارتتى

قازىر ەلىمىزدە كاسىپكەرلىك بىلىمگە قاجەتتىلىك ارتقانى ەرەكشە بايقالادى. بۇل تۋرالى بۇگىن پرەمەر-مينيستر باقىتجان ساعىنتاەۆتىڭ قاتىسۋىمەن وتكەن «اتامەكەن» ۇلتتىق كاسىپكەرلەر پالاتاسى تورالقاسىنىڭ كەڭەيتىلگەن وتىرىسىندا ءمالىم بولدى. «ەلدە بىلىكتى ماماندارعا مۇقتاجدىق قالىپتاسىپ وتىر. بىزدە اياق كيىم جاساۋشىلاردى, تىگىنشىلەردى, ءۇي قۇسىن وسىرۋشىلەردى دايىندامايدى. ال قاپتاعان قارجىگەر, زاڭگەر, باعدارلاماشى ديپلومدارى بار جوعارى وقۋ ورىندارىنىڭ تۇلەكتەرى جۇمىس تابا الماي ءجۇر. سوندىقتان كاسىپكەرلىك ۋنيۆەرسيتەتتەرى جەلىسىنە زارۋلىك سەزىلۋدە. كاسىپكەرلىك سالادا ءبىلىم بەرۋ ستاندارتى قابىلدانىپ, ونى جوو مەن كاسىپتىك-تەحنيكالىق وقۋ ورىندارىنىڭ نەگىزىنە اينالدىرۋ كەرەك», دەدى قىزىلوردا وبلىسى سەرۆيس جانە قىزمەت كورسەتۋ سالاسى كاسىپكەرلەرى قاۋىمداستىعىنىڭ پرەزيدەنتى ەرلان رايىموۆ . سونىمەن قاتار ول كاسىپكەرلىك سالاداعى وتكىر مامان تاپشىلىعىنا الاڭداۋشىلىعىن جەتكىزىپ, بۇل, اسىرەسە شاعىن بيزنەس باعىتىندا وتە وزەكتى ەكەنىن ايتتى. باسقوسۋدا «Alageum Gruop» جشس باقىلاۋشى كەڭەسىنىڭ توراعاسى سايدوللا قوجاباەۆ ءسوز سويلەپ, عىلىمي ەڭبەكتەردى قارجىلاندىرۋ, وتاندىق كاسىپكەرلەردىڭ گرانتتارعا قول جەتكىزە الماۋى, كادر دايارلاۋ ساپاسى سىندى ماسەلەلەر تۋرالى وي قوزعادى. اسحات رايقۇل, "ەگەمەن قازاقستان".