Duty Free ءتول تاۋارلارىمىزدى تانىمال ەتەدى

تاياۋدا «حالىق ماركاسى» قازاقستاندىق تاۋارلار مەن قىزمەتتەردىڭ ساپاسىن باقىلاۋ جۇيەسى فەدەراتسياسى» زتب اقتاۋ قالاسىنداعى Duty Free جەلىسىمەن ارادا كەلىسىمگە قول جەتكىزگەنى بەلگىلى. ەندى اۋەجايلارداعى وسى دۇكەندەر جەلىسىندە «حالىق ماركاسىنىڭ» تاۋارلارىنا ارنالعان سورەلەر پايدا بولماق. وسى ورايدا, جالپى, Duty Free دۇكەندەر جەلىسىنىڭ تۇتىنۋشىلار ءۇشىن دە, كاسىپكەرلەر ءۇشىن دە ءتيىمدى تۇستارىن ايتا كەتپەكپىز. بىرىنشىدەن, كەيبىر تانىمال برەندتەر تەك قانا Duty Free دۇكەندەرىندە ساتىلادى. ماسەلەن, «ترەۆەل سەت» اتالىپ جۇرگەن, جولاۋشىلار ءۇشىن وتە ىڭعايلى, شاعىن كولەمدە شىعارىلاتىن كوسمەتيكالاردى ايتا كەتۋگە بولادى. كىشكەنتاي فلاكوندارداعى ءيىسسۋ, بوياۋلاردى باسقا دۇكەندەردەن تاپپاۋىڭىز مۇمكىن. ەكىنشىدەن, بۇل دۇكەندەردەن العان تاۋارلاردىڭ قولدان جاسالماعانى, سول برەندتىڭ ءونىمى ەكەنى ەشقاشان كۇمان تۋدىرمايدى. سۋسىن, كوسمەتيكا, ىشىمدىك, شوكولاد سىندى ساياحاتشىلار ءۇشىن سۇرانىسقا يە تاۋارلاردىڭ ساپاسى ءۇشىن قام جەمەۋگە بولادى. ۇشىنشىدەن, Duty Free جەلىسىندە ەڭ كوپ سۇرانىسقا يە تاۋارلاردىڭ ءبىرى الكوگولدى ىشىمدىكتەر ەكەنى جاسىرىن ەمەس. باسقا دۇكەندەرگە قاراعاندا, بۇل جەردەگى سۋسىنداردىڭ باعاسى ەكى ەسەگە جۋىق ارزان. Duty Free جەلىسىنە كاسىپكەرلەردىڭ قۇمارتاتىن تۇستارى از ەمەس. ەڭ باستىسى, وندا كەيبىر اكتسيزسىز, باج سالىعىنسىز تاۋارلار ساتىلادى. تاۋار ەل اۋماعىنان شىعارىلاتىن بولعاندىقتان, قوسىمشا قۇن سالىعىنان دا بوساتىلعان. سول ءۇشىن كەيبىر الەمدىك دەڭگەيدەگى تاۋار وندىرۋشىلەر كەيبىر ءونىم تۇرلەرىن ارنايى Duty Free ءۇشىن شىعاراتىنى دا ءمالىم. «حالىق ماركاسى» بىرلەستىگىنىڭ نەگىزىن قالاپ, وتاندىق ءوندىرىستى دامىتۋعا, ءتول ونىمدەرىمىزدى تانىتۋعا ۇلەس قوسىپ جۇرگەن جانداردىڭ ءبىرى ريمما تاجىباەۆانىڭ ايتۋىنشا, Duty Free دۇكەندەر جەلىسى ارقىلى ساتىلىمعا شىعارۋ وتاندىق ونىمدەردىڭ تانىمالدىعىنا ىقپال ەتەتىنى انىق. قازاقستاندا جاسالعان كونديتەرلىك ونىمدەر, سۋسىندار, كادەسىيلار جانە باسقا دا تاۋارلار ەندى وسى دۇكەندەردە ساتىلا باستايدى. ء"بىز وزىمىزدە بار مۇمكىندىكتەردىڭ ءبارىن پايدالانىپ, وتاندىق برەندتەردى تانىمال ەتۋگە تىرىسامىز. Duty Free اقتاۋ جەلىسىمەن كەلىسىمگە كەلۋىمىز وسى باعىتتاعى قادامدارىمىزدىڭ ءبىرى. بۇعان دەيىن وتاندىق تاۋارلار جوعارىدا ايتىلعان ساۋدا نۇكتەلەرىندە بولماعان ەدى", - دەيدى. ونىڭ ايتۋىنشا, «حالىق ماركاسىنىڭ» ونىمدەرى وتاندىق اۋەجايلاردىڭ اۋماعىندا عانا ەمەس, شەت مەملەكەتتەردىڭ اۋماعىندا دا ساتىلۋعا ءتيىستى. سول ءۇشىن الداعى ۋاقىتتا قازاقستاندىق ونىمدەر Duty Free ساۋدا جەلىسىنىڭ ەۋروپا ەلدەرىندەگى, ازەربايجان, قىرعىزستان, رەسەي, تۇركيا ەلدەرىندەگى نۇكتەلەرىندە ءتول ونىمدەرىمىزدىڭ سورەلەرى پايدا بولۋعا ءتيىس. دەمەك, اقتاۋ اۋەجايىندا بوي كوتەرگەن وتاندىق ونىمدەر سورەسى جيىرما ەلدە اشىلاتىن دۇكەن سورەلەرىنىڭ العاشقىسى دەسەك قاتەلەسپەيمىز. ارنۇر اسقار, "ەگەمەن قازاقستان".