دۇنيەجۇزىلىك ەكونوميكالىق فورۋم: قازاقستان عىلىمى قارىشتاپ دامۋدا

دۇنيەجۇزىلىك ەكونوميكالىق فورۋمنىڭ عالامدىق باسەكەگە قابىلەتتىلىك يندەكسىنىڭ جىل سايىنعى قورىتىندىسىندا قازاقستان عىلىم سالاسىندا جۇمىستارىن بەلسەندى جۇرگىزۋدە دەگەن تۇجىرىم جاسالىپتى. «عىلىمي-زەرتتەۋ ۇيىمدارىنىڭ ساپاسى» كورسەتكىشى بويىنشا قازاقستان 2015 جىلى 81-ورىندا بولسا, بيىل 63-ورىنعا كوتەرىلگەن. «جوعارى وقۋ ورىندارى مەن بيزنەستىڭ عىلىمي-زەرتتەۋ جانە تاجىريبەلىك-كونسترۋكتورلىق جۇمىستارداعى ارىپتەستىگى» كورسەتكىشى بويىنشا رەسپۋبليكامىز 66-ورىنعا شىققان (2015 جىلى 88-ورىندا بولاتىن). «ينجەنەرلەر مەن عالىمداردىڭ قولجەتىمدىلىگى» كورسەتكىشى بويىنشا ءبىزدىڭ ەلىمىز 8 ورىندى ارتقا تاستاپ, 64-ورىنعا تابان تىرەدى. ەلىمىزدىڭ ءبىلىم بەرۋ جۇيەسىنىڭ باسقا پارامەترلەرى بويىنشا دا دامۋ بايقالادى. ماسەلەن, «ورتا بىلىممەن قامتىلۋ» كورسەتكىشى بويىنشا قازاقستان 138 ەلدىڭ ىشىنەن 21-ورىنعا شىقتى (2015 جىلى 42-ورىندا ەدى). مەكتەپتەردە ينتەرنەتكە قولجەتىمدىلىك تە جاقسارعان – بىلتىر وسى پوزيتسيا بويىنشا 71 ورىندا بولساق, بيىل 29-ورىنعا ءبىر-اق شىقتىق. ساراپشىلار ماتەماتيكا جانە جاراتىلىستانۋ ءپانى بويىنشا ءبىلىم ساپاسىنىڭ جاقسارعانىن دا اتاپ وتۋدە. بۇل كورسەتكىش بويىنشا قازاقستان ەكى پۋنكتكە كوتەرىلدى, بىلتىرعى 71-ورىننان 69 ورىنعا شىقتى. عالامدىق باسەكەگە قابىلەتتىلىك يندەكسى (The Global Competitiveness Index) -  بۇل دۇنيەجۇزىلىك ەكونوميكالىق فورۋم (World Economic Forum) نۇسقاسى بويىنشا ەكونوميكالىق باسەكەگە قابىلەتتىلىك كورسەتكىشنىڭ الەم ەلدەرى اراسىنداعى رەيتينگى جانە عالامدىق اۋقىمداعى زەرتتەۋ. بۇل يندەكس  دۇنيەجۇزىلىك ەكونوميكالىق فورۋمنىڭ (World Economic Forum) ارىپتەس ۇيىمدار جەلىسىمەن, ياعني تانىمال زەرتتەۋ ينستيتۋتتارمەن جانە وسى سالاداعى كوشباسشى ۇيىمدارمەن بىرلەسە تەرەڭ تالداۋ جاساي وتىرىپ جۇرگىزىلەتىن جىل سايىنعى اۋقىمدى زەرتتەۋ ناتيجەسىندە ەسەپتەلەدى. بۇل اۋقىمدى زەرتتەۋ الەم بويىنشا ءارتۇرلى كومپانيالار باسشىلارىنىڭ عالامدىق ساۋالناماسىنىڭ ناتيجەلەرىنە جانە جالپىعا قولجەتىمدى ستاتيستيكالىق دەرەكتەرگە نەگىزدەلەدى. ال, يندەكستەگى ءبىلىم بەرۋ جۇيەسىنىڭ ساپاسى ناقتى 12 كورسەتكىش بويىنشا انىقتالادى. بۇل زەرتتەۋ 2004 جىلدان بەرى جۇرگىزىلىپ كەلەدى جانە قازىرگى تاڭدا دۇنيەجۇزىنىڭ ءتۇرلى ەلدەر بويىنشا باسەكەگە قابىلەتتىلىك كورسەتكىشىنىڭ ەڭ تولىققاندى كەشەنى بولىپ سانالادى.