تاڭەرتەڭگىلىك ابىر-سابىر. پاۆلودار وبلىسىندا تۋىپ-ءوسىپ, ارتىندا وشپەستەي ءىز قالدىرىپ, ادەبي-مادەني تاريحىمىزدا ايرىقشا ورىن الاتىن ايتۋلى تۇلعالار ماڭگىلىك قونىستانعان زيراتتارعا بارىپ, تاعزىم ەتىپ, گۇل شوقتارىن قويۋ كۇن تارتىبىندە بەلگىلەنگەن ءىس-شارالاردىڭ ءبىرى ەدى.
قوناق ءۇيدىڭ كىرەبەرىسىندە ايەلدەر گازەت-جۋرنال, ونى-مۇنى ساتىپ تۇراتىن. زيرات باسىنا باراتىن اۆتوبۋستى كۇتىپ, قولىمىزدا كارزىڭكەدە دەيسىز بە, جىلتىراق سىتىرلاق قاعازعا ورالعان دەيسىز بە, گ ۇلىمىز بار, الگى ساتۋشى ايەلدەردىڭ قاسىندا قارا كوبەيتىپ, شوعىرلانىپ جاتقان بولاتىنبىز. ءبىر-بىرىمىزدەن «قاي زيراتقا بارامىز؟» دەپ سۇراپ قويامىز ارا-اراسىندا. سونى قۇلاعى شالىپ قالعان گازەت ساتۋشى ايەلدىڭ ءبىرى «كەلمەي جاتىپ ءبىر ادامدارىڭىز قايتىس بولعان با؟» دەمەسى بار ما؟
ال, كەرەك بولسا...
«ورىسشا ينتەرۆيۋ بەرمەيمىن...»
قارا شاڭىراق – م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا فەستيۆالدىڭ جابىلۋىنا ارنالعان ءىس-شارا باستالۋعا جاقىن. مۇنىڭ الدىندا دا فەستيۆال اۋقىمىنداعى ءىس-شارالار الماتىنىڭ ءار تۇسىندا بولعان ەدى. بىرىندە – پاۆلودارلىق سۋرەتشىلەردىڭ كورمەسى, ەكىنشى ونەر وشاعىندا – وركەسترلەردىڭ كونتسەرتى, ۇشىنشىسىندە – جۇزدەسۋ-كەزدەسۋلەر... فەستيۆالدىڭ جابىلۋ سالتاناتىنا جينالىپ جاتقان جانداردىڭ كوبى سول مادەني-ادەبي شارالارعا قاتىسقان ادامدار. سودان العان اسەرلەرى قانداي ەكەن؟ ماقساتىمىز وسى. ونىمەن قوسا جۇرتقا تانىمال ونەر ساڭلاقتارىنىڭ قولعا تۇسە بەرمەيتىنى تاعى بار. الماتىدان الشاقتا تۇراتىن جۋرناليستەردىڭ وسىنداي وڭتايلى, ورايلى ءساتتى قالت جىبەرمەۋگە تىرىساتىنى بار عوي.
پاۆلودار وبلىستىق تەلەراديوكومپانياسىنىڭ رەجيسسەرى رايحان جولداسوۆا بار, ورىس رەداكتسياسىنىڭ رەداكتورى قۇرالاي باياندينا بار, ۇشەۋمىز «كىمدەردەن ينتەرۆيۋ الساق ەكەن» دەپ كىرگەن-شىققان ادامداردى كوزبەن شولىپ تۇرعانبىز. فەستيۆالدەن حابار قازاقشا-ورىسشا دايىندالاتىن بولعاندىقتان, ينتەرۆيۋ ەكى تىلدە بولۋى كەرەك. مەنىڭ جۇگىم جەڭىل. ال, قۇرالايعا قيىنداۋ بولىپ تۇر. ءبىر كەزدە ءسابيت ورازباەۆ اعامىز كىرىپ كەلە جاتتى. دۋالى ءسوز ايتاتىن اتاقتى ادام. قوس قولداپ امانداسىپ, ينتەرۆيۋ بەرۋىن سۇرادىم. كەلىسىمىن بەردى. تەلەوپەراتوردى شاقىرىپ, ميكروفوندى تەكسەرىپ, قۇرالاي سۇراق بەرۋگە ەندى وقتالا بەرىپ ەدى ءسابيت اعا «قاي تىلدە؟» دەدى. مەن «ورىس تىلىندە» دەدىم. «جوق ورىسشا بەرمەيمىن» دەپ ءسابيت اعا بۇرىلىپ جۇرە بەردى.
پاۆلودار وبلىسىندا ءوز ۇلتىمىزدىڭ وكىلدەرى قازاق تىلىندە سويلەۋدەن ات-تونىن الا قاشادى, ال الماتىدا كەرىسىنشە.
عالىم ومارحان,
«ەگەمەن قازاقستان»
